2012 搭車唔易 校園, 10年10月號 文:法吾德 四年大學,學生總數目會多左。到左二零一二年,會有兩屆高中畢業生入學,中大再多千幾二千人,中大會變成點呢?轉堂時路上應該會出現非洲動物大遷徙般熙來攘 往、等四班校巴都上唔到車嘅情況。係咪要引入雙層校巴,定係分日子交錯上課?跟進校內交通規劃的協理副校長馮通教授早前在八月尾開過兩場諮詢會,請左部分學生代表去聽馮教授的講解。個校園計劃影響學生、教師、職工萬幾二萬人,即使這場諮詢會對象主要係學生,諮詢學生意見點可以只係請學生代表(註1)就算數?唔通學校天真以為學生代表更有能力、更有資源向所有同學交代計劃嘅內容?咁樣交左個波俾學生,極不負責任。 大部分二年級或以上的同學可能會覺得「已經唔關自己事」因為到二零一二年,已經畢左業,溜左去。但事實上你哋幾年來都是校園嘅使用者,各種滿意和不滿意係寶貴的參考資料。倚靠大家的經驗,一個用家友善嘅校園規劃先可以形成。本年度入學的一年級的同學更係針吉到肉,冇理由俾學校話晒事。搭校巴唔同reg科,到時就算你係三年級、畢業級都冇優使用權架。 據了解,校方本來會搵顧問公司做個Proposal,而家由校方自己去設計整個計劃。計劃有兩大重點1)要大家行多啲,2)校巴路線會改少少。 詳細資料如下表 措施 1 校巴路線修改 ●原有火車站往新亞書院經邵逸夫堂、馮景禧的路線正考慮另一方案:先經新亞書院並取消馮景禧站 ●2012年會新設2條路線i)逸夫往火車站經第三十九區及環迴路,ii) 火車站往國際生宿舍及和聲書院 ●所有校巴路線會編上號碼 其實同而家好似差不多。但話知佢線路點改,唔講班次、校巴容量就乜都係假。到時又係要排到上ELB、望住空車唔載人、日日「樂步行」先上到堂。 2 合併下行校巴站,五旬節會站和大學體育館減至一個「善衡站」 3 鼓勵同學踩單車 中大斜路多,已經發生過意外,配套不足的情況下鼓勵同學踩單車同樣極不負責任。 4 跟港鐵磋商在方樹泉斜對面開一個新閘口 再上一次的會議上,港鐵已話左唔會採取呢個項目。唔通又得返?定係想起多條斷橋做景點? 5 在校園發展計劃中已計劃好多條行人天橋和垂直升降機,想話鼓勵同學唔好搭咁多校巴,行多啲路。 (見〈LIFT行校園實唔實用?〉https://cusp.hk/?p=1364) 升降機容量本身有限,要在十多分鐘轉堂時間實現Lift行校園的確困難。 除左合併校巴站諗唔到會點出問題之外,好多野都係求祈hea住大家先咁樣。重有兩年就黎料,而家唔認真計劃,唔去介入討論,唔去認真諮詢,到出亂子才開始補救工作,不僅令大家不方便,直接影響中大人,資源冇規劃下亂咁用,會浪費公帑。趁現在還未太遲,馮教授應承過會搞公開諮詢會(雖然冇講幾時),我哋應該主動向佢提出意見(send封email去tungfung@cuhk.edu.hk啦),等所有中大人都參與到商討校內交通的規劃問題,找出最合適的方案,咁先係路。 註1:被獲邀的只有中大學生會三莊、研究生、部分走讀生和宿生代表。沒有發集體電郵邀請其他同學到場。 參考: 行入D丫! 唔該!—為左善用校巴容量而推出的宣傳計劃 http://www.facebook.com/group.php?gid=368058691797 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 9 × = 卅六 Δ