校園｜大專院校趕Paper 爭奪資源最大化

文：法吾德

Sem break之前，大家忙住做唔同科嘅paper，每份都好辛苦咁嘔幾千字出來交差。要做紙的豈止你地？各間大專院校都要交一份萬幾字嘅paper，題目係2012-15三年計劃書（2012-15 Academic Development Proposal）。呢份paper係決定院校響嗰三年會得到大學教育資助委員會（UGC）幾多撥款。今次題目有啲唔同，咁啱撞正三三四新學制，所以應該比以往要寫多啲，又難寫啲。要UGC俾高grade，去獲得最多教育資源，二月中就係死線。

有齊晒資料晌手，望住Marking寫

在上年七月、九月、十月，UGC同各間院校行政人員開過唔少會，商討成個大專教學嘅未來發展方向，重討論埋條題目點set，但最後點出都係UGC決定架啦，循例問一問姐。而家有兩份野，一份係寫俾大專院校的Start Letter，相當於paper的題目，附件更包括marking scheme。另一份文件係UGC向大眾公開有關香港整個高等教育未來發展方向嘅報告[1]。

院校要做嘅，就係刨熟《報告》，盡量喺ADP入面寫多啲配合UGC提出的建議。同埋要對住Start Letter入面寫住嘅ADP評審準則。今次份題目要答嘅部分都幾多，其中有一啲部分幾值得大家去注意。

必答題：人力資源需求

其中一個就係強調香港嘅大專體系必須滿足本地人力資源需求，所以明明講緊全部學位課程（First Year First Degree, FYFD）都要交6%學額[2]出黎撈亂俾咁多間院校bid返去嘅時候，一啲科目好似社工、教師，同醫學治療相關（今期將法律學科剔走）都唔駛交出黎，即係話一定唔會減學位，重可能會有得加添。

之不過，係咪咁做就可以完全解決人力資源嘅需求呢？其實又唔肯定。社會一直都吹風話護士好缺人手，而現時年年都有約五百幾個護理學嘅同學仔畢業，雖然未滿足到人手需要，但純粹加學額又係咪就可以解決到現時因人口老化引致 嘅醫療系統人手短缺嘅需要呢？護士工時長、複雜嘅晉升制度，令到唔少在職嘅護士萌生去意，近年護士嘅流失率有明顯上升嘅趨勢[3]，加劇左護士荒嘅情況。有人形容護理前景好，想話吸引年輕人入行，但就算多左人被「前景好」呢個假象氹左去讀護理，最終佢地都會認清事實，離開嗰行。增加嗰科嘅學額固然可以令到人手輸出增加，但若果嗰行嘅制度本身存在缺陷，咁加多多學額都難以應付到。直接實行一啲措施去挽留人手可能重有效。

另一個唔會被減學額嘅係教師教育，政府係咁殺校，又唔肯推行小班教學嘅情況下，教師嘅需求有幾大呢？雖然份題目就冇講係邊一個階段嘅教師，但中學教師明明就係日日驚住被人開刀，點睇都見唔到有迫切嘅人力資源需要喎！定係講緊嘅教師係指補習老師呀？

Part2：角色分工

除此之外，UGC要求院校要份ADP清晰咁講到自己在專上教育呢個整體入面嘅角色。言下之意就係要院校專注發展某啲學科令到資源唔會重疊，可以用得更加有效。

不過，其實幾搵笨。某啲院校早早在某幾科已經開始發展，在個個領域上都已有所成績，順理成章嗰間院校一定會專注響果啲學科上。咁講到分工，只容許得一間院校去辦嘅時候，其他院校就因為遲起步，做得冇咁好，就無法獲得資源去加強發展嗰一科嘅機會，甚至會被削資。有人會話咁咪開啲新課程囉！的確係，不過要開新課程要講得清楚啲支持論據之餘，又要盡量避免UGC覺得係一啲「吸引眼球」嘅課程，簡直係開新又唔係，做返舊嗰啲又做得唔夠人地好，進不可攻，退不可守，令到一啲弱勢少少嘅院校永無發圍之日。UGC，你好很狠！

UGC如何MARK份ADP？

份ADP會分四個範疇去睇，佢地係「策略」、「教與學」、「高等學問」同埋「社會聯繫」。評核嘅第一步就係跟進返間院校先前嘅表現先，睇下做唔做到上一期份ADP入面講嘅野，如果做得齊，做得好自然對今期有印象分加。

「策略」部分係講返院校點去朝自己嘅角色去做返相應嘅措施，譬如以乜嘢教學方法去處理唔同學科需要；「教與學」主要睇返教學嘅質素，即係點評估學生嘅表現嗰類野；第四個範疇有啲怪，名目係社會聯繫，括住文化同商業。但一睇入面啲細節，竟然係講點樣同僱主合作做研究。關於文化方面，只有一段仔話院校有責任令到知識得以保存同傳承，要包響ADP度寫。

第三個「高等學問」有關大專做研究個部分就好有趣，UGC認為研究嘅撥款要多啲競爭，呢個牽涉到研究生的課程嘅側重點。「表現好」嘅研究就會得到更多資源，好似好天公地道，但我地知道「表現好」嘅意思大多係指響知名嘅學術期刊多登論文，而知名嘅學術期刊多數以外國為主。研究要得到期刊嘅青睞，就要做一啲吸引佢地目光嘅研究，即係要做啲能夠有好大影響力嘅嘢先至得。但嗰啲宏大嘅研究成果同知識，往往未必可以好直接咁應用返響本地。咁唔係好奇怪咩？咁算係有效利用資源咩？

改卷員UGC撈過界

份ADP五月就會出grade，到時就知道邊間院bid到多啲學位，攞多啲撥款返歸。當然有人歡喜，有人愁，但邊間歡喜邊間愁大家心知肚明。反而值得注意嘅係，明明UGC係「一個非法定的諮詢委員會，負責就香港特別行政區各高等教育院校的發展及所需經費，向香港特區政府提供意見」，做諮詢同俾意見之嘛。而家佢咁set題目，咁訂大專教育發展方向，咁用撥款去拑制院校，係咪真係對香港好先？唉，唔怪得恒商要搞私立大學啦！

=====
[1]《展望香港高等教育體系──大學教育資助委員會報告》2010年12月，大學教育資助委員會
[2]嶺南大學為4%，因嶺大早前宣佈會把其開辦的課程減縮。
[3] 今年醫管局護士流失率創過去3年新高，截至今年8月，年度流失率達5.3%，較去年的4.1%增加1.2個百分點http://www.hket.com/eti/article/c57ca205-19b8-4bac-97ab-e0686a8c3da6-178372?category=facebook

///////////////////////////////////
考題一覽

1.大類招生也是要點之一，被說成院校收生的大趨勢，應該採取。然而這個收生方法及其課程的設計會出現大量的負面影響，相關的討論可參考《中大學生報》十月號。

2.本科生只可超收20%（4%本地，16%非本地），研究生則可超收40%，但超收的不可作為申請更多撥款的理據

3.政府承諾會把學位課程（FYFD）由現時14,500個增至15,000個，而在2012年度，則有30,000個，因為當時有三三四新學制和舊制的中學畢業生同時升學。新增的500個學額中，120個會分配至教育學院，其餘的由UGC去決定，但以人力資源需求為優先考慮。

4.新高中的畢業生，將會在大學學習四年，對於院校在資源的分配上，與現時三年制截然不同，新四年制第一年在UGC而言，為額外的一年。這一年的課程會被設計成以基礎為主，UGC在撥出的資源僅為其他學年的75%。

5.在《報告》中，指出在全球化的趨勢下要制訂國際化策略，而且寫明院校與內地的聯繫並不計算在「國際化」內。

6.將來的三年內，不會再新增由UGC資助的副學位課程及教學研究的課程，與此同時，預留給副學位升學的銜接學位課程之數目則會逐步的由3974個增加至8000個，以配合需求。