校園│校巴．校巴以外．2012

文: 依斯H噢
採訪: Melody

校巴

校巴問題講左咁耐，好開心見到近排真係改善左！之前搭校巴勁亂，等勁耐又勁逼……而家D車都幾準時，班次又密左，教準時間去搭基本上都上到車，仲無以前咁逼添；係朝早同尾班車可以再做好D。校方今次算係做得唔錯。

其實想搭校巴搭得更有效率，除左校方有責任之外，同學都要配合一下。有時真係見到校巴仲有企位，只不過係D同學唔肯行入去車尾，搞到上唔到車。有見及此，中大幹事會就打算推出「行入D計劃」。

校巴：「行入D計劃」

顧名思義，個計劃係叫上左車既同學行入D啦。幹事會搵左交通組傾過，已經做緊準備工作。而Shaw學生會都搞緊類似既野，曾經提議過如果同學唔行入D，司機就可以唔開車；但已經被交通組否決左，因為唔想製造司機同學生之間既對立。佢地黎緊會貼貼紙係車度宣傳，同係火車站加裝speaker，呼籲同學行入D。其他詳情會再傾咁話。其實個計劃係幾好，但做起上黎可能比較難。好多時同學諗住好快落車，怕行咁入落車會好煩。所以重點係咪應該呼籲遲落車既同學自覺D，行多兩步行入D？

校巴以外

除左「行入D計劃」，近排中大仲有個關於交通安排既計劃——「順風計劃」。有無諗過係中大唔搭校巴，可以搭咩？可能你同我都諗唔到，但UC就勁到諗到個義載服務——「順風計劃」。

校巴以外：「順風計劃」

UC「順風計劃」旨在「宣揚團結互助的書院精神」，「照顧學生需要，促進師生及同事間的情誼」，「鼓勵共用車輛，減低溫室氣體排放」。個計劃實際係點呢？首先係想參加既UC成員就向聯合書院報名先啦；跟住就會收到兩個標誌牌（見圖），當想提供義載時，就貼個標誌牌係車頭。而義載者可以決定幾時提供義載服務，同埋乘客上車既地點，而落車既地點就由義載者同乘客傾。同學想搭義載既車，就要主動截車喇。

「順風計劃」係2月23號已經正式開始，當日仲搞左個啟動儀式。目前參加左呢個計劃既成員有三十個。我地訪問左書院既黃香生教授，佢話而家反應唔錯，連校董都支持，交通組既黃柏年先生（即交通組阿頭）都加入左。同學方面既反應又點呢？問左恆生樓宿生會既阿邱同阿琪，佢地都覺得個計劃幾好，但係宣傳唔夠，好多學生都唔知；至於成效，他們就話同學可能怕醜，唔知會唔會截車。又問左UC學生會既主席，都係覺得宣傳唔夠。想多D人搭環保順風車，睇黎真係要宣傳多D喇！

UC方面強調個計劃主要係為左環保和書院士氣而做，就唔太關校巴事既。其實點都好啦，「順風計劃」係校巴以外既另一選擇。由呢件事亦可以睇到UC對於「書院精神」唔係得個講字，真係有實踐出黎，體現服務人群的「明德新民」精神。希望過左啟動儀式都仲可以見到義載既車啦。如果呢個計劃反應OK，搞大黎做都唔錯丫。

校巴．校巴以外．2012

呢兩個計劃出發點都好好，直接間接都可以令中大既交通安排更完善，雖然一切尚有待觀察。但可以預測到既係，黎緊中大人對交通既需求會愈來愈大。大學三改四，2012同跟住既兩年，中大會多左二千幾個學生，到時會點呢？呢件事都唔係今時今日先講，但校方似乎仲未有咩計劃。校方係時候諗諗喇！要主動做d野，keep住校巴既服務質素。2012好快到架咋！

聯合書院「順風計劃」
http://www2.cuhk.edu.hk/uc/cht/calendar/event_detail.php?id=889&Y=2010&M=02