體育：中大學生報嚴冬過後嚴選英超最佳十一

中大學生報嚴冬過後嚴選英超最佳十一
Half-time Report

陣式 4-4-2 diamond

占屎  David James
（龍門，樸茨茅夫）
由與班尼斯共事的屈福特時期開始，都冇人懷疑過占屎 shot-stopping 的身手！問題是他的身手能否 override 他犯的低 b 錯誤︰因此買入他的領隊、老細就像買大細一樣，掂就花開富貴，唔掂就全家富貴。從老撲今季可人的成績便可知道，占屎今季係掂的！而且他還剪了從事職業生涯以來第n個新髮型，成個基斯杜化里夫（墮左馬癱左果個超人）咁樣樣。相信佢就好似上季列文咁，令人懷疑人係唔會老的。

維迪  Nemanja Vidic
（中堅、曼聯）
明明申請加薪至十二萬磅週薪的的里奧．廢物男主打後防，曼聯今季因乜事咁勁呢？咪就係塞爾維亞巨人維迪開始適應英超水土，成為布魯士退休以來曼聯第一個真正的後防悍將囉！身位好、位置感好固然犀利，最緊要係維迪的marking從來都集中精神，係夢遊王廢電男的救星。而且頭槌真係堅，並唔係希比亞式頂走就算，而係落點一流有方向感的頭槌。歐聯對賓菲加的生死戰追和一球可見一班。

尤保 Joseph Yobo
（中堅、愛華頓）
非常大隻，細粒 d 都比佢撞死，絕對係打得又睇得。雖然有時有唔集中精神而無厘頭係後場失波，但係總能夠「得」翻住個位，令到人拎到波都無位俾。咩野叫「可靠先生」？就係犯完錯都係咁可靠，係呢方面尤保完全係over-qualify，係愛華頓今季有唔錯成績既功臣。

巴利 Gareth Barry
（左閘、阿士東維拉）
無數球評人已經問左好多次：點解唔選巴利入英格蘭國家隊？事實上今季既巴利係奧尼爾既帶領下表現的確係冇得彈，係左路唔單止攔擊強、斬波準、入楔時間靚，而且同人鬥「得」身位搶波仲有一手，招牌三部曲一「得」一扣再射（或者推），係球場上易認得黎又有型，仲係維拉現時既神射手（雖然有好多都係十二碼）。

艾辛 Michael Essien
（右閘、車路士）
今季波歷克及舒夫來投後，車仔改踢無翼鋒的四四二，體力、速度、身位、判斷……俱佳的艾辛，當然不會失去正選。其出色的截擊及助攻令中場其他三位隊友黯然失色。更驚喜的是，車仔當落後時，常常會換走右閘將艾辛拉後，憑這個變化，車仔搶回了不少分數，包括對阿仙奴那一球四十碼勁射。

艾邦拉賀 Gabriel Agbonlahor
（右中場、阿士東維拉）
今季最令人驚喜既年青球員，每每係維拉無哂符既時候合埋眼齋推，後發先至就咁就殺出一片天地，彷彿同身邊既人講：「踢波，唔洗用腦既，夠快咪得囉！」

基拔圖施華 Gilberto Silva
（防守中場、阿仙奴）
大家識佢應係都係2002世界盃，臨時代替廢柴艾馬臣入選捧盃。後轉會阿仙奴，成少數在適應英超的巴西球員。今季亨狗不少時間休戰，加拿斯又常常受傷，基拔圖在中場的防守作用更形重要，更更重要的是成為代隊長後穩定軍心統一指揮的作用。

希比 Aliaksandr Hleb
（左中場、阿仙奴）
前季來自德國的希比，踢法生來就好像為阿仙奴而設。今季雷耶斯離隊，亨狗又不特別想踢，龍格堡時有受傷，希比上半季上陣時間大增，其控球能力在缺少這些球員的阿仙奴中變得相當重要，可惜臨門一腳仍有待改進。

施素高 Momo Sissoko
（進攻中場、利物浦）
俗語話進攻係最佳防守，我話係「防守係最佳進攻」一句更能道出英超超體力化的激烈戰情。自艾辛變成右中場或出擊右閘之後，施素高可算是英超最具侵略性的攻中。無可否認相對於他的隊友謝老四，個波落到佢隻腳度確係有多少得物無所用，但他能破壞對手敵衛第一傳的效率卻遠超謝四。對手焗住長傳，自然可以製造大量反擊時機，且減少對手控球時間，亦能大量消耗對手體能。此乃防守足球之真義，亦因此，在體力越來越重要的足球年代，傳統夏文式的anchorman及柏度夫式的前置型playmaker將勢被施素高式的截擊攻中與阿朗素／派路式的deeplying playmaker所取代。

施比斯基 Antoine Sibierski
（中鋒、紐卡素）
在轉會市場完結前一刻以自由身轉會到紐卡素的法藉前鋒施比斯基，意想不到地成為紐卡素今季最驚喜的收購。領隊路達原先的計劃是以艾美奧比和馬田斯作前鋒，而施比斯基則只是艾美奧比的後備。誰知艾美奧比在八月賽程後，已頻受傷患困擾，最後接受髖關節手術後今季未能再上陣，做造了施比斯基的機會。他現時已有六個入球，其中個是四球是以頭鎚頂入，足見其在高空攻勢的威力。施比斯基一來可補充紐卡素的高空攻勢（紐卡素現時基本上沒有這類型的球員），二來可作為馬田斯的駁腳，令球隊踢法更多變。

奇雲戴維斯 Kevin Davies
（中鋒、保頓）
強壯如希斯基，回防意識及截擊效率可媲美麥肯之流的中級防守中場。以前鋒來說，奇雲戴維斯的workrate在英超中可謂萬人莫敵。雖然射門偶有失閃，但安歷卡之單薄及零防守意識必須有戴維斯這樣的球員承托、配合、包底。今年上半季的體能，簡直是筆者心目中的英格蘭足球先生。

哈里．列納 Harry Redknapp
（領隊、樸茨茅夫）
正是一年前，哈里列納剛從敵對球會修咸頓回到樸茨茅夫當領隊，被當時英國媒體揶揄為肥皂劇。豈料一年後，列納不止成功帶領球隊護級，勉強以第十七名完成賽季，還在今季創出佳績，令球迷大跌眼鏡。與其他被收購的球隊不同，樸茨茅夫並沒有在季前大灑金錢擴軍，購入的只是老將占士、蘇金寶、簡奴、高爾。四名球員均踢出水準，但現時簡奴、蘇金寶均有去意，相信一月的轉會市場和下半季將是列納的大考驗。