文:獵夫
唔知大家仲記唔記得,上年考final前後鬧得滿城風雨的音樂系、藝術系分拆事件?(即校方想把音樂系、藝術系同學打散到各書院,唔似宜家咁,讀音樂一定係崇基,讀藝術一定係新亞。)經過同學一番抗爭,風波似乎告一段落;但原來學系分拆,也只不過是「文學院統一收生」的前哨而已。

統一收生,除了意味著新生可以讀一年再選主修,也意味著入學遊戲規則的改變。音樂系藝術系現時收生準則跟其他科不同,較看重藝術方面的造詣,例如要求新生有一定程度的音樂資格或需要呈交作品集等。統一收生之下,所有科目將一視同仁地著重成績,中學老師恐怕只能著力主科考試,無暇顧及藝術訓練。

究竟校方推行統一收生的目的為何?有傳是應大學教育資助委員會的要求,有人仲話呢個係國際大趨勢添。不過根據其他大學的數據,統一收生能推高收生成績,校方本身都好有誘因咁做。

統一收生話就話多啲選擇,但通常啲人都會聚晒去某一兩科,唔受歡迎嘅科等摺都得。港大文學院統一收生後,藝術系音樂系名存實亡,只剩下藝術史等科目。如果中大藝術步其後塵,全港就只餘浸大一家視覺藝術,對香港藝術界前景打擊可謂不小。

雖然按現時校方說法,將來統一收生會行double code制, 即新生可選入「文學院」或直接選入某學系,對藝術系等殺傷力應該較港大的制度低。但現時所知的細節甚少,加上校方亦會繼續修改方案,同學仍需密切注視統一收生的最新動向。

分享至:

Leave a Reply

Your email address will not be published.