「喂，有冇嘢做呀？去行街嚕！」

整理：Echo

呢個問題係咪好熟呢？熟到我哋唔使諗都識答。唔使諗，正正反映出我哋對行街嘅高度共識——行街就係shopping、買嘢。又或者咁講，我哋嘅共識，其實好狹窄、單一。除咗問「去邊行」之外，不如我哋問下「陣間行街做啲咩」、「行街即係咩呀」……

1)除咗商場，最常去邊度行街？

L：多數喜歡行舊區，比較少蛋糕樓，唐樓樓下有好多街舖，各式其式好精彩。

H：油尖旺。呀，仲有上網「行」街。以前成日睇外國live cam，跟住鏡頭pan晒成條街。而家成日上google map，不過live cam會有人行嚟行去，開心好多。

F：從前多行商場少行街，這兩三年才懂得行「街」的好，但已無時間行街了。最近行得最多的頂多能算是小路，名字也沒有。菜園村的小路貫通村頭村尾，居民用紅毛泥建成，人和單車能行。
2)除咗買嘢，行街通常做啲咩？

H：睇人同鋪頭！留意下周圍嘅人講嘢，有時好好笑。有時行街會唔理周圍，自己諗嘢。通常係心情唔好先至會自己諗野。

K：其實唔鍾意迫人嘅地方，所以通常好急速咁行。夏天好熱時，一路行一路抵受珍珠奶茶的誘惑，勝敗參半。亦鍾意塞著耳朵聽歌，幻想如果是在拍MV，步速要怎樣配合，鏡頭要怎樣擺之類。目及女。

F：張望。一入村口經過士多，必會看看老闆娘在不在，有時坐下喝茶看報聊天。經過村民們的家，隔著圍牆或鐵網看看有人在否，有時狗會撲出來猛吠，嚇你一跳。看看年老的村民在不在田，在淋水或拔草；看看村民家的果樹植物，有沒有開花收成。感覺路的熱，樹林的長高，有堆著燃燒的垃圾，有掉下來的石榴。
3)最好的一次行街經歷是甚麼？

H：同一個好朋友晌西洋菜街百老匯睇完斷背山，大約十點左右，行彌敦道，唔多人又涼涼地咁，好舒服，好享受。

V：零七年炎夏，與老弟一起由葵芳行到屯門黃金海岸，只為行，不為郊遊。最終行到腳傷要人揹，兩個月不能外出，錯過當年我城最觸目的風風雨雨外，還永久留下痛腳一雙。

F：反高鐵時，苦行五區，應該是多年來最花時間去「行街」。觀塘穿過球場的一段路特別深刻，由靜區走向旺區，下斜，我們緩行匍伏，耳裡有石屎的溫度、冷風。爽在，重新閱讀每一條街道，不同的質地，不同的人，不同的面貌。爽在，認為「行街」，就可改變世界。
4)覺得行街係啲咩？

H：我認識一個地方的方法。同埋我成日蕩失路，所以成日都唔小心發現新地方。

K：Transit去另一個有意義的地方時必經的undesirable過程。唔排除「行街」偶然會有驚喜嘅，但如果有隨意門，我應該唔會「行街」囉。

L：咪就係喺條街到行……可以很漫無目的。「行街」就係做人類學field work，買嘢啊同人傾計啊，就好似做緊participant observation。「上街」好多時係有訴求，將自己expose喺公共空間控訴一啲嘢。「落街」就多數係目標為本，快快趣完成任務就上番屋企。

V：最機動又有效的發洩活動。每次鬧情緒或感悲傷又不夠體力時，只要隨意在任何的街道行上一小時，血氣立時順暢十倍。不過鬧情緒最好在無人的街，悲傷就不需要熱熱鬧鬧的。

F：Bridging。從一種心情行去另一種心情、從一個任務行去另一個任務、從一個身份行去另一個身份、從無行到有，再從有行到無，由一個人，行至變成另一個人。