文:二五仔

大O其實唔單止係果四日,仲係一個永續生態系統,家陣識咗啲人,雖然有啲以後唔蒲頭喇,剩低果啲就繼續自己玩,但係套文化依然keep住落去,支配各種校園內嘅上課、宿捨生活。雖然好多人都批評佢無聊、無得救喇,但係我哋好似好少理佢點樣保持到喎。再講,無論你去唔去大O,大O點形成,都實關你事。唔玩嘅,都知下呢間大學有咁多人用咁多時間搞咗啲咩,你遇到嘅同學又做啲咩;玩嘅,聽到一炸人扮熟咁同你講一炸你唔知係咩嘅terms,睇完咪知己知彼,唔會俾人食住囉。

OC/營主

OC即係迎新營籌委,營主就係籌委主席。負責諗下大o主題呀、活動安排呀果啲。其實好多嘢都係佢地決定,一個大o有啲咩有意義同深度嘅活動,都係取決佢哋點安排啲時間。但係事實往往係,四日入面玩咗三日,剩低果日仲要聽大組長分享果啲freshmen完全唔知做咩咁感動嘅感言。

大組長

各書院初嚟埗到嘅新生會分派去不同大組,而大組長就係一人之下萬人之上、大組嘅龍頭(好似係)。一般大組長都係宿生會把持住,點選無咩人知。今年新亞的大組長遴選就有一啲風波,話說有個對新亞好有貢獻(叫做貢獻本身都好笑,俾盡你咪又係上曬啲短莊)的候選人落選,投訴傾莊制度唔透明咁喎。是但啦,大組長點解會人人爭住做,我都唔明解;我只係知道,做得大組長,唔墊返一萬幾千出嚟,好似搞唔掂輔聚飲酒食飯糖水等等搞聚會果盤數(最起碼有啲婆仔數總要自己哽,咁先不失霸氣)。咁都肯做,除左為上位,做下領袖,可能都係同組仔女一樣,為咗「識多啲人」呢個魔咒咁啦。

輔員

大組入面又有細組,細組就係同新生最近嘅果炸組爸媽仔女喇。而組爸媽,學名係書院迎新營輔導員,簡稱輔員。因此,唔好以為輔員係邊鬼個,佢就係組爸媽喇。咁你又咪以為組爸媽之間真係好熟絡,因為除左幾個同大組長熟啲嘅core外,佢哋都可能只係五月考試之後先識無耐,中間不斷有輔聚、pre-pre-camp、pre-camp等等各種大組活動,先至監生焗熟,其實同新生差唔多咋。

每個大組,都會分幾個部,負責唔同統籌工作。通常會有節目部、出(版)設(計)部同四七部,有啲仲有camp fire部。部嘅工作其實都幾因循,上年點整就點整咁,無諗下有咩新嘢搞(聽聞今年新亞有人搞咗個新亞精神部,但係搞成點就唔知喇)。每個輔員都會至少隸屬一個部,每個部都會有部主或副部主。部主除咗帶領部嘅工作之外,仲要擔起混熟部內輔員嘅責任,例如搞下較細規模嘅部聚。

Dem Beat

人類學嚟講呢,都係一堆一路嗌一路打beat嘅舞蹈咁啦,媲美毛利族人嘅戰舞。內容當然都係乏善可陳,以搞笑或霸氣為主。不過佢仲會出現係ocamp以外嘅地方,好似上莊宣傳咁。有啲都幾有特色,好似某內地生組織曾經用上海話Dem Beat咁。但係喺ocamp,Beat嘅用途都係講下粗口諧音寸人,同埋transit之前又dem下咁。

四七

四七者,古之七絕也。不過,今時今日嘅四七句句押韻,仲可以用番邦語言喎,梗唔係杜甫作果啲啦。四七用途只有兩個:一係攻擊別人,一係稱讚自己。出沒次數其實無dem beat咁多,基本上只會係大組互片同四院互片中出現。查實,四七咁有文學性,點解唔可以搞搞新意思,例如讚下人、批評下校政呢?

互片

「一齊片片佢!」大組長叫到,新生就記住要對住張「片紙」,照讀上面啲四七喇。大組片嘅同讚嘅都不外乎大組長瘀/威水事或者個人形象,通常新生都唔知做咩;而四院片嘅同讚嘅都只係間can難/好食或者地理位置咁囉,雖然係台下新生同樣唔知對面嗌緊咩。咁樣片完人,以後就可以有啲「談資」,笑下人哋書院喇。通常片完之後大家又係dem返個書院beat或者中大beat和頭下,之後組爸媽拿拿林收返啲片紙(為咗唔好俾傳媒拎到呀)。

揸攤/頹/格劍

組仔女如果覺得上面啲嘢玩下都無妨,不過四日都咁樣,好鬼悶喎,之後表示出一絲鬆懈,唔咁投入都好正常啫。就係呢個時候,組爸媽卻會將因果倒置,叫你唔好揸(緊時間)攤(抖)、唔好咁頹,要投入啲。仲有,如果一班男仔自己玩,又會被笑為格劍,好似入得嚟就預設咗要結識異性咁,都幾異性戀霸權ga。

組聚

又叫re-u,我校則興叫聚。聚係延續ocamp精神嘅重要手段,通常係ocamp之後出現頻率會較密,搵人約係café吹下水玩下game咁。keep到嘅友誼,通常又建基於宿舍啦、莊啦等等新嘅形式,直至下一年大o,大家又一齊玩過癲過。

編者後記

雖然玩下玩下,唔聲唔聲,大O其實都傳承住一套玩法想法--就係純粹輕不著地、不問世事嘅生活態度。之但係,迎新營用咗咁多資源,其實唔係一隻純為玩樂嘅game嚟,但現實居然只有玩同埋玩(新亞雖有探訪老人中心,但係都係同老人家玩下傾下)。小弟幻想入面嘅迎新營,即使唔係好似十幾年前咁樣關懷國事,起碼都講下人生理想丫。拜託,連少少嚴肅啲嘅嘢都容納唔到,當咩自己係精英(如果係嘅話)。

分享至:

28 Responses

  1. BRIAN

    這篇談論OCAMP的文章
    很多地方都只從表面去看
    並沒有深入思考一下,OCMAP的活動背後的意義
    更沒有求證過所寫內容是否屬實
    其誤導性之高令人吃驚
    連基本訪問一下應屆大組長的理念都不去做,就下定論
    引用:「咁都肯做,除左為上位,做下領袖,可能都係同組仔女一樣,為咗「識多啲人」呢個魔咒咁啦。」
    這個我想算是你對大組長為何想做大組長的結論吧?
    真的不知所謂!
    把自己的主觀想法,說得好像客觀事實一樣
    如此這般的文章出現在學生報上,實在令人失望之餘
    亦令人憤怒
    現在我藉由這個留言向作者投訴,要求對OCAMP所有單位作出道歉.

    回覆
  2. 我是這篇文章的作者。我明白這篇文章引起了一些討論,當中的觀點也不是人人同意。但我希望先澄清學生報的定位,是以分析論述為主的,與同為學生刊物的大學線相比,是比較不貼近主流以報導為主的報刊。因此,學生報不必把觀點包裝成事實,反而樂於展示編輯及作者的觀點,而非好像您所說的把主觀當客觀。

    而且,本文目的是介紹大O的用語,除了大約明白其解釋外,尚需若干語境以助了解。然而,關於大組長的條目,是沒有可能窮盡所有大組長的往績,更遑論他們的動機。因此,在這一小條目中猜測做大組長的理由,是為了提供我的理解作為解釋的語境。這樣的理解在我參與迎新營的經驗中,仍然是合乎常情的。當中我無意貶低在迎新營中「上位」或結得的友誼,但稱為魔咒,只是讓新生反思一下迎新營的意義,接觸不同觀點,正如我在尾段認為迎新營不應只得玩樂,更要有所擔當。其實您不妨仔細閱讀在本文前的巡迴的馬戲團,便可見編輯不是針對迎新營的任何人,認為它不值一哂。在我來說,迎新營內的情誼也是真實可貴的,不過它應有更大的用處。

    回覆
  3. BRIAN

    明:

    我並不反對新生接觸不同觀點,而「巡迴的馬戲團」我亦有一看,主觀地去寫學生報亦不是我想投訴的地方。

    如果你的文章是介紹大o的用語,那麼顯然有很多不足之處。
    很簡單的一個問題,你有認真介紹大o一個重要的環節--四院會師嗎?

    你口口聲聲說目的是介紹大o的用語
    但我原全不覺得看完會對大o會有更多了解,有的只是誤解。

    我明白,是不可能對所有大組長都作出訪問
    但你不去訪問,又可以這樣下定論嗎?
    引用:「咁都肯做,除左為上位,做下領袖,可能都係同組仔女一樣,為咗「識多啲人」呢個魔咒咁啦。」
    你這個寫法,就像你十分清楚大組長動機一樣而寫,這是主觀
    但可惜的,你寫的不是事實,亦沒有加上一些類似「作者認為」的字眼
    你還可以說這是猜測做大組長的理由?何猜之有?
    不是把自己的主觀想法,說得好像客觀事實一樣,是什麼?
    這不是展示編輯及作者的觀點,是把主觀當客觀。

    你知道你口中的「上位」已經是貶義嗎?
    稱為魔咒,又會不是貶義?
    介紹大o用語,需要貶義嗎?
    你是到底是想新生反思一下迎新營的意義,接觸不同觀點,還是想貶低大o?我十分懷疑你的動機。

    其實不止說做大組長動機一項錯得離譜
    你的後記中,說「大O其實都傳承住一套玩法想法--就係純粹輕不著地、不問世事嘅生活態度。」亦有問題。
    我知這是你的主觀,但這是事實嗎?

    總括來說,「大O永續生態系統之terminology」這文章,介紹的大o用語失實之餘,又嚴重貶義
    學生報是不必把觀點包裝成事實,可惜以上文章的作者卻把自己的主觀偏見,以及膚淺理解,說成事實一樣

    我要求作者對迎新營各個單位作出道歉,並對受誤導的讀者賠不是。

    BRIAN

    回覆
  4. 路過打酱油,都發表下意見先。

    作者對部份同學為什麼要做大組長固然有其主觀判斷、猜測,這點我固然不盡同意他的判斷。但是否要事事我認為,我猜測...我更不敢同意。舉一例:OC/營主-「大組長分享果啲freshmen完全唔知做咩咁感動嘅感言。」是主觀判斷吧!但同學是否能分得清?我理解應該可以。

    整體來說,全文不乏充斥作者個人風格、意見的文字。讀者是否會傻得全部當真?我甚有保留。再講,難道不是那些故作客觀、扮中立、無意見的報導更容易透過暗地裡的文句運用,影響讀者?由是觀之,BRIAN 不應該質疑作者為什麼在文章中充滿主觀意識,(因為作者從來不存在沒有立場)反而應該問作者這些想法由甚麼地方產生。再爭論這些想法是否合理。

    回覆
  5. 再講再講...

    「大O其實都傳承住一套玩法想法--就係純粹輕不著地、不問世事嘅生活態度。」
    要討論這點,其實要拿出參照點。如果是過往、如樊善標形容一樣的大O,那說現在的O-camp 是輕不著地、不問世事嘅生活態度,實不為過。作者話:「小弟幻想入面嘅迎新營,即使唔係好似十幾年前咁樣關懷國事,起碼都講下人生理想丫。」已經幾講到作者為什麼認為大O 輕不著地、不問世事。
    如果BRIAN 兄要爭論這點,看來至少要講一講你所知的大O, 有甚麼地方不是「輕不著地、不問世事」才可以繼續討論下去了。

    「你是到底是想新生反思一下迎新營的意義,接觸不同觀點,還是想貶低大o?我十分懷疑你的動機。」
    首先不明白的是為何是兩者有一個二元的劃分。難道不可以透過貶低大o(如果不是在說事實),去幫新生反思一下迎新營的意義?至少我看不到以下不痛不癢的句子有幫助同學思考的可能:「其實大組長真係好好架,又俾咁多心血出來服務同學,又會十分豪爽地請同學食野喎!又可以在咁多人面前夠膽講野...不過~其實同學真係要反思下,對大組長的個人崇拜是否咁理所當然」

    計我話,一係就唔屌,一係就到屌勁d~
    BRIAN 問:「介紹大o用語,需要貶義嗎?」我反問:「唔講下大O有咩問題,需要介紹大o用語嗎?」

    一個YEAR 1 就SKIP 曬大細O的同學上

    回覆
  6. BRIAN

    唉,小弟一向寫作能力比較差,會不會是我書面語表達得不好?那我還是用回口語,反正以上文章都是以口語去寫

    我講多一次
    我唔係對你既主觀抱有懷疑/不滿/投訴
    我想講既係,作者寫既野失實

    你咁鐘意用我舉既一兩個例子黎反駁我,係咪要我quot曬成篇野你先安樂?
    冇問題,我得閒

    作者話:「大O其實唔單止係果四日,仲係一個永續生態系統,家陣識咗啲人,雖然有啲以後唔蒲頭喇,剩低果啲就繼續自己玩,但係套文化依然keep住落去,支配各種校園內嘅上課、宿捨生活。」
    請問大o點支配各種校園內嘅上課生活?
    我諗,新亞既周會,year1既na書通,同學真係跟返大o坐,但咩叫支配?大o有控制到上課情況咩?
    此為不實地方之一
    支配宿舍生活
    可能係uc/cc既大組長多數係宿生會做,所以先咁講?
    我係na既,所以只會講返na
    我唔會對一d我唔熟識既野講咁多
    na既大組長,並唔係由宿生會生出黎,大o後就更加唔會話邊個大組既人去曬其中一個宿到住
    而新一年既宿生會,亦唔會由單一大組所控制
    何來支配之有?
    此為不實地方之二

    作者話:「雖然好多人都批評佢無聊、無得救喇,但係我哋好似好少理佢點樣保持到喎。」
    e句呢,就客觀既野黎,唔係我想講既地方

    作者話:「再講,無論你去唔去大O,大O點形成,都實關你事。唔玩嘅,都知下呢間大學有咁多人用咁多時間搞咗啲咩,你遇到嘅同學又做啲咩;玩嘅,聽到一炸人扮熟咁同你講一炸你唔知係咩嘅terms,睇完咪知己知彼,唔會俾人食住囉。」
    前半正常,我想講既係扮熟果到
    你玩得大o,人地同你講d terms,唔明既我肯定會問返其他輔員,使唔使而家先黎睇你既文章呀?
    再講,冇玩既人,見到扮熟兩個字,唔多唔少都覺得大o係唔好既人係唔好既
    我唔信個個都心水清到分得出e句野只係作者自己膚淺既理解
    而咩係比人食住呢?
    你以為我地有經驗既同學會唔同d冇經驗既同學分享?我地會食住佢地?
    此為失實之三
    (先submit一次,我仲未講完,我怕打打下冇左)

    回覆
  7. BRIAN

    「OC/營主

    OC即係迎新營籌委,營主就係籌委主席。負責諗下大o主題呀、活動安排呀果啲。其實好多嘢都係佢地決定,一個大o有啲咩有意義同深度嘅活動,都係取決佢哋點安排啲時間。」
    e句就冇乜問題

    「但係事實往往係,四日入面玩咗三日,剩低果日仲要聽大組長分享果啲freshmen完全唔知做咩咁感動嘅感言。」

    事實係咁,day4係閉幕,閉幕聽下sharing你覺得好有問題?而且大組長講既除左多謝既說話,仲有野會同freshmen講,係d鼓勵既說話
    作者用到「但係」,已經比人感覺後面既野係錯既(唔知係咪我唔識用但係e個詞la,錯既請指正)
    冇玩大o既,點會唔比你e句野誤導左?
    四日入面玩咗三日?,你以為大o淨係玩?外訪呢?學生會時間呢?夜話呢?
    此為失實之四

    「大組長

    各書院初嚟埗到嘅新生會分派去不同大組,而大組長就係一人之下萬人之上、大組嘅龍頭(好似係)。」
    第一,作者話要介紹大o用語,但佢好似assume左冇玩ocamp既人知道咩係「大組」,完全冇解釋過,仲好意思講自己主要係想介紹大o用語,可笑可笑
    而第二,就係大組長並唔係咩一人之下,萬人之上
    作者括號括住左好似係,實為高登討論區之文化,咁都可以比你講到佢好有自己風格?
    而唔係所有人都明白高登討論區既野,你咁樣,好有可能誤導人
    而大組長,oc,同輔員,地位係一樣既
    唔係你地咁膚淺咁樣睇,大組長係四日三夜最大,就真係最大
    學生報既作者,寫d咁膚淺既野,真係令人失望
    此為失實之五

    「一般大組長都係宿生會把持住,點選無咩人知。」
    唔該作者講野清楚d,可能uc,cc係由宿生會把持,但係至少na唔係
    而點樣選出黎,好明顯就傾莊傾出黎,點會冇咩人知?
    此為失實之六

    「今年新亞的大組長遴選就有一啲風波,話說有個對新亞好有貢獻(叫做貢獻本身都好笑,俾盡你咪又係上曬啲短莊)的候選人落選,投訴傾莊制度唔透明咁喎。」
    先講你括號外,e個係實情
    而括號內果句野,又一次表明作者既膚淺理解
    對新亞好有貢獻,指既係對新亞書院活動有貢獻,作者自己下左個錯既理解,就迫所有讀者睇佢錯既理解
    問題係比freshmen見到既時候,佢地會點諗?
    此為失實之七

    「是但啦,大組長點解會人人爭住做,我都唔明解;我只係知道,做得大組長,唔墊返一萬幾千出嚟,好似搞唔掂輔聚飲酒食飯糖水等等搞聚會果盤數(最起碼有啲婆仔數總要自己哽,咁先不失霸氣)。咁都肯做,除左為上位,做下領袖,可能都係同組仔女一樣,為咗「識多啲人」呢個魔咒咁啦。」
    又一次見到高登文化,真係唔明點解學生報既文章要用到高登既野
    做大組長既原因,九成大組長都唔會係作者所講咁樣
    然而,作者講到所有大組長都係因為咩上位而做大組長
    唔係失實/誤導,係d咩?
    此為失實之八
    (再submit一次先,依然未完)

    回覆
  8. BRIAN

    「輔員

    大組入面又有細組,細組就係同新生最近嘅果炸組爸媽仔女喇。而組爸媽,學名係書院迎新營輔導員,簡稱輔員。因此,唔好以為輔員係邊鬼個,佢就係組爸媽喇。」
    少有既清晰部分,不過流於表面,到底輔員工作係d乜?作者冇講到
    仲好意思講自己係介紹大o用語,我真係唔覺得作者係真心想介紹大o用語,係既話,佢都作得幾差

    「咁你又咪以為組爸媽之間真係好熟絡,因為除左幾個同大組長熟啲嘅core外,佢哋都可能只係五月考試之後先識無耐,中間不斷有輔聚、pre-pre-camp、pre-camp等等各種大組活動,先至監生焗熟,其實同新生差唔多咋。」
    又先從作者話介紹大o用語既層面去睇
    輔聚、pre-pre-camp、pre-camp,以上三個terms全部第一次出現,作者有介紹過嗎?冇
    話自己係想介紹大o用語?你想笑死我呀?
    而輔員之間既情誼,非你地d外人可以理解
    我覺得膚淺極,都唔應該覺得同新生差唔多,誤導性之高唔使我講la
    此為失實之九

    「部

    每個大組,都會分幾個部,負責唔同統籌工作。通常會有節目部、出(版)設(計)部同四七部,有啲仲有camp fire部。」
    唔錯,少有地真係介紹到咩係部,不過都係果句,流於表面,咁多部,佢地做d咩呢?冇講

    「部嘅工作其實都幾因循,上年點整就點整咁,無諗下有咩新嘢搞(聽聞今年新亞有人搞咗個新亞精神部,但係搞成點就唔知喇)。」
    新亞精神部我唔知係咪真係有大組整左出黎,不便多談
    而作者講到上年點整就點整咁,無諗下有咩新嘢搞e句野呢,就真係膚淺到極
    好既野有留低,而每年亦都會有新既元素(就beat黎講,就已經年年組組唔同,點抄呀?)
    此為失實之十

    「每個輔員都會至少隸屬一個部,每個部都會有部主或副部主。部主除咗帶領部嘅工作之外,仲要擔起混熟部內輔員嘅責任,例如搞下較細規模嘅部聚。」
    e個真係寫得最好既介紹部分,難得難得!

    「Dem Beat

    人類學嚟講呢,都係一堆一路嗌一路打beat嘅舞蹈咁啦,媲美毛利族人嘅戰舞。」
    作者賣弄自己既學識我冇意見

    「內容當然都係乏善可陳,以搞笑或霸氣為主。不過佢仲會出現係ocamp以外嘅地方,好似上莊宣傳咁。有啲都幾有特色,好似某內地生組織曾經用上海話Dem Beat咁。但係喺ocamp,Beat嘅用途都係講下粗口諧音寸人,同埋transit之前又dem下咁。」
    e個就係作者對beat既理解? oh my god!錯到呢
    莊既宣傳beat,好明顯就係想宣傳下自己支莊,幾時正咨,幾時投票
    ocamp既beat,搞笑,霸氣係手段,氣氛先至係目的
    作者將手段視為目的
    此為失實之十一
    (再submit一次先,依然未完)

    回覆
  9. BRIAN

    「四七

    四七者,古之七絕也。」
    唔係人人都知道七絕係d咩,更加唔可以用七絕黎比四七

    「不過,今時今日嘅四七句句押韻,仲可以用番邦語言喎,梗唔係杜甫作果啲啦。四七用途只有兩個:一係攻擊別人,一係稱讚自己。」
    四七用途只有兩個?四七用途只有一個,就係氣氛
    作者講既用途,實為手段,膚淺!
    此為失實之十二

    「出沒次數其實無dem beat咁多,基本上只會係大組互片同四院互片中出現。查實,四七咁有文學性,點解唔可以搞搞新意思,例如讚下人、批評下校政呢?」
    又黎la,四院互片係d咩?冇講,又話介紹大o用語???
    四七當然可以用黎批評下校政,請學生報收集好四七再刊登出黎!ed先係你地要做既野

    「互片

    「一齊片片佢!」大組長叫到,新生就記住要對住張「片紙」,照讀上面啲四七喇。大組片嘅同讚嘅都不外乎大組長瘀/威水事或者個人形象,通常新生都唔知做咩;」
    冇錯,新生係唔知做咩,但我做新生果時,都覺得好好笑

    「而四院片嘅同讚嘅都只係間can難/好食或者地理位置咁囉,雖然係台下新生同樣唔知對面嗌緊咩。咁樣片完人,以後就可以有啲「談資」,笑下人哋書院喇。通常片完之後大家又係dem返個書院beat或者中大beat和頭下,之後組爸媽拿拿林收返啲片紙(為咗唔好俾傳媒拎到呀)。」
    黎到e到,終於多到介紹四院會師(唔係四院片lor),都係果句,作者批評既係手段,而冇睇到四院會師既目的,在於氣氛,在於令freshmen更有歸屬感
    此為失實之十三

    「揸攤/頹/格劍」

    唔好意思,我玩左咁多ocamp,冇諗過格劍原來係大o用語
    此為失實之十四

    「組仔女如果覺得上面啲嘢玩下都無妨,不過四日都咁樣,好鬼悶喎,之後表示出一絲鬆懈,唔咁投入都好正常啫。」
    第一,咩係四日都咁樣?你到底玩過大o未?你搵兩日係一樣既比我睇
    而組仔女唔投入,原因有好多,亦不見得正常
    此為失實之十五

    「就係呢個時候,組爸媽卻會將因果倒置,叫你唔好揸(緊時間)攤(抖)、唔好咁頹,要投入啲。仲有,如果一班男仔自己玩,又會被笑為格劍,好似入得嚟就預設咗要結識異性咁,都幾異性戀霸權ga。」
    作者玩既係咩ocamp?一班男仔自己玩會被笑為格劍既ocamp,我未玩過
    入得嚟就預設咗要結識異性,係唔要得既想法,可能真係有人咁諗,但係咪主流想法呢?一定唔係
    此為失實之十六

    「組聚

    又叫re-u,我校則興叫聚。聚係延續ocamp精神嘅重要手段,通常係ocamp之後出現頻率會較密,搵人約係café吹下水玩下game咁。keep到嘅友誼,通常又建基於宿舍啦、莊啦等等新嘅形式,直至下一年大o,大家又一齊玩過癲過。」
    拿,e段呢,就算係正常la,不過組聚就唔止玩既,開學飯,問下大家過成點,都會有

    「編者後記

    雖然玩下玩下,唔聲唔聲,大O其實都傳承住一套玩法想法--就係純粹輕不著地、不問世事嘅生活態度。」
    我承傅既,係對freshmen既關顧,同埋令到佢地唔係放na做first choice都會愛上na既想法,而大組長,輔員應該以身作則,話比freshmen知,咩係大學生
    而唔係好似作者咁講,不問世事
    此為失實之十七

    「之但係,迎新營用咗咁多資源,其實唔係一隻純為玩樂嘅game嚟,但現實居然只有玩同埋玩(新亞雖有探訪老人中心,但係都係同老人家玩下傾下)。」
    現實居然只有玩同埋玩? 大o入面有唔少環節例如na既napoly,係有大學生活game既意義係入面
    唔係好似你所講咁樣,而外訪,當然係同老人家玩下傾下,你期望一批冇經驗既人可以做到d咩義工?
    主要係想佢地知道要負返d社會責任
    又係「但係」e個詞,令人覺得同老人家玩下傾下係negative
    誤導成份真係好高
    此為失實之十八

    「小弟幻想入面嘅迎新營,即使唔係好似十幾年前咁樣關懷國事,起碼都講下人生理想丫。拜託,連少少嚴肅啲嘅嘢都容納唔到,當咩自己係精英(如果係嘅話)。」
    大o夜晚,係會夜話
    而夜話係會同freshmen傾下黎緊既大學生活
    當然唔係個個輔員都會咁做
    但唔係冇lor
    此為失實之十九
    拜託,你連對大o既基本認識都冇,就寫d咁膚淺既文章出黎,當咩自己係精英去做學生報既編輯(如果係嘅話)?
    憑d咩,去介紹大o用語?
    說介紹大o用語,其實貶低大o為多
    此為失實之二十

    冇玩過ocamp既,好容易就會比作者誤導
    憑住以上二十點既失實
    以及作者有意冇意間貶低大o
    我要求作者對所以ocamp道歉
    還ocamp一個清白
    還讀者一個有深度既文章

    回覆
  10. lala

    路過路過

    brian,

    首先回應你對terinology的理解, 我覺得你下下要人講曬所有under that term既野都幾不設實際
    你口口聲聲說作者不是真心介紹, 哎呀, 不是下下都要跟你條進路寫文才是真心咩. 而作者都講到明明白白這個介紹是想帶出一些理念, 講大o 只有玩玩玩娛樂至死脫離社會的做法有問題— 甘都唔係真心? 我真係看不過眼囉你甘屈人法!!!

    還有. 如果你要片你應該片下背後理念,而不是一味technically片字面~ 要不然真的沒有辦法討論下去.

    而且上面說了很多次, 介紹的時候不是為了介紹而介紹, 而是每一篇文章都有一個想帶出的信息, 介紹背後不是假扮客觀的資料提供, 而是有作者的想法. 當中當然會有資料選取 (譬如別人問我今天做了甚麼. 我不會回答起床刷牙拉屎撒尿吃飯上網出街做巴士去唱旺角新世紀七樓唱k喝酒睡覺回家—- 我會回答, 唱k…. 那是因為我覺得其他不重要, 同樣, 輔員的工作在這裡不是作者最想討論的問題, 而是大o 的’永恆’運作中, 輔員的關係實際上市如何, 等).

    回一
    大o 最厲害的地方是他是最大型的迎新camp
    最先入為主, 而且內容貧乏的 occamp
    你想想大o 有咩社會意覺先啦!!!
    講下na 歷史都好啊?
    我係o camp學到了唐君毅但我不知道他後來辭職
    又沒有人講下點解創校老祖這樣做?
    這就是所說的影響力

    回二
    ‘唔該作者講野清楚d,可能uc,cc係由宿生會把持,但係至少na唔係
    而點樣選出黎,好明顯就傾莊傾出黎,點會冇咩人知?’
    brian …. 如果我沒有想錯你是大組長brian.
    我很欣賞你. 不過你都知道NA kyle單野. 唔該看下上文下理的語景先片. 你抽一句來看片錯曬wor.

    回四
    為甚麼只是大組長拿microphone分享
    輔員呢?
    新生呢?
    外訪— 一個在上位者的慈善打飛機形探訪.
    學生會時間— 一個組爸媽鼓勵大家爭取時間睡覺的時段
    夜話 — 問下人拍幾次拖, 玩房game. 有沒有講過社會承擔?

    回六
    同二

    回八
    因為篇幅, 理念, 立場, 寫作策略的問題, 好多時候作者沒有可能寫曬所有關於一個term的東西
    譬如輔員一詞. 作者好明顯是想講的東西和幅員的工作沒有關係. 所以不寫多餘的話.

    回九
    “輔員之間既情誼,非你地d外人可以理解”
    咩外人外人je~ 你講咩?

    回十
    作者講人類學的東西不是賣弄, 是想我們以ritual來理解dem beat的非作用功能.
    希望我們用兩者對讀
    而且看不明白當笑話看都ok啦
    dont be so harsh

    重複: 還有. 如果你要片你應該片下背後理念,而不是一味technically片字面或者人身攻擊~ 要不然真的沒有辦法討論下去.

    此外. 如果有冒犯希望不要上心.
    我是尊重大o, 尊重大組長的. 到現在我都很開心有玩大o, 跟了好的大組長大組和親愛的朋友在一起.
    我只是, 還是很討厭大o 只是玩玩玩, 其他社會點的東西被當成是副品和用嚴肅為原因排除在外

    而且我回得你都是相信你是通達之人, 就如片四七都是看得起對面玩得起
    只是請你好好想想自己在片作者的時候是不是用了太多火氣~~~~~
    而沒有看清楚別人已經回了你很多中了很多point

    但你不仔細又看不到又要繼續重複片d別人已經回答了你的東西!!!!!!


    好累. 先不回.

    新人類二年年都有玩大O的lala上

    回覆
  11. 恕我無心詳細閱讀,但大致把我的觀點重組如下:

    0.高登式用語是本人選取的表達方式,但是否必然等於內容膚淺呢?用四平八穩的公關用語寫出來的,又是否必然文雅?再者,所謂口語其實亦是廣州話的書面語,寫來亦不會比北京話書面語來得理虧。

    1.本人有意把對大O的各種批評在介紹術語中夾雜,是因為語言構造文化,如果要考察大O文化,最方便的肯定是從語言入手。然而,語言並不是有劃一的理解,極端地說,因為每個人都有不同的感官取向,有不同的思路,因此每個人說出的,都是不同的語言。此所以,語言沒有「客觀」「事實」,它必定主觀,而我說出我的理解,只要是忠實真心的,我不認為對任何人構成誹謗。再者,我的理解不曾排除BRIAN您的理解,不是我對則你錯的關係。

    2.我的字眼你大可不認同,但我和你的實質分歧不只在此。要使討論繼續,不如你確立你的觀點,證明大組長絕非因想識多D人,想做領袖(雖然我認為這種心態沒有問題,只是欠了更廣大的意義);或者在識人同玩背後是要推廣更偉大的抱負而我不知。如果是後者,我們大致是同路人。如果是前者,那我真想請教是什麼可以驅動做大組長而沒有這些因素?神召?

    3.本文的核心始終是對大O今時今日的內容的批評。我批評DEM BEAT、友誼和四七等等,從來是針對它輕洞無物。假如它DEM 的是關於新亞理想、崇基精神的BEAT,片的是聯合書院親建制又保守所以要摺埋,我會十分落力參與。我相信,許多人玩完大O後,都難以繼續那些友誼,他們對我的批評不難有同感。在這個永續生態系統中,無想想有多少人留下?到底是他們不投入,還是大O太圍內、太貧乏?

    4.如果可以幫助說服你,我願一提:雖然我用高登語,但我是今年新亞大O的輔員,並不是一個坐而論道的高登巴打。我亦是去年玩過大O的新生。我不見得其他人的理解就比我更權威,除非他真的有若干系統的調查。

    最後,與其在本文糾纏,不如你寫一下大O的安排如何造福新生,又順道回應為什麼大O現在己經很好,不必變革。我相信大學生應該不會怕觀點之間的較量,歡迎你投稿至學生報九月號發表你的意見,大家論辯一下。(可在八月廿號前SEND往: cusp@cusp.hk。)

    回覆
  12. BRIAN

    lala:

    其實我唔介意ocamp加返d社會責任,書院歷史等等既野落去
    以致當napoly要加一個task係扮上半個鐘周會,等freshmen可以睇下d有用既野(至於內容係d咩,我就唔清楚,因為我napoly果陣要走黎走去,冇睇到),我好支持既
    其實係一個好開始,oc提出左,亦得到讚同
    而夜話講既野
    其實我都明白唔係個個輔員都會講大學三年應該做d咩,大學生應該係點
    但係我知道係有輔員會真係咁樣講
    e樣野,唔係一時三刻可以改變得曬

    而點解我會係咁攻擊作者呢?
    係因為作者阿明佢話本文目的是介紹大O的用語
    係佢自己回覆講既
    而我睇唔到佢有好好介紹到大o用語
    講得做介紹我諗點都唔可以太過主觀,雖然唔我反對學生報用主觀風格去寫任何野
    但我想提出既
    係作者一面話以介紹大o用語為寫文動機,另一方面我睇完上文又唔覺佢有好好介紹之餘,仲好有貶低意味
    貶低大o可能係作者目的之一?我唔知道係咪,我係咁覺得
    我亦唔係唔接受人地貶低大o
    只係作者以介紹大o用語之名,實質比我感覺係貶低大o
    而更什既問題係,作者好多野,都唔係反映緊個事實
    你要貶低大o,你真係提出大o有d咩不足之處,我唔會咁大反應去反駁
    我更加會多謝你
    但係作者提出既野,根本好多都唔係提出不足之處
    而係歪曲左大o既一d原有意義(好似輔員之間既感情,比作者講到同freshmen無咩分別,而由此看來,作者冇做過輔員既機會都幾大,所以對有玩ocamp既人黎講,佢算係一個局外人吧?)
    我一直講緊既係作者歪曲左大o原有既意義,可能我寫作方面真係比較差,大家誤會左
    好似lala所講,外訪流於形式化(雖然作者原文都想表達如此意思,但所用方法實在是歪曲貶低之極)
    夜話內容問題
    sharing問題等等
    如果作者係寫ed不足之處,未嘗不可
    但作者話目的在於介紹大o用語,如果有其他用意,不妨直說

    每樣野總會有人鐘意有人唔鐘意,我明白
    而每件事都會有唔好既不足之處,我明白
    我唔係唔接受人去貶低大o
    但係作者用歪曲人地原意既手法去貶低人地
    我係咪有權要求作者更正/道歉呢?
    而作者真係有心寫好介紹文,比freshmen有唔同既層面去睇ocamp既話
    係咪應該做好d功課,理解清楚ocamp一d活動既意義,再作出評論?
    你話我斷章取義
    其實作者何嘗唔係斷章取義黎講大o?
    我只係想作者對失實既部分作道歉
    就係咁簡單

    回覆
  13. BRIAN

    明:

    既然你分左做0,1,2,3,4,咁我就分段講吧

    0
    我唔係話口語寫作有問題,請唔好誤會(仲好,用口語傳神得多,對語文比較差既我黎講仲好)
    所以話我寫作能力唔好,講左咁耐大家都係有誤會
    講多次呀,我覺得口語冇問題呀

    1
    講真,你寫得咁深反而有d難明
    但對你所講只要係真心,就唔怕構成誹謗,就唔太認同
    唔係想話你誹謗左大o,而係想話你歪曲左好多野
    而你對大o既理解,真係咁深入正確?

    2
    你freshmen玩大o,加埋今年玩大o,見過最多12個大組長
    而我,就見過24個大組長
    有12個你係未見過既
    24個人,當中一定有人會係想威而出黎做,我觀察到既,唔過5個
    大家想帶出黎既野,各有不同
    想書院氣氛好d
    想比返個難忘既ocamp freshmen,因為自己係freshmen既時候都有難忘既ocamp
    想na唔再比人覺得頹
    而我就覺得,要令freshmen鐘意na,係首要任務
    只有咁樣,先可以留得住freshmen,起碼下年會有人肯出黎搞
    而留得住佢地個心,自然就會去接觸新亞既野
    比你四日三夜不停hardsell,來得有用得多
    當然係game入面滲到d歷史精神入去就更佳
    而e樣野係一路都做緊
    你見過既輔員,可能係你freshmen細組果5個,加埋今年30個,一共大約35個
    而我,見過自己freshmen既5個,兩個大組既輔員,其他大組但係又熟既輔員,再加今年睇住既輔員
    有百幾個都不為過,已經唔計細o
    佢地可以係pre-camp喊到收唔到聲,可以係正camp因為freshmen玩得唔開心而喊,因為freshmen頹而喊
    咁樣既情懷,竟然比你講到一文不值,只係同freshmen差唔多?
    你今年做輔員做得唔高興?
    有d咩唔開心,一定要同你大組長講,你唔講,邊個知呀?
    而你話如果做大組長原因係後者,我地係同路人?
    咁點解你要講到大組長係為上位果d而做?
    真係唔明你想點

    3
    點解你前言不對後語既?
    你明明係第一個回覆到話:「本文目的是介紹大O的用語」
    而家又變左「本文的核心始終是對大O今時今日的內容的批評。」
    你想連我都昆埋?
    你既回覆,好地地咁講咪幾好lor
    你既文章掛介紹ocamp既羊頭,賣既係批評ocamp既狗肉
    實在係歪曲事實,誤導freshmen
    如果你一開始講明係批評ocamp
    咁樣我唔會話你膚淺
    可惜你口口聲聲話真心唔怕構成誹謗
    但又要掛羊頭,賣狗肉
    前言不對後言
    想唔話你膚淺都唔得la?
    舊年四院會師既時候,我地na都有用到校訓「誠明」作為自讚之口號及道具,你又有冇留意呢?
    我相信好多人既友誼係係大o之後開始,佢地對你既批評係不可能有同感
    而你搞左兩個幾月ocamp,都仲可以寫得出輔員感情係同freshmen差唔多,我相信係你自己個人唔肯接受大o玩法以致唔夠投入之故
    太圍內?你有進入過嗎?你自己問一下自己,唔使答我
    太貧乏?你玩既時候(及後既日子)有冇思考過點解大o要做果d野?真係好似你既文章咁講?
    膚淺!

    4
    可笑可笑
    你係今年既輔員,邊個大組長收你ga?
    都唔講解下大o既野比你聽?
    你如果抱住你文章既諗法去玩大o,不如唔好玩la
    玩得你咁唔開心,陣間影響左d freshmen就唔好la
    你既理解有權威????
    唔好意思,真係笑死我
    以你見既12個大組長35個輔員,有幾權威?
    而且你更加係果d律己以寬 待人以嚴既人
    要寫文批評人既係你,你竟然要求人地去做調查,而唔係你自己去調查完先寫文?竟然要我證明你講既野係錯,而唔係你自己證明自己講既野係正確?
    咩理由黎ga e個?
    以你所謂既權威,誤導freshmen還可以
    你知道我係邊個嗎?
    想說服我聽你既誤導?
    你舊年真係有玩大o?
    NA冇幾多個BRIAN GA姐
    如果你係我果組,歡迎你搵我傾大O,這是我的責任!
    而唔係我果組既,你有興趣都可以搵我傾,冇所謂,當然搵返自己既大組長會好D

    你想我寫大O既安排有咩用意冇所謂
    但我想講既係
    從來冇人話大O現在己經很好,不必變革
    E個係你自己既諗法
    我冇講過,唔好屈我
    大O要變,但係要一步步黎
    唔係一步登天,乜都改曬
    而變更一直都在
    係你自己唔去調查好大O
    就話人地唔變
    實在膚淺

    而你,到而家都唔肯為你歪曲左大O既部分作出更正/道歉
    實在過分
    至少輔員既感情,唔係你講咁樣
    至少大組長,唔係咁膚淺

    回覆
  14. 話人將主觀當客觀,要人道歉真係十分之paradoxical,其實你話人之時何嘗唔係當自己既理解係「真理」(當然,我唔肯定你個主、客觀係乜意思啦)
    不過講起喊到收唔到聲,我記起我睇過national geography channel講北韓既紀錄片入面,都好多人為左金正日喊到收唔到聲,咁當然啦,我諗佢地都唔係好膚淺既

    回覆
  15. 話人將主觀當客觀,要人道歉真係十分之paradoxical,其實你話人之時何嘗唔係當自己既理解係客觀真理(當然,我唔肯定你個主、客觀係乜意思啦)
    不過講起喊到收唔到聲,我記起我睇過national geography channel講北韓既紀錄片入面,都好多人為左金正日喊到收唔到聲,咁當然啦,我諗佢地都唔係好膚淺既

    回覆
  16. BRIAN

    蕭:

    唉,單單打打,有野咪宣接講lor
    真係再講多一次(我就黎好似果個安泰敏廣告,重覆又重覆…)
    作者歪曲左事實
    係咪唔可以要求佢更正返呀?
    而家作者係咪講到佢自己以為既野,就係事實咁呀?
    係咪主觀當客觀呀?
    唔知情人士睇左,係咪會比佢誤導呀?
    係咪咁都唔可以要求作者更正呀?
    我講左二十點失實既地方
    係咪要作者對自己失實既發言作出更正同道歉都唔得?

    你拎金正日出黎比?
    你係咪冇腦ga?
    金正日同ocamp有冇共通既地方?
    你數比我睇下,你有幾咁唔膚淺?

    回覆
  17. lala

    brian啊….brian啊.

    我想最大的問題和分歧是大家常常把’大o要開心變成’法律
    這也是你和明, 和我最大的不同

    我一直都覺得玩大o不是要開心
    而是要他們可以有一個機會想想大學應該怎麼過
    拿回去的是更多的問題, 更多的可能
    而不是一段只是開心但沒有內容的回憶
    也不是讓他們覺得, na精神 = 不頹 = 玩得盡情
    我都喜歡玩
    但如果這是freshman離開大o時唯一得到的東西
    我會很傷心

    上年的大o 係好過以前的
    這我要多謝你和其他oc 大組長的努力napoly是多了一點社會成分

    不過所謂的社會成分只是merely an add-on
    像裝飾一樣, 消費下大家的良心— 我講社會野, 所以我們可以繼續玩
    where 玩accounts for > 80%
    仲要係9玩!!

    你是怎麼理解新亞精神?
    除了不頹以外
    除了新亞六大event以外
    和其他書院
    有. 甚. 麼. 分. 別?

    又是lala敬上

    回覆
  18. lala

    最後你常常說
    作者歪曲左事實

    世界上市沒有’事實’的
    ‘事實只是選取, 是角度與觀點’
    要講幾多次才明白!!!!!!!!

    譬如說我覺得rex CHAN是個型人
    你可能不會同意, 因為你覺得他DEM BEAT HANDICAPPED
    但你不可以否定我的看法
    因為我眼中REX 打麻將的時候真的好型

    (只是例子, 別當真)

    那甚麼是真實呢? 在這個情況?

    你看重他HANDICAPPED的一面, 我看重他打麻將的一面
    然後我們突顯他不同的面向
    我們都沒有錯

    到最後我們要爭辯的已經不是誰是在說事實誰不是了~~
    因為兩者都是事實

    到最後我們要爭辯的是型的定義, wheather 打麻將還是dem beat更能成為型的指標

    等於你和明現在說的都是事實, 只不過是不同的角度
    現在要爭辯的是, 你們角度下的assumption是甚麼導致你們看到如此不同的景象

    我覺得是’對大o 應該如何’, 你們兩個都有太不同的想法了
    如果真的要來一次理性對話

    不如大家講下, 大o 應該如何才叫最好
    不同活動有甚麼意義帶(不)出
    忽略了甚麼, 重視了甚麼

    ————————————————————————–
    而不是brian 你再次用大組長的強權去話明仔講大o 太green.
    好生氣!!! brian你自己想想你說了些甚麼? 用經驗去’達’人
    其實我都ok失望:

    大組長口口聲聲說, pre camp是輔員的時間, 正camp是freshman的時間, 以他們的感覺為主
    現在有人以輔員和freshman的身分講大o的種種問題
    你又要話用番大組長的身位否定說: 你係咩啊, 我玩大o多過你好多, 你講咩阿

    你玩大o 經驗多

    大組長, 論經驗我和明仔都可以收皮

    但不代表玩得少就不能提出批評

    (就等於做不到導演不等於不能評論電影!!!)

    大o 給予的感情落到個人是如此的真實
    你不可以否定我們看到的事實

    你可以屌我們對大o 的assumption有問題
    屌我們對大o的理念啊期望啊不對
    屌我們屌大o沒有社會面向
    屌我們’嚴肅古板’社會lun

    但你不可以用你的經驗嘗試話我們太green
    trying to use this stretegy to 塞住我們的口

    對你好失望.
    大. 組. 長.

    回覆
  19. BRIAN

    lala:

    如果好似你咁講
    我覺得反而得出黎既效果係反面既
    我意思唔係話你做既野係冇意義呀
    而係我想講你既做法得唔到你想要既效果

    我知道唔係個個人都會覺得講社會責任,講書院歷史會係悶既野
    但亦唔係個個人都覺得有趣
    要知道理科同學,好有可能係覺得歷史悶而唔讀文科
    唔可以一概而論,話人先入為主覺得悶就悶

    更什者
    你以為入左na既freshmen個個都係放na係first choice?
    就算放na係first choice,有幾多個人係因為新亞既歷史同埋精神吸引左佢入na?
    係佢地對na零認知零感情零歸屬既情況之下
    就算比你用曬四日三夜去講書院歷史,去播一d愛國既影片(當然e個係以前既手法)
    佢地又會吸收到幾多?
    仲好有可能產生反感
    到時不但收唔到傳揚新亞精神既效果
    反之,更令freshmen厭惡
    你可以承擔e個惡果嗎?

    再講
    如果比freshmen覺得悶,唔好玩既話(我寫包單,9成既理科同學都會咁諗)
    風聲一傳出去
    下年仲有幾多人會玩你個大o?
    仲有幾多人會出黎搞你既大o?
    需知道,報紙佬寫兩寫,都有人受影響唔玩ocamp
    到時有人話比佢地知好悶咪仲大獲?

    迎新營目的係迎新
    係要話比新生知大學生係點既
    係比佢地由中學生過渡成大學生
    令佢地愛上自己書院/學系
    如果你個ocmap,淨係係到講講講
    填鴨咁填滿曬歷史精神比佢地
    講曬社會責任比佢地
    你做到令佢地過渡成大學生e個step嗎?
    又有幾多個會因為咁而愛上新亞,產生歸屬感?

    總括黎講,如果你用曬四日三夜去做講解同埋灌輸書院既歷史精神,同埋社會責任
    你有冇信心做到令freshmen,就算唔係放na係firstchoice既,都會對na有歸屬感?
    你又可以吸引到幾多個year2幫你做組爸媽?
    而你有冇信心keep到一班人下年再搞ocamp?
    reg day通常都會說到好多人由唔玩/唔知玩唔玩大o,變到玩大o
    你又有冇信心sell到佢地玩你既ocamp?
    到時輔員少,freshmen又少,變左個小圈子,又係咪你想做到既野?
    再者,你係新亞生活左兩三年,做左兩三年大學生
    你又有咩理由說服我比你去講解新亞精神比freshmen聽?
    憑你睇曬新亞遺鐸?憑你識得講新亞精神既字面解釋?
    到時,你又係照書讀既話
    點解唔將e個責任交返比有更多資源同埋經驗既書院,去話比學生知書院既歷史同埋精神
    而係要係已經有好多任務要完成既ocamp入面,去用你有限既資源同埋淺薄既經驗,去教導新生?
    陣間你講錯左,講少左野,教導變成誤導,你又承唔承擔得起e個責任?

    迎新既大前提都做唔好
    有咩理由話我聽你既做法先至正確?
    我既做法係差過你?

    我地大o有napoly,大學生活體驗game,明明係好事黎
    結果比人話鳩玩
    有外訪,至少比個idea d新生要負社會責任
    結果比人話做個樣出黎
    有改變la,又話人改得唔夠,唔肯改
    而家唔係我地搞開ocamp既人唔接受加返d社會責任,書院既歷史精神落去
    而係你地得寸進尺
    想要一步登天
    唔肯理解我地原有既野係d咩
    先入為主既係你地唔係我地
    係你地覺得我地鳩玩在先
    覺得我地做黎都冇用在先
    唔係我地唔接受你地lor

    而我suggest既係
    要先留住freshmen既心係書院到(有人曾經話,如果freshmen既歸屬感係大組呀,莊果d,唔要好過,我想講既係,唔通果d野就唔算係新亞書院既一部分?當然,淨係果d係唔夠既,要真係做到對書院先得)
    然後freshmen自己去發掘新亞既歷史同埋精神
    咁樣,佢地既吸收先至會係最好
    當然,係玩既時候,可以滲透到就最好
    因為一路玩一路學係最快既方法
    而e樣野的確係做緊

    我地同其他書院最大既分別,除左會外訪之外,就係我地唱既校歌
    學識歌詞,可能係個ocamp入面已經搞掂
    你要學識點解,你用三年都搞唔掂
    而ocamp係一個開始
    由一句「珍重珍重這是我新亞精神」做開始
    慢慢一步一步咁,等freshmen接觸新亞
    開始愛上新亞
    你要做既,係燃起佢地既興趣,唔係嚇走佢地

    如果你有信心你既做法,係可以吸引到freshmen去參加你個ocamp,係可以令到下年繼續有人傳承你既做法既話
    你大可以自己開一個ocamp出黎
    唔好拎經過咁多代人苦心經營既大o,慢慢係到改變緊既大o去較飛

    記住freshmen參加ocamp既主要原因,係因為想玩想識人
    e個係事實,冇得講既
    如果你連佢地想要既野都冇,你仲想吸引佢地黎參加?
    仲談何傳承呢?

    回覆
  20. BRIAN

    lala:

    我讀既係enginne
    我用緊既,一路都係1+1=2既真理
    我一路學既野都係如何去證明一條理論既真碓性
    所以你同我講 「世界上係沒有’事實’的」
    我點可能接受你e個諗法?
    你可以有另一個角度與觀點,去話我聽,1+1其實唔等於2咩?
    你有既,你可以去發表論文la

    而家係明佢話「不見得其他人的理解就比我更權威」
    玩左兩年ocamp都未夠
    憑咩講自己有權威?
    prove it!
    係佢話想說服我ga,用佢所謂既權威
    唔係佢講到咁樣,我使唔使拎自己d經驗出黎講?我之前有冇話過自己係大組長?
    掉返轉頭話我拎經驗出黎達佢?
    係佢拎佢淺薄既經驗出黎達我先ga大佬
    咁樣話返我轉頭,真係比你吹漲

    我淨係知道
    做大組長唔會只係為左上位咁膚淺(有9成既大組長,已經上曬位la,又p,又部主)
    輔員既感情亦唔係好似freshmen咁(而freshmen既感情其實亦不見得薄弱)
    成篇野我講左廿點失實
    到底作者肯唔肯更正呢?
    要記住,作者係用介紹大o用語黎批評ocamp
    freshmen見到實比你誤導
    係咪咁都唔可以更正/道歉?
    我要求既野好過份咩?
    我一開始就用經驗達人咩?
    邊個講錯野?
    邊個達人先呀而家?

    回覆
  21. 25仔

    這是我幾個月前寫落既文,Brian哥,你得閒可以回應下,猶其係第2 part。

    略談大O 能有什麼「意義」

    我們常說「玩」大O、「玩」大O,無可否認地,「玩」對於大O來說,絕對是十分重要的基礎,但大O的意義又是否駐足於此呢?當問到這個問題時,很多滿腔「理想」的人便會挺身而出,高呼大O不應該鳩玩完便算,應該有更深層的一面,是一個載有意義的活動。

    可是,所謂「大O應載有意義」,究竟是什麼意思呢?大O這個活動究竟可以載著什麼樣的意義呢?那些滿腔「理想」的人大都沒有對此問題作出反省、作出思考,以致對於大O的「深入」討論,通常便會就此打住,所謂「大O應載有意義」,仍是一句沒有內容的口號。

    當然,很多新亞人都是為大O出心出力的人,而他們的魄力亦絕對教我佩服。但我想指出的是,什麼是一個有意義的大O,不可以是一些未經反省而又被濫用的口號,我們可以高呼搞好大O,但這必須建基於反省的基礎之上。

    我認為,「大O應載有意義」絕對是一個值得我們追求的理想,但要回答大O應載有什麼意義的問題,則不能夠獨立地對大O作出反省便能回答得到。一種理想大O的想法,必需建基於一種理想書院的想法之上。對大O的意義的理解,必須建基於對書院的意義的理解之上。

    可惜的是,書院的意義比起大O的意義卻更加少比人提及到,而那些滿腔「理想」的人卻常常高呼「搞好新亞」等口號,但這個所謂「好」同樣是空的,沒有內容的。

    書院並不是一間獨立存在的機構,而是作為一種附屬於大學一教育機構的制度。所以,書院的存在意義,必然與教育有關。

    大學教育能夠為我們提供的是各式各樣的專業知識,但這些專業知識並不是我們應該學、應該了解、應該反省的全部。而書院制正正在此發揮它的作用,它能夠把龐大的、人數極多的大學生分成較小的組織,促進人與人之間的交流,從這些與人的交流之上,學習到、了解到、反省到在大學教育以外的東西,老土點說,便是在交流之中成長、多了解自己、了解世界、反省人生等等。

    當然,書院本來還擁有教學的自主性,能夠結合形式教育(現由大學負責),和非形式教育(現由書院負責),真正做到求學與做人的齊頭融合,這是宋明以來的書院制背後的一套教育理念。但自聯邦制以來,中大的書院能負責的,就只剩下非形式教育了。

    其實,這也說明了增強對書院的「歸屬感」有何意義。因為當我們空泛地說為新亞好的時候,很多時那個空泛的「好」,總會連繫到對書院的「歸屬感」。而這種說法隱涵了「歸屬感」具有內在價值的意思。但我認為,「歸屬感」只是一種裝著有內在價值的迷思。我們設想下全新亞的人都對新亞書院很有歸屬感,院慶、新唱、新亞夜、這一切吃吃喝喝的活動,全都空前盛況,全新亞都不再有「頹」友、「摺」友,達到一種「中大四院我稱霸」的境界,但又如何呢?或許在整個「歸屬感」的氣氛堆砌和渲染底下,新亞人會感到喜氣洋洋,但這真的足以成為「歸屬感」內在價值嗎?

    我認為,我們應該把對書院的「歸屬感」,當成是一種工具,對「歸屬感」的追求只為了更高的追求,而那更高的追求便是上述所說的交流。當新亞人對新亞書院有「歸屬感」,他們才會參與新亞的活動,才會多留在新亞書院,才會有機會出現人與人的交流,才會彰顯示出書院的意義,否則,書院於他們來說,只是一個在畢業證書上出現的一個名字而已,而未能獲益於書院提供的非形式教育。

    所以,大O正是一個工具,透過遊戲、認識新亞朋友,去提升對新亞書院的「歸屬感」 (不論是freshmen或non-freshmen),最後彰顯出書院的意義,各自在其人生中成長更多。當我們表明了書院的意義後,大O玩的部份才會有其justification,因為這些東西可以有助freshmen的友誼的提升,從而達到我們的最終目的。

    說到這裡,仍只停留於generally,書院和大O有什麼意義。Specifically,新亞書院和新亞大O有什麼意義,還可以再加說明。

    如上述所言,書院的存在意義是是在大學的專業教育以外,提供另外一些我們需要反省和學習的東西。而新亞書院,本來就已經一個極大的優勢:它是一間由一整套精神價值支撐著的書院。

    所以,新亞書院除了可由促進人與人之間的交流此進路去實現書院的存在意義外,更可直接以教導新亞精神去實現書院的存在意義。

    既然新亞書院能直接以教導新亞精神去實現書院的存在意義 (我想這是聯合、逸夫、什至其他大學的各種組織所不能做到的),則大O也必須相應地安排關於新亞精神的環節。若無這些環節,新亞迎新營還配什麼稱上「新亞」迎新營,現在的玩法跟祟基、聯合、逸夫有分別嗎? 什至,跟城大,理大的玩法有分別嗎?

    總的來說,這是我理解大O能夠承載的意義。

    ——————————————————————————————————————–

    駁「大O玩左先講」論

    當我,或其他人試圖說服各玩這種「鳩玩型大O」「長大」的人,大O應該賦予更多教育意義時,他們最常出現的一種論調是:

    你一開始就講D禁嚴肅既野,實嚇走晒D人喇,嚇走晒D人,無人想留係書院,就講咩都晒氣喇! 新亞大O,玩左先講,玩完,佢地玩得開心,肯留係書院,自自然然就會去了解更多個書院架喇!

    對於這種論調,我有三點回應。

    第一,嚴肅話題等於悶,等於會「嚇走晒D人」,這種想法未必太過悲觀。作為社會裡的精英,社會裡非多數能接受高等教育的人,竟不能在四日三夜「鳩玩狂歡式的慶典」中抽一點兒時間去聆聽、討論較嚴肅的話題,我想這未必太低估香港的大學生,或者,至少是太低估中大的學生吧。

    第二,當大O令新生愛上書院,他們「自自然然」會了解書院的精神,這個「自自然然」在我眼中卻毫不自然。有幾多人會因為玩完大O,會去細看新亞校歌的歌詞,會去拿起新亞遺鐸掀過幾頁? 以我為例,至少我沒有,即使我在兩年大O中都玩得很開心,享受這種「鳩玩狂歡式的慶典」,但我也沒因此而增進我對書院的任何理解。再舉一更強的例子,書院的雙週會,唱校歌時,有幾多人懂得唱畢全首? 而當中又有幾多是玩過大O的人,什至是大O的中堅份子?拜託,這個「自自然然」是何等荒謬啊!

    第三,我不單至認為這「鳩玩狂歡式的慶典」不能「自自然然」增進學生對書院的理解,什至會出現反效果,窒礙學生對書院的真切了解。迎新營是新生第一次真正接觸大學、接觸自己書院的地方,迎新營可謂提供了一個書院的First impression予新生。而我們也十分清楚First impression對於一個人如何理解某東西(或某人)的影響是十分大的,換言之,迎新營對新生如何理解自己的書院有很重大的影響力。現在的新亞迎新營以「鳩玩狂歡式的慶典」的一面示人,則令新生皆誤以為這一面就代表了自己的書院,可是,這一面其實完全和書院的真面目南轅北轍! 他們還會因這虛假的一面,而說自己愛上了新亞,最後堅持這一面才是書院的真面目,還要求人傳承下去! 這也無怪乎書院中的中堅份子會流傳著各種可怕、畸形的說法,如:新亞精神就是不頹不摺,積極參與新亞大大小小的活動、新亞書院的獨特處就是新唱比人搞得好。天啊! 迎新營是何等嚴重地荼毒學生的心智呢!

    回覆
  22. BRIAN

    25仔 :

    「鳩玩」E個TERM,我YEAR1果陣真係未聽過,直至我YEAR2第一年做輔員既時候,依然冇人提出過
    直到我升YEAR3搞大O果年,先第一次聽到
    點解會咁呢?
    唔通我YEAR1既大O唔同?
    YEAR2既大O先至比人覺得鳩玩?
    我諗,係同多左人關心大O有關

    係我YEAR1入黎之前既OCAMP,大組長只有四個,OC只有十個,輔員依然每個大組三十個(四個大組合共一百二十個,比現在六個大組合共二百個,少左三分一有多)
    再舊D既我就真係唔知
    講返個人數
    大組長由四,變六,再變到多過六個人想做
    輔員由一百二十,慢慢去到而家既多得滯,有D人可能做唔到
    OC就由唔夠十個,到而家既可能二十個
    鳩玩E個TERM,就係最多人參與大O既時期出現左
    點解以前冇人話鳩玩呢?
    講緊都係四五年前
    唔通果陣唔係咁樣既形式?
    果陣既形式,同而家其實係一樣,只係內容唔同
    咁又點解冇人話鳩玩呢?
    好老實講,正正就係由大組長四變六開始,新亞既活動多人留意左,多人參加左
    新亞學生會亦都打破三年一莊既命運,變成三年三莊
    正正因為比你地講到真係鳩玩既大o,吸引左新亞人留係新亞,參加新亞既活動
    而正正就係多左人留意,連覺得大o鳩玩既聲音亦開始出現
    你話,如今大o既形式,有冇助令同學關心新亞?對新亞產生歸屬感?
    答案係肯定既

    係我回應你果三點之前,我諗先要介定ocamp既功能
    一: 令freshmen知道咩係大學生。其意義在於令佢地明白大學生唔係好似中學生咁樣上堂落堂又過一日,起碼一樣野要知道,係要放膽去做,放膽去試,要自己做主。
    二: 令freshmen由中學生過渡成大學生。至少先令佢地有大學生既自覺。
    三: 令freshmen對自己書院/學系產生歸屬感。講白d,係令佢地覺得自己係新亞人。
    三個主要大功能之下,仲有幾個小功能。
    1: 比個機會freshmen互相認識。起碼開學後有d咩想搵人傾,可以搵到輔員,有d咩想問,可以問下組mate,唔使乜都唔知乜都唔識。
    2:知道一d要知道既事。reg周會,上書通,有人提你,好過自己過左先補救。
    仲有好多好多既野,唔細講

    好la,而家回應你既三點:

    我唔知你讀咩,我想話你知既係,我讀理科,十個有九個都會覺得所謂社會責任等等既嚴肅話題係好悶
    喂,而家講緊既係成個書院wor,唔係單一department wor
    你估個個都鐘意聽歷史ga?
    點解咁多人話悶既時候,你仲咁有信心我地精英freshmen會唔覺得悶?
    我想提一提你呀,na大o係有新亞學生會時間ga(以前有中大學生會時間,而家冇左)
    結果唔係比你隻字不提咁帶過左,就係比人話d人冇心機聽
    唉,係你唔用心去留意大o既活動定點呢?
    你想「抽一點兒時間去聆聽、討論較嚴肅的話題」
    有ga,新亞學生會時間,比曬學生會做咩都得,講咩都得
    點解你講到好似冇咁既?
    而咁樣抽時間講嚴肅話題既效果係點呢?
    freshmen聽就聽左la(訓既只會係好累既輔員)
    過左大o,唔使一個月就唔記得曬la
    面對現實好嗎?
    我地係大學生,但唔係大家都讀政政/歷史ga
    有幾多個精英freshmen,會比心機聽你講完一大論佢冇興趣既野,又記係心入面呢?
    所以你所提議既方法
    一來唔係新野,已經做緊
    二來作用根本不大
    現實同你既理想,係有分別
    請你先接受現實,再做理想,好唔好?


    你話我既理論荒謬?
    你既理論何嘗唔係天馬行空?
    如果連對新亞都未有感覺
    任你點樣去填鴨填曬新亞既歷史精神比佢地
    又有咩意義?
    對佢地黎講,只不過係一d歷史資料,聽完就算
    會有人放係心到嗎?
    如果強迫性咁要佢地讀要佢地知
    一定會有反效果,令佢地厭惡新亞


    你無限上綱得好嚴重
    而家邊個新亞既學生係到講「新亞精神就是不頹不摺積極參與新亞大大小小的活動、新亞書院的獨特處就是新唱比人搞得好。」?
    你又黎玩e味野呀?
    第一,咩係「書院中的中堅份子」?
    你指既係大o oc?大o 大組長?定係NASU???
    第二,「流傳著各種可怕、畸形的說法」
    請問你用到流傳,咁即係真定係假呢?
    係你自己聽到當時人咁講
    定係你既唔知咩朋友聽阿唔知邊個信得過既人講阿邊個話GA呢?
    請拿出有力證明,你所講既書院中的中堅份子,流傳著你所謂既可怕、畸形的說法
    如果你SHOW唔到既,一係,你收錯風,一係你惡意中傷
    我就從來未聽人咁講過
    我強烈要求你明言,係邊個新亞學生口中講出黎,而你又係邊到聽返黎
    否則,請你更正/道歉!
    如果你真係以咁樣既手法同埋態度去寫學生報去評論人地
    真正荼毒學生的心智既人,係你LOR

    回應完,我有第四點想講下

    點解要問新亞OCAMP同人地有咩唔同?
    仲要扯到其他U黎講呢?
    講到好似真係冇分別咁
    你又講唔講得出POLY,CITY,HKU果D OCAMP係點呢?
    點解我會話你膚淺?
    你由頭到尾,都收埋左新亞同人地唔同既野唔講
    外訪!
    新亞係有外訪!
    咁特別既野,你一句都冇提過
    外訪,就係大O要新生負社會責任既地方
    你又有冇留意過呢?
    成日口口聲聲話外訪只係形式化,冇用
    轉頭仲要話新亞大O冇野同人唔同
    喂,你有冇另一個要FRESHMEN負返D社會責任既好方法,比外訪好?
    有既請你提出,唔好一味係到講外訪好形式化就算
    仲有就係,明明有野同人唔同,你又點可以話冇?
    對於唔知新亞有外訪既人,唔係比你誤導左咩?
    (拿,有外訪E個係事實,你唔會話你有另一個角度與觀點,講到有第二個事實掛?)
    你話大O鳩玩
    計我話
    話大O係鳩玩既人
    根本係到鳩講
    一來講既野冇建設性
    二來又將大O有既野收埋唔講
    仲記得我提出大O既功能之一,係要FRESHMEN放膽做,放膽試嗎?
    係咁多人面前要佢做D奇怪野,除左係玩,就係要佢放膽試
    好多人中學時期都未做過未玩過OCAMP做既野玩既野
    E樣亦係令FRESHMEN放膽D,自主D既一個做法
    而更深層次既係,比FRESHMEN係玩既時候,建立起友誼
    ED,都係玩背後既意義,你又有冇留意過?
    所以點解我成日話係玩既時候又加埋D歷史精神入去就最好?
    因為玩背後係有好深層既意義係到
    唔係咁膚淺,「鳩玩」!

    BY THE WAY,唔知你肯為你既失實同埋誤導去更正同道歉未呢?作者?

    回覆
  23. lala

    1+1=2?
    這個只是因為你給了1 and 2 一個fixed definition
    只是o camp terms 的definition是多面而且多變的
    這個情況下1 + 1 就不等於二了

    我不用發表偉論
    已經大把人發表
    不如你讀下後現代主義對”客觀現實” 一詞的批判?

    1+1 = 2 only works in a closed system, like mathematics
    but not like in reality, where it is an opend system.

    回覆
  24. lala

    令freshmen知道咩係大學生。其意義在於令佢地明白大學生唔係好似中學生咁樣上堂落堂又過一日,起碼一樣野要知道,係要放膽去做,放膽去試,要自己做主。

    haha …你以為大O真的沒有指向嗎?
    又不見你叫D freshman嘗試下衝擊畢業典禮?
    卻一味叫D freshman嘗試不同的NA jong — 又不叫他們嘗試下搞社運?
    咩放膽去試, 扮到開放, 沒有指向
    其實是極權wor. brian

    至少先令佢地有大學生既自覺。

    請說說自覺的內容!!!!!!!!!!!
    不要迴避, 回答我.
    自覺要點, 點同點
    自覺是大學生所以天之驕子還是點!!!
    or else this is just a slogon

    令freshmen對自己書院/學系產生歸屬感。講白d,係令佢地覺得自己係新亞人。
    tell me what is 新亞精神!!!
    告訴我! 不講歷史你講咩精神! 講咩新亞人!!

    而且對接受現實的指控
    不如你看今天萬言書李智良那文章

    還有其實我freshman一直都希望係大O有說說歷史
    好可惜沒有講到

    大佬, 不是个个都喜歡歷史
    也等於不是个个喜歡玩
    所以到最後已經不是喜歡不喜歡
    而是應該不應該

    講社會野講到變左add on而不是重點就係犬.儒.

    而說歷史也不一定沉悶
    玩也不一定只有這個方法!!!!!

    回覆
  25. BRIAN

    LALA:

    第一,我冇迴避過任何野
    反之,我講左咁多野,除左回應到既比作者同埋你回應左之外,未回應果D又點計呢?
    你話我用經驗達作者
    而家你又隻字不提係作者想用佢既經驗達我先?

    第二,你話1+1=2係用係CLOSE SYSTEM
    咁作者所謂大O控制左宿舍呀,控制左上堂呀,好似唔係事實LOR,你可唔可以回應下我提出既第一點失實呢?
    咁好簡單既外訪,NASU時間,比作者講到冇ED野咁
    喂,FACT就係FACT,唔通你有得講到冇?

    你以為大O冇人介紹過NASU?
    咁何來可以三年三莊?
    再講
    OCAMP責任係叫FRESHMEN知道中學生同大學生既分別
    唔係要佢地跟你果套去做(叫佢地上莊,都係勸既形式)
    如果你話介紹NA既莊比佢地識係極權
    咁你叫人參加社運又係唔係呢?
    而且OCAMP冇指向性
    咁即係完左四日三夜就完左,唔再理FRESHMEN
    冇指向性先真正係一個鳩玩既OCAMP
    之前,又係你話OCAMP唔應該鳩玩(而事實玩既背後係有好多意義係到)
    而家你又批評OCAMP有指向性係極權(其實冇指向性先至係鳩玩)
    喂,到底你想OCAMP鳩玩,定想OCAMP有意義?
    愈睇就愈唔知你想點
    好似有D為批評而批評

    大學生自覺,好簡單,我玩OCAMP之前,對大學既概念同中學差唔多
    上堂–>考試–>PROJECT
    讀好書,GRAD左就搵野做
    玩完之後
    大學生唔應該淨係讀書
    有好多野可以做
    E個係心態上既改變
    知道大學唔係得讀書一樣野

    你應該知道,
    FRESHMEN係入左中大,先再選書院(仲要係按成績高低黎分派)
    喂,我拎左學生證,知道我入左NA,除左好高興入左FIRSTCHOICE之外,一D感覺都冇
    直至玩完大O,先感受到自己新亞人,係新亞書院學生
    你叫我係大O之前睇下咩係新亞精神,我真係彩你都傻
    玩完大O,我先開始有興趣睇下,有興趣聽下新亞既歷史
    講左好多次
    歸屬感都冇,你叫人點會有心機聽你講歷史精神?你回應一下好唔好呢?
    再問你一次
    你憑咩可以係新生面前講新亞精神?
    你講錯左咪誤導曬?

    喂,我打左咁多字出黎提出問題同意見
    次次唔係作者話自己冇心機睇曬,一係就POST返之前打落既野出黎
    一係你就叫我睇人地既書
    你冇自己既意見咩?
    現實係好多人唔再尊師重道,唔鐘意聽歷史
    你叫我睇人地既文章?話我拎經驗達人,你咪又係到拎D學者講既野黎達我
    今次到我講,我冇心機睇LA
    你要用人地既野,你就講出黎
    打字唔係咁辛苦姐

    唔係個個鐘意玩?
    好LA,我當係
    但我想講,鐘意玩既人一定多過鐘意歷史既人
    玩OCAMP既FRESHMEN,都係想識人,想玩
    唔想玩既人,係唔會JOIN OCAMP
    你咪整個填鴨性既歷史CAMP出黎,睇下做唔做到你想做既野LOR

    講社會野,淨係識用把口講
    is it just a slogon?
    話左同玩慢慢融合緊,都講過話係有時間會講
    你又話冇做,又話冇用
    為批評而批評,實為腐儒
    而相信冇乜邊個搞OCAMP既人,會話自己係儒士

    冇錯,玩唔一定得一個方法
    係可以融合埋歷史野落去
    我講過
    淨係用把口講,係冇用
    不如係玩既時候加入歷史精神既元素
    得到既效果會更佳
    我提出左咁多野
    唔該你唔好迴避, 回答下我LA,好冇?
    唔好再拎D書出黎達我LA
    大O有既意義,比你講到冇意義咁
    唔該你回應下,係有咁多重意義下既大O
    仲係咪你地口中所講既「鳩玩」?

    我唔想用POINT FORM咁寫我既提問出黎呀
    唔該你,同埋作者
    唔好應D唔應D
    次次都要我講多次

    而作者肯道歉未呢?
    失實點共二十
    請作者尊重下讀者對你既提問好WOR
    視而不見
    仲好意思係FACEBOOK叫人黎睇你既文章,叫人回應討論一下?
    不如唔好整個留言區出黎LA
    留左作者都唔睇曬既

    回覆
  26. lala

    鼓勵你把這20點整理好send給報社投稿
    口語書面語皆可
    什麽形式都可以

    就讓大家來評評理吧

    控制上課那些,如果你有看inception你就知道,是植入形式的
    因為他們根本沒有對比,一個談歷史談理念的大學生活是如何
    得到的卻是有人告訴你要積極…for fucking things you dont understand where to stand.

    並不是失實,只是觀點角度不同,線也畫得不同
    並不需要道歉

    o camp我重申
    是要有指向
    我討厭9玩
    更討厭指向膚淺的ocamp
    只是我在ocamp從來沒有得到其他生活的想象
    除了上jong, 玩活動, 不要頽廢,
    還有沒有其他的生活想象?
    沒有

    什麽是新亞
    新亞精神是什麽
    沒有人告訴我
    有歸屬感才認識歷史
    那這不知道建筑在什麽的歸屬感,和現在中共的patriotic education又有什麽分別呢?

    到最後如果他們因為新亞的理念而不喜歡新亞
    我覺得沒有問題
    最後的是,要知道,新亞是什麽
    而不是虛無的新亞精神,於是新亞有一天你沒有認識的人和建筑就好像不知道什麽是新亞

    請投稿吧,還是你想我們quote你的文章?
    也歡迎你來報社
    即場辯論
    約個時間?^^

    回覆
  27. BRIAN

    投稿並唔係我打咁多字回覆既原因
    而辯論亦無助於OCAMP發展

    真正令我打咁多字留COMMENT既原因
    係作者既文章的確有好多失實既地方
    而用一句植入,就可以推翻所有我提出既問題?
    我再問多一次二十點
    係E到答返
    最好係作者答,因為本來就係同作者講既

    一:控制到上課情況
    可能你會覺得,周會,書通既時候,大O既同學一齊坐,成日係到傾計,嘈住人(作者點諗?我唔知)
    咁都係影響到上課,同控制有咩關係?
    再講,就算唔跟大O坐,跟返自己朋友坐,咪又係會傾計,唔好賴左係大O到
    周會,書通既內容,都由書院決定,大O如何控制住?
    請解釋之
    你既講法植入,完全唔關大O事,就算係,都係書院植入左,點會係大O?

    二:支配宿舍生活
    其實NA既大組長,以我所知既24個人入面
    只有8個人係曾經既宿生會莊員
    而大O完左之後,亦唔會有大組全部入曬一個宿舍/上曬一個宿生會
    宿舍活動更加唔係靠大組支撐
    何來支配之有?
    又植入左D咩?
    比你既角度我睇下,大O係點樣支配宿舍?

    三:扮熟
    我見唔到有D咩人會扮熟LOR
    你既角度見到D咩呢?
    有冇證據支持你呢?
    說話,係作者講出黎,唔該自己PROVE返自己講既野
    唔好叫我PROVE呀
    我就係唔知道會有人扮熟

    四:閉幕之sharing及隻字不提外訪、學生會時間、夜話問題
    拿,作者就講到四日三夜都係玩,我就再講講
    首先想問問作者知唔知道有學生會時間?
    自問FRESHMEN時代係有比心機聽,可惜除左宣傳NASU果PART之外,咩都唔記得
    作用大唔大呢,我就覺得唔大,亦因為咁我覺得鳩講歷史精神既OCAMP都係作用不大
    姑物論其作用,佢的確唔係一個玩既時間,作者點可以話冇?(作用唔大,唔等於冇,你有你既角度,我知,但唔好用一個視而不見既位黎睇,OK?)
    外訪,就係要FRESHMEN負社會責任
    你個咩角度咁多盲點,可以睇唔到外訪既用處,SHOW比我睇下?
    夜話,就真係睇下個輔員有冇心機同埋時間
    問下FRESHMEN想過一個點既大學生活
    唔係個個都做到,但唔係冇人做到
    喂,好心你睇野既角度闊D得唔得?
    閉幕sharing,真係好有問題?
    又要話人鳩玩
    好LA,人地有SHARING既時間,又比你話有問題
    你講曬LA好冇?

    五:大組長,oc,同輔員,地位問題
    有分高低地位既諗法,已經係有問題
    大家都係想迎新,冇話邊個高,邊個低
    作者講到大組長咩一人之下,萬人之上
    錯了

    六:大組長由宿生會把持問題
    大組長並唔係由宿生會把持
    冇野會把持住
    END

    七:貢獻問題
    所指貢獻係對學生活動既貢獻
    作者解錯左
    仲唔係失實?

    八:做大組長既原因問題
    作者講到大組長之所以做大組長係想上位/識人
    NO
    作者錯了
    大家都係有抱負先出黎做大組長
    用你既角度睇黎講唔係咁既話
    咁係你睇錯左
    事實唔係咁,點解可以有第二個講法?

    九:輔員之間既情誼
    唔係你講咁,同FRESHMEN差唔多
    作者誤導曬

    十:大組工作抄上年問題
    形式係一樣,內容唔同
    作者講到一模一樣,實為誤導
    舉例
    以前未必有TRANSIST BEAT
    而家有
    已經係唔同左
    黠樣同以前一樣呀?
    由冇變有
    已經係變左
    點會係冇諗下有咩新野搞?
    咁仲唔係失實?

    十一,十二,十三: BEAT/四七/四院會師既用途問題
    為氣氛,為團結
    作者講到為串人
    失實

    十四:大o用語問題
    作者所講,我真係未聽過
    請證明比我睇作者謂既真係大O用語

    十五:話大O四日都係咁問題
    四日其實都唔同
    作者又一次無視外訪,學生會時間

    十六: 心態問題
    作者玩既係咩ocamp?一班男仔自己玩會被笑為格劍既ocamp,我未玩過
    入得嚟就預設咗要結識異性,係唔要得既想法,可能真係有人咁諗,但係咪主流想法呢?一定唔係

    十七: 不問世事生活態度問題
    唔好掉轉頭要我PROVE你講既野係錯
    野就作者提出既
    唔該請你提出論據支持
    不問世事?
    好多中大人新亞人都關心社會時事,同時亦有玩大O
    咁大O點樣傳承住一套純粹輕不著地、不問世事嘅生活態度?
    請證明之
    否則,請道歉

    十八: 純為玩樂問題
    第一,玩既背後有好多意義
    第二,一班冇經驗既義工,除左可以同公公婆婆玩,仲可以做咩?而玩又有咩問題?陪老人家玩,令老人家開心就唔
    負緊社會責任?
    真係點睇都睇唔出點解做義工都要話到係NEGATIVE既野,除非作者係為踩而踩

    十九: 夜話問題
    之前提過,唔再多講

    二十: 說介紹大o用語,其實貶低大o為多
    要介紹,又介紹得唔好
    要貶低,又唔根據事實黎講,以意創造,制做假象,誤導讀者(嗯,我知有聰明人識得分,但都有心水唔清既同學)

    今次係我第二次將我要求作者回應既野寫出黎
    作者可唔可以回應一下呢?你回應到我講唔出野既話,我收返要你道歉既要求

    而LALA,又可唔可以回應我所講,玩既背後有既意義?
    指向膚淺既OCAMP?
    話比FRESHMEN知大學生活有好多選擇,都叫膚淺?
    其他的生活想象?
    你想要咩生活想像?
    迎新營目的係迎新,唔係教仔

    不知道建築在什麼的歸屬感?
    令FRESHMEN覺得自己係新亞書院既學生,都有問題?

    我唔係怕FRESHMEN因為新亞的理念而不喜歡新亞
    我怕既係
    因為
    你太HARDSELL新亞既野,所以佢地唔鐘意新亞(所以我支持用玩既形式去講)
    新亞係D咩,新亞精神係D咩
    我唔想人鳩講,亦唔想FRESHMEN淨係鳩講唔識實踐
    我唔要一班淨係識得鳩講既FRESHMEN

    你要批評大O冇問題
    請BASE ON事實黎講
    唔好咁片面
    亦唔好誤導人

    辯論冇助OCAMP發展之餘,我亦都覺得好難同一個可以話一個事實點講都得既人辯論
    恕我冇辯才

    觀點角度不同,線也畫得不同
    觀點角度可以唔同
    但係大O既線一早畫左係到
    你重新畫過一條黎講,即係失實LA

    回覆
  28. Mdvn

    我是個玩了今年大o的Freshman,看過文章及一些回應,才明白到自己在大o中感到的不融和、不合時宜等,其實並不是如某些組mate/組爸媽般說的是不願投入/不認真/內向慢熱。這些文章令我對在大細o中的種種感受的根本豁然開朗,實在是令我得益良多,謝謝學生報、作者及各位解我困惑。可惜是晚了及撞了組聚時間,否則我也很想去一去學生報O中見多一些抱有多角度思考的人呢。^^

    回覆

Leave a Reply

Your email address will not be published.