學生會選戰風雲

文：柯南？盜矣！

剛過去嘅一輪中大學生會選舉風聲鶴唳，因為有人寫了一篇名為「不投票，不要獨裁中大學生會」嘅匿名文章（ 下稱「文章」）。該「文章」先後喺各討論區、Facebook、e-mail 轉發，有醫學院學生代表發massmail 比同學，甚至有神秘人Fax 埋比各大傳媒。呢件事，萬分神秘，先是匿名「文章」，後來又有兩個新開的匿名yahoo e-mail account「Cu studentsSilent」、「Cusu Anti」先後廣發電郵，呼籲同學不要投票／投反對票；另外，轉發「文章」的醫學院學生代表在facebook 暗示「文章」由「內幕人士提供」；再加上《壹周刊》在2 月23 日的報導暗示幕後黑手是上屆幹事會內務副會長──巢景峰。劇力已達高峰！

誰是奇拿X ？

這一起神秘事件，最大的疑問是「作者」、「Cu studentsSilent」、「Cusu Anti」、「內幕人士」、「巢景峰」之間有什麼關係？身為福爾摩斯嘅小粉絲，現役高登仔嘅小記， 見有咁Juicy 嘅新聞， 雖然就快mid-term 同就快meet term（ 落莊），都唯有火力全開，為大家整理線索如下。

1)「作者」＝「內幕人士」＝？

睇返「文章」（曾經出現兩個版本），「回想這一年學生會所做的事……幾乎都是熱衷於激進的外務工作，而實幹、為同學服務的內務工作呢？」；「請不要讓這幾年才出現的歪風，有損中大學生會四十年來的聲譽。早前學生報報導的兩莊對決已消失……」結論喺：作者應該喺對學生會內務工作有D 想法；不過又唔知學生會其實咁多年都有關心社會嘅傳統喎；仲要係我地尊貴的讀者……OMG

2) 二段攻擊？

再睇小記辛苦起底製成嘅Timeline，明顯「呼籲同學不投票行動」喺11 號左右開始，去到14 號已經係高峰，然後迅速冷卻。問題喺，點解神秘人去到23 號要突然折墮到翻炒文匯報喺舊年7 月嘅舊聞：＜「大專2012」涉選舉經費益學友＞，呼籲同學唔投票？是因為佢14-23 號掛住溫mid-term ？定喺壹仔篇報導激發左佢，搞到錯字連連都要急住send 曬比同學？（見下表）

3)「Cu studentsSilent」≠「Cusu Anti」？

雖然都喺用匿名戶口寄電郵予大量學生，但據知他們所發的e-mail list 有所不同，而且一個叫人唔投票、一個就叫人投反對票，斷估係唔同人掛。而且比著喺你，都唔會開完匿名account 之後再開一個啦！貪多D 神秘感？不過如果佢估到我咁諗，又可能會特登咁做都唔奇喎！而且，又可以比同學覺得有多D 學生支持學生會選舉唔投票／投反對喎！一舉兩得！究竟係唔係同一個人呢？結論係？

不管是誰，既然對學生會有這麼多指控，為甚麼不在諮詢會直接質詢？這些匿名人士、用這麼多心力散播這些訊息，為什麼不以真實身份進行，以示對這些言論負責？如果「文章」的作者是道聽途說的一般學生，整件事還是一場誤會。如果作者真的是「知情人士」，匿名在學生會選舉期間散佈這些明顯不實的指控，則是抹黑！ 用心歹毒、居心叵測。小記偵察功夫未夠班，唔可以找出真相，以正視聽。唯盼報社的訪問特派專員，可以在兩位當事人──巢景峰和BenNg 口中找出更多線索。唔係，就會永遠都好似學秋官話齋：「呢個， 喺一個謎！」

p.s. 「不投票，不要獨裁中大學生會」可以在中大學生報網站找到：https://cusp.hk/?p=1948