生活｜單車代步初探

文：MC軒

相信各位曾幾何時都幻想過，可以踩住架單車響香港四圍去，好似卡通片、電影裡面嘅主人翁咁自由自在。但買得架單車返黎，落街先發現好大問題；你係新界人的話還好，叫做有啲斷斷續續嘅單車徑。住港九嘅朋友可能係望住狹窄嘅行人路同啲車係咁去嘅馬路，都唔知可以點踩。雖然我自己單車代步嘅經驗都唔係太多，但姑且拋住磚先，睇下引唔引到玉啦。

單車變摩托，攞命搏？

想單車代步，最起碼都要有條路卦？新界嘅單車徑睇落都幾密，但其實當中有唔少規劃、設計上嘅問題。譬如為咗就車路，單車徑好多時都被斬斷晒要人落車推過行人路，或者上天橋落隧道，製造不必要嘅危險斜路。同樣為人垢病嘅，仲有霸佔單車徑一半闊度嘅重型「減速欄」，考單車手技巧之餘，撞埋去仲好甘添。

根據法例，如果附近無單車徑的話，單車係可以使用馬路嘅，亦都需要遵守同揸車一樣嘅交通規則，運輸署甚至仲出左本詳盡嘅手冊《騎單車安全》[1]教市民點樣喺馬路上踩單車。所以喺行人路上踩係犯法嘅，會被差佬趕返落馬路；但係喺馬路，司機大佬又唔當你係車，快又快過你，大又大過你，兩邊都唔係人。

除左道路設計，單車嘅相關配套亦都好缺乏。先講下泊車場，新界好似淨係得某啲東鐵站、屋邨有啲大少少嘅泊車場，港九則近乎絕跡；仲要果啲泊車場好多都係露天添，一黎日曬雨淋架車好快生鏽，二黎都怕被人偷。又當你踩踩下踩到累，想搭車嘅時候，你會發現原來都唔係咁多交通工具歡迎單車：港鐵要你摺車或者拆轆，巴士唔俾你上，小輪又唔係條條線都搭得。

單車已被時代淘汰？

呢啲對單車咁唔友善嘅種種背後，其實係政府對單車政策嘅僵化思維。政府將單車定位為「消閒康樂」，無疑判了單車代步死刑。話就話我地可以合法踩，但道路設計完全沒有考慮單車行駛，更談不上有甚麼配套設施，根本同禁止踩無分別。時至廿一世紀，乜唔係淨係得返大陸啲落後城市先會有人單車代步？香港咁文明，公交一早俾財團壟斷，單車絕跡唔係好正常咩？其實，外國有唔少例子可以說明，單車代步係可行的。

最具代表性的「單車天堂」無疑係荷蘭，經過幾十年規劃，所有車路旁都有單車徑，平均每人也有超過一部單車。或者你會話人地規劃有遠見，香港就無得救啦。但東京、紐約呢啲人口密度不比香港低嘅城市，近黎都積極推廣單車代步，比如放寬行人路、馬路都俾踩單車——這正是「share the road」的概念：未必要加建一條單車專用道，而係透過強調不同道路使用者遵守交通規則、互相尊重，改善單車嘅情況。除此之外，香港可以做嘅野仲有好多：如學台灣地鐵，劃分某啲車卡容許單車乘搭；又可以加建單車泊車位，如規定每個停車場一定要留幾多%嘅位俾單車泊；推廣單車旅遊，振興本土單車工業等。

近排阿寶為左爭取體育資源，不惜做醜人支持申亞。11月在九龍城書節一個講單車嘅talk入面，另一位前單車港隊成員何兆麟有唔同嘅睇法：單車隊之所以多數係新界人，原來係因為隊員多係由單車代步開始鍾意單車。想推廣單車運動？搞好單車政策好過搞亞運啦！踩單車係會慢啲，係會有汗水，但卻不失為搭巴士港鐵迫沙甸魚以外一種簡約、便宜嘅選擇。喺推動政府改革之餘，我地可以做嘅就係身體力行，用腳踏出屬於單車嘅空間。

[1] http://www.td.gov.hk/tc/road_safety/cycling_safety/index.html

馬路踩單車小貼士：
1 一開始嘅時候可以先踩啲熟悉嘅路段，習慣喺馬路上嘅感覺。
2 可以幻想自己係揸緊車——比啲信心，你真係有權踩馬路架。
3 唔好太貼路肩，巴士夾埋黎時都有啲空位可以比自己tun。
4 著啲鮮色啲嘅衫，突出自己比司機大佬見。
5 夜晚踩記住裝返車頭車尾燈呀。
6 可以三五成群一齊踩，人多壯下膽先。