選課小秘笈

文：Vincent、OKTak

選課分秒必爭。想有day-off冇八半有lunch冇JQK，或者想報讀搶手既班，就要鬥快。睇下有乜秘技吖：

０電腦冇速度、唔夠快、Load得慢就一定會爭輸大市，所以必要條件係電腦性能。冇部好D既電腦？咁就下sem再見，一係就日日去department尋求協助啦。或者等到final year有得優先選課都得。

１記低Class Number
CUSIS 在course code以外有一個四位數字既Class Number，同學事先記低個班既Class Number，可以方便砌時間表同搵相關既資料。先用CUTS搵齊所有時間表既可能配搭，再加把勁逐個session記低Class Number，N手準備，就百戰不殆。

２連線質素決定先後
連線質素（唔單係指連線頻寬，亦包括伺服器之間既延遲值、經過幾多個節點）直接影響選課成功率。一般網絡供應商都OK，連上CUSIS主機既延遲值都唔高過20毫秒，雖然個時間差距比起click一下滑鼠仲要短好多，但就成為左同時間click enroll既同學先後次序既分野。如果想要排前D，最好親身到碧秋樓，個邊既最近CUSIS既伺服器。而家無線上網流行，上到CUSIS就可以reg到課，但係無線上網仲未成熟到固網咁穩定，若要用iPhone、PDA等去reg科就要注意可能會慢過人地，好可能reg 得果6 credits既風險。

查詢延遲值：打開「附屬應用程式」 > 「命令提示字元」
然後打ping cusis.cuhk.edu.hk
查詢節點層數就打 tracert cusis.cuhk.edu.hk
小編略略測試過，用中大校園裡面既固網延遲值係最少，伺服器之間既節點最少；PCCW-wifi則長多約五倍既延遲值同節點。

３多開幾個分頁
選課時會出現等待畫面，一唔耐煩就會以為Hang左。事實上係CUSIS忙碌中，你仍在排隊。呢個時候千祈唔好click重新整理，因為熄左或重新整理就等同離隊。呢個時候再開一個分頁，睇睇自己既狀態，未成功既話可先睇下剩幾多個位，然後係新分頁再click過。當然同學可以先開一個分頁黎監控課程狀態，其他分頁用黎選課。

４用更快既瀏覽器
而家有五大主流網頁瀏覽器，揀個載入網頁速度快既就會順暢好多。Opera、Firefox、Chrome和Safari都是不錯的選擇。聽講Chrome而家最快。

５唔好亂tick waiting list
前文講過，入左waiting list要等30分鐘，先會放你入去。唔tick反而可以部住電腦，見到有位就即時enroll到。

６自行寫script／按鍵精靈自動reg
用電腦選課不外乎重複click幾個按鈕，只要寫一些簡單既小程式就可以坐係度un un腳自動完成。在其他院校都已經有人寫過類似既程式。不過當人人都有呢個程式，又要返到去第０點，電腦性能好，運氣好，贏晒！

雖然都係D雕蟲小技，但往往幫到不少朋友。不過，一齊爭始終都係對於有部性能好既電腦既人有利。