走上苦讀之路

文：酒毒身

大學入面有兩種人，一種叫宿生，一種叫走讀生。同人唔同命，宿生手握的鑰匙，唔單止打開宿舍大門，亦通向一種多姿多彩嘅校園生活。相反，無呢條鑰匙嘅走讀生，大學生活分分鐘差宿生幾皮。點先可以做宿生？好簡單，住得夠遠就得喇。不過，如果你今年入唔到宿嘅話，嘿，睇怕將來想翻身都幾難。走讀生點慘法？點解我地升極都升唔到lv？下面同你一一拆解。

我地之所以叫做「走讀生」，係因為我地真係居無定所，走住嚟讀架！朝早要迫校巴喇，空堂要搵訂HEA喇，一放學就返企，同中學差唔多。宿生呢，佢地經常短褲踢拖，拎份NOTES就去上堂。空堂返宿瞓陣，換埋PE衫先去UGYM都仲得。

住宿果種方便，其實唔淨止返學快啲、可以瞓晏啲、有個地方擺野咁簡單。對你嚟講，校園可能只係課室圖書館加飯堂。對佢地嚟講，校園就似一個社區，一個小鎮，有住宅區、有上班的地方、有消閒娛樂的好去處、亦有醫療等社區設施。宿生因為具有「宿舍」這個方便就腳嘅物質優勢，對於校園空間的使用一定比走讀生好得多。我地會覺得，校園係「返工」嘅地方，屋企先係住嘅地方。對宿生黎講，校園就係住嘅地方，返屋企反而係應酬父母嘅「例行公事」呢。宿生和走讀生過的，是兩個完全不同的校園生活。

沒有宿位的逸夫同學，除了考IT TEST之外還會上幾次shaw？不用說逸夫，主要在CC上堂嘅聯合走讀生無啦啦都唔會上去百全堂（UC嘅走讀生舍堂）喇？當書院唔再和學科有關時，學生和書院嘅薄弱連繫除左書通、獎學金之外，就只有宿舍了。少在書院地域出現或流連的走讀生，自然傾向疏離書院。

書院活動大都在晚上舉行，對於走讀生來說，參與的意欲實在不太高。如果下午沒有課堂，但你想參加夜晚的某個活動，咁你一係返屋企坐兩三個鐘再入中大，一係就在碩大的校園裡找個地方HEA大半天。相反，宿生要參加，就好似街坊參加樓下活動咁方便。當然無人強制唔比你參與，但係咁樣玩多幾日，晚晚勁夜搭車返屋企，第二朝又一早返去昨晚果個地方，除左覺得戇居外，身心都幾疲累囉。

仲有呀，宿舍裡面人多相處時間又多，好自然會建立到一個複雜龐大嘅人際網絡。宿舍裡面嘅人事物事，走讀生都唔易收到風。不過啲親愛嘅宿生，都幾鍾意將宿舍津津樂道嘅事講成係書院人盡皆知嘅事，我地走讀生就好似二等公民咁樣。部份宿生更透過院慶、宿生會之類嘅莊，把持住書院嘅學生活動。比如O CAMP莊，有關係嘅人就可以組織起來，排拒圈外人，或者走讀生。O CAMP嘅各個大組，通常都被不同嘅舍堂勢力壟斷。走讀生係咪完全無機會？都未必，只不過我地要花多好多體力精神去「浦頭」、拉關係囉。

宿分分配——階級流動的瓶頸

走讀生之所以醜小鴨難變天鵝，宿分制度嘅問題係一個好主要嘅原因。中大網頁有關宿舍果頁咁寫：「宿位分配的準則包括學生往返大學所需時間、家居環境及對學生活動的參與。」

首先呢，佢呢個「往返大學所需時間」就夠哂含糊喇。全校幾多學生先？仲要每個學生都有n種返學嘅方法，行路+港鐵，巴士+小巴，任君選擇。唔通佢每條線都行一次？轉車啲時間點預？步速佢又點計？仲有喎，點解住港鐵沿線宿分又低人一截？鐵路唔會延誤？計準時間，搭巴士都可以好快好方便啫。睇嚟交通或者地區分，要搵一個客觀啲嘅標準都唔易喎。

「學生活動參與」嘅分數更離奇。根據聯合書院的標準，每星期開兩三次會嘅中大學生報編委，「課外活動」加分只得4分，係制度入面加分最少的一項，比起一年開得果一兩次會嘅系會書院代表仲低分。再講，參與程度係咪真係可以約化成數字？

同樣都係中大學生會屬會，有啲莊勤力啲，有啲莊勁hea，計出黎「參與分」都係一樣得6分。仲有，「課外活動」點解一定係上莊？你唔比我四圍玩人地啲soc搞嘅活動？你唔比我日日在中大打波夾BAND但無入校隊院隊無上shaw band？參加學生運動、社會運動又點解唔計呢？呢個分，根本就唔能夠反映到真實嘅參與情況。

雖然四書院大致都係跟呢幾項準則嚟分配，但佢地嘅宿舍系統都各有不同。譬如崇基嘅地區分計得精準啲喇，地址一樣，在逸夫無宿嘅喺CC可能有宿。聯合新亞唔知點解院隊高分過校隊，而崇基就兩者同分。唔同書院嘅準則都可以好唔同，大家揀書院時要留意下喇。

計分法的繁複，加上地區分差距大、活動參與分差距大，只會鼓勵更多人「走精面」，如作假地址，報細樓宇面積，上頹莊等。走讀生不想同流合污的話，似乎只有積極參與宿分檢討一途。

宿位短缺，無得解決？

大家睇呢個表（統計資料取自《中文大學概覽及資料統計2010》）：

人數       宿位     宿生比率 非本地生 供本地生的床位  本地生人數  本地生宿生比率
崇基   2830    1413     50%     309       1104        2521         43.8%
新亞   2848    1066      37.4%   309         757            2539         29.8%*
聯合    2816    1048     37.2%   309         739             2507         29.5%*
逸夫   2761    1160       42%    309         851            2452         34.7%

註：
1.非本地生總人數：1237，假設各書院內地生人數均等，每書院各得309人
2. 料來年國際生舍堂的宿位將被新成立的善衡書院及晨興書院瓜分，所以上述統計未考慮該堂254個宿位

大家應該會發現，問題嘅核心係非本地生霸佔了二至三成的宿位。如果非本地生（九成是內地生）不是必然有宿位，或者中大少收一些內地生，宿位的緊張情況立時可以緩和。有人話，非本地生和本地生一齊住宿，促進到文化交流喎。但係依我觀察，宜家一齊住，都唔見得非本地生同本地生有幾多交流囉。住唔住埋一齊，似乎同交唔交流到唔係好關事。

再講，中大收來收去都係內地生為主，呢啲所謂嘅交流都幾片面，仲話「國際化」喎，乜香港唔係回歸左喇咩？何解咁鍾意收內地生？原來內地生學費要十萬一年，比本地生足足貴一倍多。收得多「非本地生」，仲可以提高大學排名添，難怪宿舍迫到死，走讀生叫苦連天，校方都係愈收愈多內地生喇。

我個人呢，就建議大家試下在校園唔同地方露宿囉，比如碧秋呀，湯草紮營呀，MMW樓梯口呀之類喇。除左方便返學之外，最緊要嘅係咁做可以顛覆到「宿生」V.S.「走讀生」的想像，呢兩種身份以外仲有一種叫做「露宿生」，幾得意呀。大家怕熱怕污糟，可以集體瞓在宿舍大堂啲沙發，擺明居馬屈你蛇，睇下會唔會比人趕。

至於書院方面，其實可以提供唔同類型嘅房比學生，比如整啲六人房呀，八人房呀之類或者放寬下屈蛇限制。如果有學生好想享受宿捨生活，又唔介意住得差啲，點解唔比佢地住呢？書院仲可以試下開放課室比同學瞓架，唔係講笑。咁鬼多課室夜晚唔用好浪費啫，開放比學生自己劃床位打地鋪，最多朝早上堂任你趕走喇。教埋你喇，合法化左佢仲可以乘機收宿費添，係咪大家都有著數先？

走讀生舍堂

為左照顧我地走讀生而成立嘅「舍堂」，有間SOC房，有「宿生」會，仲可以參與宿舍間嘅比賽添，扮宿舍扮得十足十架。不過其實大部份走讀生都無乜點理佢，因為除左得閒派下戲飛，搞下走讀生有優惠嘅PARTY之外，睇唔出佢點服務過我地囉。

最諷刺嘅係，走讀生都好鍾意上走讀生舍堂支莊，因為上得莊就好大機會可以洗脫「走讀生」嘅污名，所以走讀生舍堂堂主，係宿生嚟架！

講句公道說話，走讀生舍堂對我地最大嘅作用，就係有個地方可以HEA。人地書院嘅走讀生舍堂，你都入得去玩架。

三年一宿

政府、校方安撫我地走讀生嘅「三年一宿」，其實係假架！計下數，要做到三年一宿，點都要33.3%嘅本地生入宿率，聯合新亞先得果29點幾，剩返果幾%人想住點算？

所以，新亞只係提供限額嘅「三年一宿」床位，太多人報嘅話都係要睇宿分。聯合仲HEA，所謂三年一宿都只不過係宿form上剔個格加幾分，之後有無宿好似都唔關佢事。

校外住宿

UC和CC最近都分別提出咗校外住宿嘅方案。聯合嘅方案係一個sem資助你$1300喺出面租屋，崇基就計劃喺烏溪沙長租80個床位，收返學生每年萬五蚊咁。

出外租屋好就好在無宿規嘅制肘，但係宜家樓價咁高，佢果千三都真係似有還無。烏溪沙宿有舍監又有宿友，都叫似返棟宿舍嘅。不過比起校內宿佢貴一倍，又唔知遠幾多倍，抵唔抵住？你諗你喇。