校園散打│TCW≠TCW & CCS≠CCS

文：方芳芳

西部教學大樓都運作咗兩年幾，個個都佢叫TCW。但原來呢個唔係棟樓個名喎！唔係12月無啦啦爆咗個命名典禮出嚟，真係唔知TCW原來唔係叫TCW。TCW前身係李達三樓，命名典禮就將TCW其中一部分正式還原做李達三樓，另一邊就叫李兆基樓，但呢邊就未搞命名儀式。點解叫做李兆基樓呢？話說2005年四叔捐5千萬俾中大，咁橋李達三樓又要重建，後來建成嘅TCW就一直諗住叫李兆基樓，但就拖拖拉拉冇正式處理過咁囉。

無獨有偶，澤祥街大樓（CCS）喺1月都搞左個命名典禮，叫鄭裕彤樓。其實呢件事同TCW差唔多，都係冇咩同學知，但係校方就幾重視呢件事，請左沈祖堯同曾俊華出席個典禮，都叫幾隆重。梗係啦，新世界俾咗13億起間酒店同教學大樓喎，中大剩係俾塊地，就有間酒店俾同學實習，睇落點都有賺啦－－雖然將來賺幾多都係落番新世界袋。話晒互惠互利，雙方點會唔重視吖，同學知唔知改咗名都唔係最緊要啫。