上期《學生報》都有講過,除咗「同行」,仲有一班有意組莊參與幹事會嘅同學,不過最後埋門一腳就無報名。雖然係咁,我哋仍然訪問咗上期表示有意競爭的同學Onson。佢係法律系二年級學生,當初唔想跟幹事會傾莊,所以自己幾個傾。

Onson點睇

聽Onson語氣,其實呢次組莊都算幾順利。佢哋前後用咗兩個月時間準備,過程都無咩特別困難。問到資源會唔會唔足夠,例如冇老鬼帶住同冇固定空間傾嘢咁,但Onson覺得都唔係太大問題,自己傾同book房都ok。當時知道Onson砍莊嘅同學唔多,但普遍都表示支持同寄予期望,話想見到新氣象。問到新氣象係指咩,Onson話留俾我哋自己詮釋。傾莊過程ok、各方又冇俾壓力,正如Onson咁講都冇咩遇到大問題。既然客觀條件限制似乎唔太大,點解最後冇報名呢﹖原來係搵唔齊四個書院嘅人。佢哋本身大概都有成十人傾開莊,但多數係UC,冇NA同Shaw嘅同學,過唔到基本門檻。講到唔夠人,Onson有啲嬲咁話代表會好遲先通知報名截止時間,打亂咗佢哋陣腳。其實會章有寫到截止日期,可能Onson佢哋無留意啦。

講到Onson果莊,唔可以唔提Fergus。Fergus係幹事會現莊嘅內務副會長,同Onson同系同級,當時Onson都問咗佢唔少意見。所以我哋都訪問咗Fergus。個結果都幾有趣:差唔多嘅問題,兩個人嘅答案幾乎相反。

Fergus點睇

Fergus話係Onson主動問佢幹事會啲嘢,佢都好開心見到有同學關心學校事務。問到砍莊,Fergus覺得比起「同行」,Onson佢哋得到嘅支援係唔足夠,例如唔清楚幹事會運作,又唔知傾咩議題,又冇老鬼分享,可能影響到組莊。佢就根據自己舊年傾莊同做嘢經驗,同Onson分享下。其實Fergus作為現莊內副,仲可以做多啲,例如幫手聯絡老鬼番嚟傾莊,平衡下資源上嘅傾斜。壓力方面,Fergus觀察到Onson佢哋擔心俾幹事會打壓,所以先刻意唔俾咁多人知砍莊。唔知係Fergus諗太多定Onson收收埋埋,點解睇法咁迥異?不過如果Onson真係咁諗嘅話,都幾大鑊——原來喺同學眼中幹事會係咁獨裁,會打壓異己。Fergus仲話莊員對於自己嘅行為有啲怨言,話佢做咩要幫另外支莊。唔知呢啲怨言係認真定講笑,亦唔知程度有幾嚴重,但係絕對影響到同學參與校政。同學對校政有興趣、想參與多啲,我哋唔係應該俾啲鼓勵同支持,兼且營造合理、公平嘅環境咩?點解表現得咁抗拒呢?

未來動向

問到下一年會唔會嚟多次砍莊呢?出年升三年級嘅Onson話未諗,但會鼓勵同學去做,自己都會繼續推動同學關心社會,好似佢依家就喺出面搞緊中學生通識嘅活動。至於關於中大或大學生嘅行動,Onson就話目前冇咩計劃。另外有幾個組唔成莊嘅同學,就轉戰代表會,同Fergus一齊報咗名做候選人。我哋唔知Fergus喺過去一年參與咗幾多幹事會嘅工作,希望佢可以將經驗帶落代表會啦。

分享至:

Leave a Reply

Your email address will not be published.