中大學生會的「福利主義」

中大學生會究竟有無著重同學福利呢？不如睇下究竟歷來佢地為同學提供過咩嘢服務！雖則大部份嘢其他院校都有，似乎無咩特別，不過咁，好似都說明到中大學生會唔算特別輕視同學福利。

影印服務中心：黑白$0.2張，平過圖書館
物品借用： 手推車、大聲公、麥克風、佈告板、摺檯等 等，搞活動必備。
二手書買賣： 極受工商同學歡迎。皆因書單年年唔多改， 二手平一大截，連影印都慳返
仲有手提電腦優惠計劃、文化廣場管理、派發記事簿、與女工合作社協調營運售賣小食以至女工留影釘裝服務等等，近年亦有同學寄售宿舍二手物品。

短評：比起其餘院校，中大學生會明顯欠缺各式商戶購物優惠，亦不如其他院校有舉行聯校活動（主要是舞會或高桌晚宴）。有幹事提到，一眾連鎖店的剝削經營模式，與學生會理念不合。不過近年香港消費者運動開始發展，學生會似乎可以考慮和良心／負責任商戶合作，既有優惠，又作推廣。
－－－－－－－－－－－－－－－－－－－－－－－－－－－－－－－－－－－－－－－－
同學SAY

上面訪問都見到秦晞輝對「福利」有一番宏觀見解，但宏觀還宏觀，同學講到福利，始終會諗到最日常嘅福利——福利品。幹事會喺呢方面做成點呢？我哋訪問咗三位同學，睇下佢哋覺得幹事會有咩富代表性嘅福利品，同埋服務如何。

Q1：如果要用一樣物件去代表幹事會，你會選咩﹖
Q2：覺得幹事會嘅服務如何﹖

C同學　心理系　二年級
Re Q1：影印啦。自己好少嚟，因為多數喺CC上堂，唔就腳。其實都冇用過呢度嘅影印，但成日經過都見到幾多人用，文具同舊書就少啲人理囉。
Re Q2：一般啦。覺得呢度同出面差唔多，又冇咩特別好或差嘅，不過就幾自助。

玉琪　護理系　二年級
Re Q1：螢光筆。個服務中心好就腳好方便，所以成日喺果度買螢光筆。
Re Q2：幾好。文具幾齊全，影印釘裝一站式服務，營業時間都OK。
*其實玉琪一直唔知果度係幹事會搞嘅，以為係普通文具鋪，唔係小記問起都唔知邊個提供服務呢。

F同學　中文系　三年級
Re Q1：塗改帶。因為平，只係$4.5，比出面平好多，雖然一跌就爛。我跌爛咗兩次，但都唔心痛，因為真係好平。我依家又買咗個新嘅嚟用。
Re Q2：大致都幾好。阿姐幾好人，啲嘢價錢又平。不過文具種類唔夠多，好似我有次想搵文件袋都冇。依家嘅服務時間都ok，但如果延長到8點就更加好喇。

似乎三位同學都覺得幹事會個服務中心唔錯喎，當然仲有改善空間，例如增加文具種類同延長服務時間，同埋加強宣傳！爭取宏觀福利嘅同時，都要完善呢啲小福利呀。