全宿共膳之——消失的學生會

文： 真「不該」

見善衡共膳搞得咁成功，咁就諗住問問晨興幾時可以都採訪下咁，點知一拖再拖，拖到學生報就截稿之前都未安排到之餘，更傳出晨興公投有冇學生會。善衡同晨興雖然同為新書院，但架構與行政極不相同，除開學果陣書院用繁鎖瑣嘅請假手續迫學生食飯之外，甚至家下連有學生想組織學生會都諸多阻撓。

先講下食飯啦。學生被預設一定要出席共膳，有學生反映過呢種無登記制度嘅共膳
下，學生除左代表院／系／中大比賽、領獎等情況、生病及家事可以寫請假信請假外，其他原因請假則要經過好煩瑣的手續，令到學生好唔方便。好彩近日院方態度稍為放軟，無再向請假學生問三問四，而係要求向院方略作交代就可以，不過就係唔肯
白紙黑字咁更改佢地個Regulation。

另外就係有晚食完飯後，晨興搞左個所謂嘅論壇，話俾大家同書院反映意見咁喎，不過論壇一完，就傳出左晨興學生要公投決定今年有冇學生會。原來係論壇期間副院長講左句「根據中大嘅指引，我地係可以有或可以無學生會，如果有嘅話，大家就會自動成為會員嫁喇！」而當中「我地晨興係可以無學生會嫁！」呢句說話被副院長重覆左成五至六次。咁所以有同學仔就開始諗諗係咪可以無學生會，更話不如投票決定啦。但係書院高層由頭都尾都無同學生解釋過學生會究竟於書院生活中擔當咩角色。

其實學生曾經多次要求書院公開學生會組成嘅細節，但係書院就一直大耍太極，第
一次向書院提及想組成學生會，書院嘅職員就咁樣答： 「好啊！你地畫張架構圖黎
睇下先啦」咁學生聽後緊係覺得怪怪地啦，佢地又唔係經全書院學生授權負責處理學生會事務，呢啲野緊係問過大家意見先嫁啦，咁就走左去搵副院長（兼任輔導長），希望佢可以發e-mail，公開有關院方係處理學生會組成嘅資訊外，更可令有心搞學生會嘅人聚埋一齊，一齊諗諗學生會可以點樣成立，佢嘅角色同埋重要性係咩野等等，但係副院長就咁樣回應：「唔好咁Rush，等十一月先啦！」

呢個答法就有啲離晒譜啦！院方曾多次強調會Facilitate學生籌組學生會，但係請院
方send e-mail，公開有關學生會事宜，好讓學生之間可以早一啲有討論呢，就一直
左推右推，又暗示叫佢地唔好搵其他人插手，話其他人會阻礙佢地討論嘅空間，不
過就好歡迎有咩事都搵書院職員參與！(真係一個完美嘅雙重標準示範！)

唉！妳係咪真係好唔想要學生會啫？