校園散打│為咗大家嘅安全同舒適，請勿在宿舍吸煙或做愛，多謝合作

文：唔好意思

　話說UC伯宿舍監開sem寫左封信俾咁多位宿生，話為左「保障全體宿生的安全；令他們住得舒適；維持熱鬧和輕鬆的傳統」，宿舍範圍絕唔容許「鴛鴦蛇、長蛇、吸煙、偷竊、半夜喧嘩」喎，睇到我一頭霧水。

除左「偷竊」之外，我完全唔明其他幾樣同「安全舒適愉快」嘅火車旅程有乜關係囉。而且，偷竊響邊度都唔得架啦，咁仲乜唔寫埋「不可殺人」姐？遲下不如寫埋十誡啲「不可姦淫」呀？無得同男女朋友瞓、無得食煙、無得半夜喧嘩，呢啲先係唔舒適唔愉快囉。

喧嘩會影響到人？但我響度住咗半年，都唔特別覺得夜晚嘈姐，唔洗咁強調呀？又用舍監嘅講法，做愛真係好危險，人類到宜家仲未絕種都算係神跡喇。成間大學都唔俾食煙已經好很慘，連閂埋自己房門食都唔得，除非話食煙會引起火警咁姐——係嘅話唔該順手禁埋用電啦，觸電危險啊。

「聯合書院秉承『明德新民』校訓，通過全人教育及群體生活，提升學生的品德情操，為香港社會、中國以至全人類服務。」網上就吹到咁大，現實啲舍監樓導師就當我地好似小學雞咁湊住。「群體生活」？點睇都似奴化教育、培植順民多啲喎。