Chrissie -;

   呢幾期都係妳答,阿S t e p h y係咪唔會返黎g a la??講返正題先,我同男朋友呢,不嬲做愛都有用套,妳知啦唔戴有左BB都唔知點算。聖誕節個晚我地去party,兩個都飲大左,做既時候唔記得用套, 雖然佢冇射入去,但係都好驚有BB。我都知過左咁多日先寫信你問你係有d遲,但係我都唔知點好。我有試過去藥房買事後丸架,但唔知係唔係聖誕之後捉得緊d,藥房話冇醫生紙唔俾買呀。所以我到依家都未食藥。

    係呢,除左要避孕之外,咁樣冇戴套法,仲要做返d咩事後野補飛呀?

Tracy

 

Tracy

    Stephy仲番唔番黎?…嗯,你中意惠子定莊子多啲?Chrissie就中意莊子多啲。

   丙左你先:飲大左所以唔記得用套,聽落好合理!但飲大左──又記得要做愛!飲大左又記到佢無射入去!做人唔得咁大細超,「做」同「套」都同命仔有關。人無左性帶黎既歡愉,生命可能變得(更)枯橾;但因自己造成既不安全性行為而危害左生命,咁就冏喇!希望你地第日搞野搞全套,戴番安全套啦!

呢…唔知你係點確定佢有無中出?不如我地退一步,當佢有中出先?咁呢個唔安全既性行為係2 5 號發生,到而家(唔關我事架,係呢本野又出得準時)一早已經過左三日,如果唔係呢,比較方便防止懷孕既方法,就係同家計會青少年保健中心預約,食番事後丸。事後丸一般係防止受精情況發生,並令你盡快黎M(無論你上次幾時黎,佢會一至兩個星期內令你再黎!),流量可能好多,可能特別唔舒服架,成功率就超過九成。提番,一來較少藥房敢賣事後丸,二來貨源同成效難追查,所以如果去藥房買,要更小心喇。

   如果事發左一個月,你都可以去藥房買驗孕棒,照說明書用就OK。如果有左,因為成孕時間尚短,經過覆診,如果身體無其他唔適宜終止懷孕既狀況發生,咁都頗有機會有得接受終止懷孕既程序既,過程一般唔超過半個鐘。青少年保健中心係旺角,元朗同灣仔都有分店,當你有需要個陣,就記得預約──電話…三間都唔同,自己上網查啦。無論咩原因,如果經歷左唔安全性行為,而唔打算生小朋友,咁就盡快處理有關懷孕既野喇。越早處理,越無咁唔好。

   另一樣都緊要既當然係性病問題。你地一時飲大左「唔記得」,為你地帶黎除左可能懷孕外,仲有感染性病既可能──疣(椰菜花)、淋病、梅毒、愛滋病毒等等(Chrissie數唔完),呢D都可以透過各類型既性交感染,當然包括你同男友既(Chrissie估係)陰道交。查實感染性病絕對唔等如一個人「唔乾淨」,就如有D性病透過家人或朋友共用衣物都會傳染;但性病都當然有佢可怕一面,而為左好好保障自己同對方,盡量預防感染,相信都係你同C h r i s s i e都會認同!Chrissie又退一步,當你男友真係無中出,但陽具係射精之前既黏液分秘同陰道本身既分秘,都會帶有數量足以傳播他人既病毒;特別係陰道壁組織通常好柔軟,較容易被磨損造成傷口,病毒更加容易互相傳播!相對地你地可能較在意愛滋病,因為聽開都係「會死人,好慘食好多藥」,但其他都係可小也可大,唔使極焦慮,但唔好太忽視呀!安全套唔係絕對安全,但從呢D的方面睇,唔用佢,都危架。

   咁如果你地「好專一,只同對方搞,諗掂避孕就得,唔會再惹到其他性病,所以唔係真係咁需要用套…」一來唔止性病可以透過血液同體液傳播,仲有其他疾病架嘛;二來Chrissie知唔少人專一緊個陣,都唔小心飲大左,或者太有需要時搵你唔到,而做左「碰友」呀,話唔埋架嘛!咁係咪叫緊你同男友互相猜疑所以要用套?唔係囉。Chrissie諗起一個朋友,患有愛滋病,每年十二月世界愛滋病日,都會用一晚企係銅記,想同路人FreeHugs,宣傳關於呢個病既訊息。佢帶住捱過十年既發燒、嘔吐、食藥多過食飯,都係話番俾我地知兩樣野:愛滋病係病,但同愛滋病病人握手擁抱傾偈食飯BBQ甚至拍拖,都係照咁去, 無野唔同。另一樣就係,一個豆釘套,都可以影響聽落勁大件事既──你地既將來。講開愛滋,愛滋係有空窗期既,無咁快驗到有無,所以如果想驗,可以預約衞生署轄下既防護中心做番測試。電話:都係要自己上網查喎。

   終於都入到正題!下次開P一定要預埋Chrissie!電話:2603-6404,等你 😉

Chrissie

分享至:

Leave a Reply

Your email address will not be published.