校園散打│祖堯 in the sky with 博文約禮

文：林啟舜

聞說最近香港天文學會會長楊光宇送咗兩粒小行星－－應該話，將兩粒佢發現嘅小行星個名改做有中大特色嘅名，分別叫做「博文約禮」同埋「沈祖堯」，話係「對中大德智並重的教育理念及沈祖堯校長成就的肯定」喎。

依稀重記得幾年前有粒小行星改咗做陳易希個名，就變咗做星之子，果陣時宣傳咗好耐咁，好似好勁咁。

當然，唔係話陳易希唔勁或者點，不過其實有粒星掛博文約禮呢個名，其實又無想像中咁勁。始終，小行星其實同天然太空垃圾分別唔算好大，而且依家發現，或者話係已經確定軌道編咗數字嘅少說有廿萬粒，而成個太陽系分分鐘會有成百萬粒，所以我諗中大有一兩粒都唔算係好大件事嘅。

另外，楊光宇雖然叫做業餘天文學家，不過佢有成座私人天文台專用嚟搵小行星，而家已經有成二千粒落咗袋。我相信中大落多啲嘴頭，分分鐘可以分多幾粒，每間書院都可以有粒星。講真，誠明星呢個名應該會幾有霸氣。