校園｜民女最新動向 文廣狂想曲

文：球奇

設計圖片

新民主女神像擺響邊呢個問題講講下已過大半年，學生會開過論壇，校方亦主動撩過學生會傾，總之家下校方已同意新民女像置放於中大，但就唔想擺火車站，話自己有意重新規劃入口廣場，擺個像唔太適合，都係文廣好d咁。

不過大家都知文廣有幾「大」，質個像響果度，同困住佢響個籠度有乜分別？所以校方都醒水，話會考慮擴大文廣，做d空間改善工程作為trade off，內容初步為拆鬼左文廣兩旁的櫈，甚至拆鬼左個細細停車場等。

心水清既同學大概都諗到，拆果丁屎咁多野唔會騰出好多空間，個籠大d都係貓籠變狗籠。但既然校方提出可以做文廣一帶o既改善工程，咁我地大可想像一下究竟文廣一帶可以點樣改，改到更切合同學o既需要。以下係一d中大同學o既提議，大家不妨諗諗：

>>同學A：
「計我話就拆左中菜廳佢啦，或者縮入D囉！而家校長專用來請客的見龍閣長期烏燈黑火浪費地方，不如將佢變做中菜廳，騰番D位出來比同學用！」

>>同學B：
「計我話應該趁四叔添丁之喜未過，鑿佢一獲金既，成棟范克廉樓拆左佢重建做八十八層高既學生會大樓。
咁啲學生團體可以個個有soc房，中間搵十零廿層租出去，做寫字樓又好住宅又好，租金收入用黎資助學生會，等大家唔使交咁多會費！」

>>同學C：
學生報上期講中大未來愈來愈多建築物起係CC ar ma~咁不如就襯今次機會，正式遷都啦！將巴士站旁邊的行政樓連根拔起，搬去CC。咁就打通文化廣場同烽火台這兩個中大十分重要的公共空間，亦可以比到位PK梯擴建，令PK梯不再PK。

>>同學D：
「搬走范克廉樓既OSA，騰出兩層出黎，做SOC房又好，學生活動中心又好，總之令文廣同范記成為真正學生自治o既地方。」

以上當然是up得就up，創意無限。關於民女的去向，其實學生會已向代表會提請召開決定新民主女神像安排「全民投票」的聯席會議，之但係代表會搞到就黎落莊都未開成會，所以議案先被懸起至今。關心此事的同學請密切留意學生會的公佈。

花邊

唔知大家仲記唔記得伴住民女一齊黎的三塊「天安門屠殺」浮雕。浮雕巡迴各大學後，家下去左嶺南，擺響學校門口。聽嶺南o既學生會同學講，浮雕因為搬來搬去、日晒雨淋，家下已經溶溶爛爛。同學話，佢地本來只向校方book左響十一月擺放，但到十二月，個個都要考試唔得閒理，學校又費事嘈，於是就擺到家下lu。至於之後擺邊，就要等考完試，等學聯再開會決定了。