好course 獻給你．第一擊

選科臨近，係唔係好難選擇呢？
以下有九個由同學推介的課堂，供大家參考。
（p.s.部份課堂本學期不開班）

UGEA 2190──中國社會
UGEC 2960──魔法、神話與超自然
UGED 1600/SOWK1150──生命的選擇：個人成長之旅
UGED 2305──進化、人性與行為
UGED 2550──價值與公共事務
ANTH 3380──經濟、文化和權力
MGNT 1020DEF──管理學原理
CHLT 1586F──創意中文寫作
SOCI 2208──都巿社會學
———————————————————————
跳拖．講下鬼
文：Tin

名稱：魔法、神話與超自然
編號：UGEC 2960
教師：Dr. Joseph Bosco

有d人話好頹，有d人話爛grade，但係我覺得呢個的確係幾有趣既course。Course如其名，就係探討外星人綁架、殭屍、鬼、女巫等等超自然現象既文化意義。一個mid-term、一個exam，加每星期都要上一堂跳拖，其實我覺得workload非常合理。

特別想一提既係佢既readings。雖然係英文，但顯淺易明，講下d人類學家既研究經歷，好似睇故事咁。每個星期都有跳拖有d人會覺得好chur，不過我覺得可以一班人坐低一齊傾下自己對呢d超自然現象既見解，都係相當難得既機會。
———————————————————————
體會激情
文：晞星

名稱：管理學原理
編號：MGNT1020DEF
教師：賴漢榮先生

這科是我中大上的第一課，至今都十分印象深刻。老套D講，一字頭管理學的課堂，十個有九個都係吹水。所以老師真係好重要。John Lai 是一個好好好熱心的老師，相信上過他堂的學生都會認同。他會同我們課外BBQ，亦至今都會保持住e-mail聯絡。人生的道理和點樣做人，好多上了年紀的老師都喜歡講唔少。不過四十出頭的John，卻真的是做出來。雖然對他「人人只要發奮向上，就一定可以成功」的看法抱持懷疑態度。每次看他由上堂的第一分鐘，passion到落堂前的一分鐘，整個學期如是，不能不說獲益良多。特別建議Year 2, 3上堂上得已經麻木得不得了的老油條們選讀，好重拾一點激情。
———————————————————————
認識中國？去片！
文：Kamiki

名稱：中國社會
編號：UGEA2190
教師：柯子明先生

本人本來都對 UGA 零期望。當大家知道要讀一個關於中國的 course, 都可能會唸起嗰 d 悶到極的中史、文學。嗰時本人都係咁諗，所以 reg 嗰陣都不抱期望，是但 reg 左讀完就算。但 4 個月後，呢科變成本人 sem 1 最鐘意、學得最多野嘅科目。呢個 course 係係一個 3 credits的科。呢個 course 所講 ge 係當代中國社會，exactly 而家呢個時刻的中國社會，而唔係幾百年前嘅中國社會，所以會比較貼近生活。呢個 professor 每堂會講一個 topic，十三堂課佢就講左十一、二個 topic，等大家講起中國社會時唔會淨係識講佢官員貪污或者係法制唔完善，仲可以知道多 d，例如戶籍制度同農民工問題，中國的教育又有咩問題等等。同埋，呢個 professor 講書唔算悶，佢堂堂都會播一 d 相關 ge 影片，好似係鏗鏘集，時事追擊等等，然後再講解。佢挑選的影片多數都唔悶，有 d 仲幾有趣架。至於 workload 方面，一個 sem 要交兩篇文，每篇字數係800-1200 字，字數同寫一篇中化實用文差唔多。對同學來講，或者佢唯一嘅缺點係要考試，instead of 寫 final paper，但由於佢實在教得唔錯，而且真係令我學到野，所以我都願意比心機去溫。
——————————————————————–
返學有得去旅行？！
文：小弟

名稱：經濟、文化和權力
編號：ANTH3380
教師：Dr. Joseph Bosco

上堂上到好似去了旅行咁，都咪話唔爽皮！波仔（Joseph Bosco）可能會帶你去下Papua New Guinea看看別人的經濟系統，教你衝破self-maximization的迷思；又會帶你去看下美國的資本主義「文明」如何不文明地吃掉了四個地球；之後帶你去下Kenya看看那裏的無地農民如何擺脫犬儒，反抗吃人的資本主義！之後你會發現之前讀過個套econ根本不足以解釋世界，或只是助紂為虐！一大堆資本主義inconvenient truth講比你聽，都咪話唔驚心動魄。原來現在殺人無數的霍亂本可以早早滅絕，原來以前的部落「野人」生活質素要比現代人高，原來slash-and-burn很環保，原來精神病不存在，原來毒品並不毒，原來吃牛肉可以殺人，原來買股票可以導致Mexico的暴動！以上一大堆「原來」原來都與資本主意息息相關！聽完太絕望？可以同友善的波仔或靚女tutor傾下計，或在各國文化中尋找insight，在犬儒(not a lot can be done)與不負責任(don’t blame me – it’s not a problem for which I am answerable) 外殺出一條新血路！

一個mid-term，一個exam。雖然每星期都有tutorial，而且weekly readings至少都40頁，但D英文都幾淺。workload很合理啊！
———————————————————————
討論正義
文：熹

名稱：價值與公共事務
編號：UGED2550
教師：周保松教授

第一次對周保松和這個課堂有印象，是在入中大前，在香港討論區見到有人大力推介。在Year 2第一次上這課堂，就發覺這課堂的氣氛跟我上過的堂大大不同，同學的討論異常熱烈，時有十多位同學先後發言，討論近半小時，卻意尤未盡的情景出現。周生會由最近的社會時事出發，勾勒出當中的爭議，鼓勵同學討論，並從中確立自己的看法。在這個價值相對主義充斥－－大部份人都將對錯簡化成觀點與角度的不同時，周生十分鼓勵我們確立自己的看法，用理據去支持，去跟別人交流、討論。背後的是相信世事有其對錯、拒絕犬儒的態度。一整個學期下來，除了不經不覺感染了一點大學生應有的理想主義之外，亦碰上了一群樂於討論、交流的同學。期望日後大家都無負周生對我們的期許，作為一個公民、作為一個自由人。共勉之
———————————————————————
讓你在大學生活中有所覺悟的一次飛翔之旅
文：直死之眼

名稱：都巿社會學
編號：SOCI2208
教師：張彧暋先生

在大學生活中不斷升降浮潛的我們，其實只是如困獸鬥般行屍走肉地生活，抑或我們有張開翅膀，振翅高飛的時候？

German 有別與一般社會學的導師，不會用一大堆你聽極都聽不到的理論來嚇你，也不會用一個個要查字典才了解的詞彙來催眠你，而是用日本文化現象、甚至宗教等不同的範疇的有趣事情向同學講解都巿社會學的不同理論：越境、俯瞰、無緣、異人等。雖然一瞥之下摸不著頭腦，但在不同的電影欣賞、動漫的演繹之下，此course的面紗將被層層拆解。都巿社會學其中一個最引人入勝之處是一但你學會了、獲得了「俯瞰」的能力，就會失去了自己原本的視野，以一個嶄新的角度看待這個社會、這個世界一切的關係。我們的姓氏、社區的規劃等一切以為是理所當然的事，用俯瞰的雙瞳一望之下，一切現象背後的原因會赤祼祼地暴露我們眼前。這樣的能力，可以讓我們重新去看待、思考自己的大學生活，讓我們在僅餘的大學生活中重新再活一次，不過，最終的選擇還是在你們手上……
———————————————————————
原來中文真係可以好好玩！
文：迴文詩

名稱：創意中文寫作
編號：CHLT1586F
教師：張詠梅博士

好多人都好驚寫文，但係小弟同三四個朋友take完呢個course後，發覺呢個course 真係好正，一黎佢絕對唔係果d悶到就黎訓著ge中學式中文堂，而係非常生動有趣，師生間充滿有趣交流嘅一個課堂。小弟本身唔太識欣賞詩同寫詩，但係上完之後，可似識得欣賞詩，甚至開始鐘意睇陳黎D「圖畫詩」，原來中文都可以千變萬化，係自己無窮創意中遊走，再將佢地匯出成為一篇自己睇完、同學睇完會讚好嘅文章，感覺非常正！加上一班約20個同學仔大家都被張老師有趣嘅例子吸引，基本大家你一句我一句咁討論同學間嘅創作，真係幾快樂不知時日過嫁！
———————————————————————
積極．成長．正能量
文：Daniel LEE

名稱：生命的選擇：個人成長之旅
編號：UGED 1600／SOWK1150 (Double-coded)
教師：余秀珍女士／陳智豪教授

我在上年Sem 1 take 這個大通，是由余秀珍女士教的。我從這個course學到很多個人成長的課題，例如：學習、擇業及前途、愛情、家庭等等。這個course 幫助到我建立積極的價值觀，正面地影響我日後的生活。這個course 要寫一篇reflection journal，講下你上完課後的反思及啟發；要做一個project，兩人一組帶領同學上一堂tutorial，topic 預先選定；最後還要交一份叫 “My Past, My Present and My Future”的paper；沒有任何測驗或考試。這course是要上tutorial的，如果miss 了tutorial 就要睇reading 再交份report，講下你對那個topic 的了解。下一個sem會係陳智豪教授教這個course，我未上過他的課，所以未知他是否教得好。我在這個course 拿到B，都算滿意。我誠意推薦這個course 比中大同學。
———————————————————————
史上最harsh通識
文：Vicky

名稱：進化、人性與行為
編號：UGED2305
教師：張雷教授

雖然已經係兩、三年前既事，課堂內容真係唔太記得，但非常記得take這科是個情非得意的決定，事緣為我忘了add drop deadline。第三堂（即過左add drop之後第一堂），教授一人派了一本吋幾厚、雙面、全雞腸的碌屎釘裝本，裡頭全都是相關的學術文章，本人接過後當堂呆一呆。但攞命的還左後頭，張教授要求每課之後都有必讀文章兩三，quiz一個，功課兩三，下堂會點名問人，唔識唔緊但俾佢知你無睇，堅鬧，冇做功課，堅鬧。最大鑊係上堂訓覺，當年睇住有人被鬧到上天。我都俾佢鬧爆過幾次，原因為走堂同遲交功課（唔交會肥），但之後知死將功補過，勤力d答下問題同做功課，佢都會將你從黑名單上除去。

講到張教授咁harsh，唔係想勸喻大家咪take。老老實實，有幾多人有認真咁對待過d通識科？大家有邊科唔係求其碌過就算？響大學有d咁 harsh 既通識，逼你認真讀一d你本來唔打算掂既野，夫復何求？況且張教授教書真係講得幾清楚，而且勁有幽默感，成功挑起本人的好奇心。總之，你唔挑佢機，take呢個course其實好爽。

*部份標題為編者所加，文章內容亦經修訂