中大夜總會誠聘陪酒 PR

文：好景四叔

「我仲估我地嘅交往係建築喺感情之上，估唔到原來都係一盤生意。」

「講感情都要俾錢架！」

《國產凌凌漆》，北姑向周星馳追數一幕

做援交，搵快錢，隨時遇凶險，例如早前就有援交少女慘遭索K索大咗的客人殘殺碎屍。想要安全不要單對單接觸？不妨考慮去有人睇場的夜總會做陪酒——代價是，你賺到的錢，要分給老闆一大截。鬼叫個場係佢嘅咩。

正如做夜總會陪酒比做麥當勞收銀好賺，在中大做打電話也比在書展做sales企足十幾粒鐘只得三舊水好賺。從2007年開始，中大拓展及籌募處搞了一個「Phone中關懷」計劃，招募三十個同學打電話給三千個校友游說他們捐錢回饋母校，時薪五十大元，招聘廣告上還列明「另設獎金，最高可達總酬金14%」。

一盤生意經

搵食？無錯你可能係一個等錢開飯嘅窮學生，之但係中大係咪窮到食都冇得食呢？打開中大份年報，2008年盈餘有六億八千三百幾萬，賺到開巷（順帶一提，2007年金融海嘯未到，賺得仲勁，過九億）。假如全校一萬四千個學生同佢分身家，每人可以袋48，988落袋，慳返全年學費有突，買多部notebook都仲得，yeah。當你發現「Phone中關懷」完三千個校友都只係捐到嗰四百粒，你會突然唔知道自己搞咁耐其實唔知為乜。如果再望望自己嗰五草野時薪，又或者問問路過嘅EMO工友幾錢月薪，你直情唔知道成間中大究竟搞乜。

講感情？俾錢先

咁咪好似做電話推銷？ 無錯，真係好似做電話推銷，「營業額」高仲有獎金分添。為了接多兩單生意，除左要落足嘴頭（又名「溝通技巧」），你自然唔希望個客——呀對唔住，好似應該叫師姐／師兄——同你傾足兩粒鐘，最後仲要唔磅水，食白果。

有校友抵頸唔住，在報紙控訴這個計劃簡直像電話騙案。事情鬧大了，連《蘋果日報》的李八方也忍不住加入恥笑行列。可能你聽到會覺得很委屈，搵食啫，唔使咁俾人鬧呀？況且在「Phone中」叫校友用錢「關懷」下中大有咩錯？校方寫明啲錢用響獎學金同學生設施，正氣凜然絕無私心。同心愛中大的師兄弟姊妹隔代交流，可能有熱心校友仲會帶參加者出去食飯呢。

係呀，即使夜總會間中都會有豪客帶佢睇中既小姐去出私鐘，但呢個唔係佢請你返嚟嘅目的。No money notalk，假如你生到奀挑鬼命著到寒寒酸酸，走入鶯鶯燕燕的葡京賭場行十個轉都唔會有姐姐仔撩你。同樣道理， 回歸之後市道險惡，校方預你九十年代打後的畢業生搵食艱難捐唔到幾多，索性唔理，搵都搵啲貌似上到位嘅先，上年的「Phone中關懷」都只會揀七、八十年代畢業的校友打電話。俾得起錢的先至有得「愛中大」，換取你的「關懷」，貨銀兩訖。

原來，愛有一個價錢，每個人都有一個價錢。搵食啫。

校方話打電話籌到嘅錢會用嚟做獎學金，咁獎學金又用嚟做乜呢？上年中大總共派咗八千幾萬獎學金出去，入面有差不多四千萬係用嚟吸引內地尖子報讀的。當然，成績好拎到獎學金天經地義，想來香港讀書的內地生本身更加乜都無做錯，但換校方角度睇，話晒本地生人數係內地生五倍幾，點解要掟近五成獎學金去吸引內地尖子落嚟呢？無他，根據國際大學排名規矩，尖子越多，外國學生越多——你無睇錯，內地在這套規矩入面是被界定為「外國」的，唔知熱衷大學排名的中大高層係咪諗住搞港獨分裂祖國——中大排名就越高，排名越高就越易引人報讀賺學費。小財唔出大財唔入，派獎學金，有時都係一種投資。

中大就好似一盤生意，仲要係一盤經營得好笨實都有賺的生意。大學火車站隔籬間凱悅酒店，就係中大高層送幅地俾新世界集團（係呀，就係當年叫梁展文賤賣紅灣半島俾估嗰個新世界）起酒店，然後叫新世界每年將雞碎咁多嘅3%酒店收入俾返中大。而作為學生嘅你呢，就走入去呢間「教學酒店」做實習啦，到時唔知時薪又係咪五草野。

有錢豪俾財團都唔益下你，你開始懷疑自己係喺大學讀書，定係幫緊長實打工洗廁所。You don’t belong here.

愛的條件

雖然，中大CEO劉遵義和李嘉誠還是不同的，起碼李嘉誠唔會肉麻到出信叫佢啲前客仔「愛長實」，仲要科水捐錢壯大佢盤生意。你好清楚，香港地有錢佬大晒，自己將來好可能要為佢地做牛做馬，要對客對老細賠笑甚至陪酒——不過你要知道，個場始終係人地嘅，人地亦都唔多愛你。你可以愛同學，你可以愛校友，但愛中大只能是單戀。直至我們奪回中大為止。