出走獨群變草食

文：OK德

學生報之前send過massmail俾各位同學，喺一個星期五嘅晚上邀請一啲覺得自己係「草食男女」／「毒男女」嘅同學黎到報社會室一齊暢談大家對呢啲標籤嘅睇法。開頭等咗一陣以為冇人會上黎啦，點知真係有人上黎喎！不過佢地就冇認過自己係上面其中一類。Anyway，大家都圍埋傾咗一陣，過程有趣，交換咗大家嘅得意觀察。

一堆標籤──毒、宅、電車，同埋一啲由日本引入嘅新興名堂，如草食、肉食、乾物等……都經常掛喺大家口邊。只要某人一講起做某啲野，身邊嘅人即刻就會將上面嘅標籤貼喺佢地身上。但係，貼嘅時候附帶咗啲乜野呢？

其實係冇實嘅定義

其實呢一大堆terms真係冇一個權威性[ 1 ]嘅定義，多數黎自電視劇[ 2 ]，或者就咁朋友之間傳傳下講笑咁講。新terms嘅出現係因為人同人之間嘅關係每刻都按住喺社會上嘅身份、經歷而時時更新。每個人都唔一樣，但相處落，傾得埋、有近似嘅性格、有啲共同嘅經歷、共同興趣就會埋堆。當有一批新「物種」群組形成，佢地嘅生活態度上對其他人黎講可能好新鮮，甚至覺得接受唔到，隨後就會有新嘅terms橫空飛出黎框住嗰堆人。其中「御宅」原本好地地係褒義嘅，原意係「貴府上」，其後指向次文化的狂熱愛好者，但傳咗去大中華嘅地區就帶有貶義，變成指向終日呢係屋企唔願出街嘅人。

狹義相對毒

喺香港地，潮流文化日新月異，跟住日本個潮流，引入唔少來佬terms，但將狹義指向有某啲特質嘅人一下子爆大到逢親鍾意某啲興趣、嗜好，好似話影模特兒、頻繁上網、瀏覽高登論壇、儲漫畫角色figure、睇同玩ACG等都會俾人無故label做「毒」[3]，仲要啲爛鬼學者夾硬屈埋「電車男」就係成日上咸網同會非禮人去發洩性慾。經過一番誤傳、重塑、再歪曲定型，無啦啦全部人都覺得一個人有某幾種特定嘅特徵就可以將佢地歸類，加個標籤，繼而訕笑避之則吉。例如平時唔多願出聲嘅人而又仲係單身再咁啱鍾意是但上面講過一隻興趣，咁佢九成會中招。但其實會唔會係大家冇走去聽佢地講嘅野，又唔打算去了解對嗰啲興趣係乜呢？諗深一層，興趣、嗜好點解要分等級，覺得要分高下雅俗喎？而家好似將一批人打咗落十八層地獄，冇得返身。乜而家影模特兒犯法咩？點解要俾人當成強姦犯心理唔平衡先？

自願認為係，咁反而冇俾人frame咁hurt

雖然俾大家定咗型，仲廣傳一個負面嘅定義套喺社會上一堆人度，係有唔少人好想擺脫呢個「壞名字」，例如c l a i m 自己溝唔到異性係因為自己冇諗過要溝，因為自己嘅屬性係草食。草食有明顯所指，大致上話一啲唔太去競爭，對戀愛、或者日常生活冇乜特別要求嘅人。同傳統上講話一定要爭名逐利嘅，爭取晌社會有更高地位嘅思想大為唔同。唔少人對「成功」嘅定義就用功名、金錢等俗世的尺度黎量度。一旦唔夠人黎就好似係唔成功。長期冇拖拍，就係唔成功；草食，唔去同人競爭就唔會成功。咩先算成功，咩先至OK？做人一定要拍到拖咩？一定要結識到異性？一定要同異性結到婚？社會就係唔可以容納到嗰啲諗法唔同嘅人？

有啲人唔知點面對大眾嘅誤解，所以舉白旗，甚至轉化為對群組嘅自我肯定，並且向呢啲怪名稱擁抱。得閒無事就同身邊人訴說自己冇異性緣，當中有啲男生更會「睇得好開」咁同人講自己係毒男，言語間雖有微微悶悶不樂嘅意涵，但嗰種無奈自嘲又顯示出佢對「毒男」個名有絲毫嘅自豪。不過，由社會無形壓力迫到佢地咁消極，係幾咁悲哀嘅事黎呀！

線性單向輕省咁link埋一抽野

坊間猛咁推出一大堆target住「毒」男嘅產品，好多都以女性身體作為賣點，一啲女模寫真、攬枕、追女遊戲等等。男人有性慾，好想去認識同欣賞異性嘅身體有乜問題？係邊個人話有問題架？晌大家盲目俾傳媒講下講下，加埋啲產品宣傳技巧吹捧，結果係咁加強住「買親嗰啲產品就係『毒』」既想像。除非有一個非常可靠嘅研究係可以好堅實咁證明買完嗰類產品嘅人會直接增加左性犯罪嘅意慾[4]，唔係大家就完全搞錯晒，仲怪錯人啦！不斷嘅渲染同繼續搞錯，令到被傳到負面嘅terms更加負面，令一班被人叫左做「毒」男嘅群組好難俾大眾所接納。

我地嘗試搵自然覺得「毒」的人上來傾，但其實可能根本唔存在呢一種人，喺大家話語下嘅嗰批人都係過住大家咁上下嘅生活，只係願意多啲放時間係自己嘅興趣度。而家標籤佢地正如我地講外星人，根本都未有一個好確切咁搵得到，只係猜測出黎。我地係冇理據去睇唔起任何人，我地要承認大家生活存在差異，亦要容納到唔同人嘅差異。

[1] 城市大學應用社會科學系副教授黃成榮曾為電車男一詞下定義（維基百科），但其定義含糊籠統，只把數項特徵和行為連結上，未有完全涵蓋社會上一般的使用方法。
[2] 《電車男》／《螢之光》／《敗犬女王》等
[3] 「毒」，常跟「御宅／宅」混為一談，但兩者雖有重疊的地方，但不應互換。毒衍生自「獨」，出自日本單身留言板。
[4] 反而有一個反駁「情色產物必然增加性犯罪」的實驗──丹麥實驗
http://www.wretch.cc/blog/mocear/6217666