與哥哥仔同行、訪問午夜藍

文：Echo
在我們僅有的認識中，午夜藍是維護男性性工作者的組織。午夜藍職員Ray說，午夜藍是一個性工作者互助網絡，目前服務對象包括男性及跨性別性工作者。午夜藍是由紫藤（註1）男性性工作者小組發展出來的組織，於2006年正式獨立運作。午夜藍，是一種顏色，是「奔向黎明前嘅夜色」，意指「夜晚都可以好璀璨」、「奔向明日嘅光明美麗」。Ray強調每個人的詮釋都不一樣，不是自己說的就是絕對，但總括來說想帶出正面、有意境的聯想。

過去、現在、未來的工作

午夜藍一方面為哥仔提供服務，一方面為他們爭取及維護權益。他們的工作包括瞭解男性性工作者的情況和需要、改善職業安全環境、提供培訓班（安全性技巧班、防賤客班、法律班、語言班等）、提供免費愛滋病及梅毒測試、提供法律諮詢和籌辦社會運動等。另一職員阿偉表示︰「在香港，法律存在灰色地帶，賣淫或者一樓一係可以嘅，但唔用合唔合法呢個概念，被規管嘅嘢先會話合法化（legalization），如做保安、喺邊度食煙等，賣淫係叫唔違法。」午夜藍的目標是要將性工作除罪化、非刑事化（decriminalization），而非合法化。

問到過去如何跟從業員建立關係，阿偉直接地說靠累積。他以「cut線年代」來形容前幾年的情況——只要對方一知道你不是客，就會馬上收線。他們的對策是繼續打電話，現在會多落場接觸哥仔。日子有功，同行間互相交換資訊，午夜藍漸漸有了口碑，加上提供的服務「有用」，哥仔都比較願意和他們接觸。阿偉表示︰「建立關係，就要令哥仔漸漸相信我哋係嚟『打岔你嘅生活』，但我哋都係由你嘅視野角度出發、與你同行」。「打岔你嘅生活」，就是要令哥仔明白「性工作是工作」、走出性工作者以往一貫的軌道吧。

「又老又醜搵唔到食」先幫襯？

午夜藍接觸的哥仔，由十幾歲到六十幾歲都有，主要來自香港、內地和泰國。其實他們接觸的不止性工作者，「援交、按摩、理髮、跳舞等等，都係某種形式嘅賣淫」，這些從業員也是他們的服務對象。據阿偉說，哥仔的收入非如外界所想般豐厚，「無閒錢買Gucci同LV」，叫做收入合理吧。哥仔遍佈香港每一區，多寡主要視乎該區環境——為配合顧客，哥仔多選擇低調、不太公開的地方。很多人以為嫖客「又老又醜又搵唔到食」，事實嫖客很多樣化，有老有嫩，也有蒲開的人，肯定不限於「又老又醜搵唔到食」的定型（註1）。

大學生 = 嫖客 = 哥仔姐仔？

看完上文關於午夜藍和哥仔的介紹，是否覺得自己已經關注過哥仔呢？Ray打趣地形容我們是「去動物園睇動物」。我們是否不經意地站在「睇下性小眾有幾得意」的位置上呢？關注沒錯必須要先瞭解，但絕不止於在外圍觀看式的瞭解，而是把自己由思想以至行動投入其中。

阿偉表示最基礎的是思考自己與性以及性工作的關係，「去嫖下、做一陣哥仔姐仔，試下啲嘢係點樣。如果唔得嘅，我哋要以咩態度去理解？而自己唔得人哋得嘅意義係咩？」或者說，這種「唔得」，是力有不逮還是態度上的拒絕？以前有大學生去過午夜藍做實習，但很少接觸哥哥仔，怕言語上傷害到哥哥仔，阿偉指這種擔憂可以理解，但亦表示我們沒有放下身段，沒有與哥仔一齊經歷。他反問我們憑甚麼可以傷害到哥哥仔，我們是否把自己放得太大，我們有沒有從哥哥仔的視野去思考呢。

後記

其實點先叫放下身段？或者從阿偉同Ray身上可以睇到。阿偉話最初嚟午夜藍做，都驚人哋誤會自己係哥仔或者嫖客；到咗依家，Ray會話自己係嫖客，阿偉會叫你「去嫖下、做下哥仔姐仔」。係咪一定要去嫖下、做下哥仔姐仔先叫放低自己？咁又唔一定。但至少要放低顧慮，唔介意人哋以為我哋係嫖客同哥仔姐仔，否則我同你都仲係果幾個實習嘅大學生。

註1 ﹕紫藤是本港關注女性性工作者的組織。
註2﹕有一點阿偉也表示奇怪，就是約八成哥仔的客都是男同志，「女嫖客去曬邊？女人嘅情慾搞乜鬼﹖」為進一步瞭解嫖客，午夜藍剛剛展開項目，分別研究男同志嫖客和女性嫖客。