導演:黃百鳴,邱禮濤
主演::黃百鳴,吳君如,古天樂,鄭中基,熊黛林,楊穎,潘粵明,李香琴,夏春秋,林雪,田蕊妮
上映日期:2010-02-14

文:陳小明

舊戲拍新版都唔係新鮮事喇,除左同期上映嘅《七十二家租客》之外,之前都仲有《家有囍事2009》,再遠啲都有《97家有囍事》,都係攞住92年果套勁收四千九百萬票房嘅《家有囍事》個名嚟拍。《家有囍事》咁收得,黃百鳴係93年食住條水咁又拍《花田囍事》,家陣照辦煮碗,都係賀歲片檔期殺出個《花田囍事2010》,仲搵咗邱禮濤幫手拍。邱禮濤自己都話自己拍開嘅片好少被人當笑片,好少可「拍攝一部
擺明車馬的賀歲喜劇」咁。嘩,擺明車馬喎,梗係要睇下拍出啲咩味道啦!

故事情節好簡單:公主與平民女子身分對調然後貪財父親帶假女兒呃錢騙婚又唔小心俾國王睇中呢個男扮女裝嘅真公主去做駙馬搞到癡情漢子要去劫公主同假駙馬最終真相大白皇上指婚。咁大團圓結局當然係新春佳節行禮如儀既必要喇,入面啲笑料自然要落足以免悶親大家。正如93年果套咁,笑料主要玩嘅都係亦古亦今:好似吳君如玩古代MSN飛鴿傳書兼吟出「秋刀魚的滋味,貓都想跟你分享」嘅「詩句」;熊黛林同李香琴嘅「貓行」;黃百鳴買咗迷債破產,又同吳君如RAP下歌仔;仲有置入式行銷定笑料傻傻分不清楚嘅OK便利店同賣「古磁」嘅米蘭站。

演員方面,古天樂飾演嘅昏君花田國王,入型入格。因為昏君之所以昏庸,就係夠頹同求其,扮下細蚊仔「lur」地同玩下葉問拳咁,所以係呢套戲就顯得好自然、好貼服喇。吳君如就始終挑起大樑,依然包辦各式姣婆丑角;李香琴繼續做扮懵老太婆,仲要吊威吔吊到好高;新演員就好明顯係楊穎好過熊黛林,起碼熊黛林唔似平民女子之餘,亦都發揮唔到劇本字句上安排嘅喜劇效果。仲有一位內地演員潘粵明,本身想以書呆子引人發笑,但係配音完全破壞晒喜感;最後唔可以唔提下朱咪咪呢位筆者嘅女神,雖然出場好少,但其洪亮嘅招牌笑聲,未見其海盜索瑪莉面目,筆者已然笑了。

係囉,笑左囉。拍套賀歲片都係想咁啫。之但係,一條水食到盡抽到盡晒喇,除咗拎個意頭而入場睇戲係抽極都有之外,觀眾上網睇返張國榮係93年果套做嘅大圍高柏飛,咪又一鬼樣。咁講法,賀歲片嘅核心問題唔係夠唔夠匡正人心、唔係好唔好笑(好笑梗係正喇,笑中有淚就更高喇)、唔係合拍片同本地片嘅對立,而係我哋年年遇到嘅各種事態都好唔同,但係年年睇嘅賀歲片,居然可以一鬼樣喎。如果係
咁,做咩要係戲名度加個年份喎,唔通真係貪果兩個零咁啱擺到落個囍字度咁趣緻咩?

分享至: