校園：睇你間S O C房保得幾耐？

校園

睇你間S O C房保得幾耐？

文：零度能指

 

話說中大學生會代表會有個叫「資分」既委會員（全名係「香港中文大學學生會屬會資源分配委員會」），隔兩年就要同中大學生會轄下所有屬會分餅仔，包括soc房、儲物櫃等等。基本上大家見到係本部Fulton同范記，或者CC李慧珍o既十幾間屬會 soc房，全部都係靠資分去分配，百幾二百個團體爭三四十個位置（部份的soc房是由幾個屬會共用的），都咪話唔野小。

然則咁大件事當然好麻煩，由訂criteria到評分再到分房，一搞就經年。所以據小記印象所及，對上兩次資分都延左期成年有突。原定上年年底又係時候再分房，結果都係搞唔切，到而家都仲未開始，要等四月下屆代表會先可以再分。其實都即係變相三年先至分一次房囉。其實資分既委員已經個個都身有要務（三個係院委成員，兩個係學生會幹事，另外幾個就係師生中心管理委員會學生代表），仲要佢地搞單咁既大野，次次延期都似乎係結構性問題喇。

細心睇下佢地d評分原則，其實都幾vague架喎：對會室需要程度同儲物空間需要各值30分，活動表現、財政健全、會員人數同酌情分就各10分。但係究竟每個項目點計分，有咩細項，就全部都冇講到，一律要靠每屆資分委去訂。如果要公平合理咁分好d soc房，就難怪準則都要d委員傾成三五七十個月喇。如果唔係分完之後d屬會唔滿意嘈起上來，佢地就認真有排煩咯。

查實中大有咁鬼多屬會，淨係可以用Fulton、范記同李慧珍既所謂「師生中心」d房來做soc房，點都唔夠分。仲要有OSA（學生事務處）、一堆你聽到個名都唔知做咩／做過d咩既機構（乜野野校友事務處、儲蓄互助社、xyz學位課程同學會……），同埋大把好日都唔見人用一次既電視房、會議室，霸住一堆地方。「Fulton=銀行」、「李慧珍=貴夾唔飽Canteen」公式之下，兩棟大樓好多地方都人氣零蛋，唔知校方究竟諗住點「促進同學師生之間交流」呢。倒不如全部變晒屬會房啦。