交換經驗︰博懵

___________________________________________________________________________________________

擦出愛火花

文：右撇子

我中學讀男校，當時會接觸嘅異性就只有自己老母、女老師同埋街外餐廳嘅女待應，所以去到 d 大型補習社見到咁多女仔，其實係幾興奮架，要特登set好個頭先去補習。可能你會覺得「有女仔好正常啫，唔洗咁下嘛」，但補習社對我黎講就好似男女校咁，係另一個世界，所以我日日都好期待補習、期待學識點樣同異性相處。

其實我一直都mark實一個著格仔裙校服嘅女仔（下稱「女神」），我地可以自由揀位坐，有一次我終於有機會坐佢隔離。唔知點解嗰日特別多人，我地坐到好迫，我從未試過咁貼近女仔嘅身體，仲要係我心中嘅女神！佢身上好似有股霞氣散發出黎咁，長長嘅秀髮仲飄來椰子味洗頭水嘅清香，心跳已經去到每分鐘101下，我好想偷望佢嘅側面呀，不過又唔夠膽咁做，唯有繼續上堂聽書。

當我抄notes嘅時候先發覺女神係左撇子，我坐佢左邊，所以我右手會掂到佢左手。佢隻白裡透紅嘅玉臂真係好滑，兩臂相觸嘅一刻簡直可以比擬上帝同阿當指頭相碰嘅情境。平日咁樣掂到其他人嘅話我都會縮開隻手，不過反正嗰日咁迫，同埋掂到女神喎，我就無咩意慾扮好人喇。

阿Sir講書講得愈急，我地就抄得愈急，兩隻手不斷磨擦，為我嗰隻已經充血嘅右臂加熱。我用眼尾偷望女神一眼，佢嘅表情似乎話緊俾我聽「請你不要這樣」，但係佢嗰隻長期唔會縮開嘅左臂卻在告訴我「請你繼續」，從嗰一刻起我先明白到「含蓄」同「奔放」根本係冇意義嘅二元對立。直到阿Sir話放break，我先懶係有禮貌咁同女神講「er……唔好意思，頭先掂到你……你有冇事呀」，佢就話「唔緊要，你讀咩學校架，不如一齊去買朱古力奶……」

當時我同我自己講，已經六年冇同過女仔傾計，我唔放過呢次機會。我都估唔到佢會咁直接約我飲奶，我爽快答應咗，之後仲交換電話做咗好朋友添。博懵原來都可以造就一段情緣。

___________________________________________________________________________________________

記得的反而是＿＿

文：Susanna

事情發生在炎熱的夏天。

那個夏天熱成怎樣呢？熱到本來情願熱死也堅持不肯除下長袖冷衫的中學女生都不得不把冷衫除掉。

放學時份排隊等小巴，我一面把冷衫摺起來放好，一面狼狽地跟隨隊伍向前走。

很記得除下冷衫後脆弱的感覺。我尚未習慣自己的胸部，可是汗濕的衣服貼住身體，空氣流動，提醒我它的存在。這於我也很陌生的胸部僅隔了一層衣服暴露在空氣之下，對周圍來說也是突兀的吧。這讓我有點不安，心裡模模糊糊地起了念頭要撓起手來交叠在胸前，防範一下可能的危險。

恍惚間，小巴駛來，隊伍向前移動。

走著時眼角瞥到右方不遠一個撓著手的男人加快腳步向我走來，掂量他大概趕著要穿過小巴隊伍橫過馬路，我就停了步，留下空位讓他穿過。

很確定那空位是足夠他穿過而碰不到我的，可是他卻以相當大的力道撞了過來，撞得我退了兩步，然後飛快地過了馬路。

我完全不明白他為什麼會撞到我，直到他的身影消失我才想起，他撓起來隱藏了的手好像戳了我的胸部一下。

因為我以為我可以理解那人對我胸部的慾望，就算那所謂理解只是推測，但都夠我淡忘被戳那一下。無法遺忘的是未理解被撞前的那種難受：原來會有人覺得可以這樣若無其事地把我撞飛啊。

___________________________________________________________________________________________

反攻藍星！

文︰他MAMA

身為一個男性正在使用洗手間裏的尿兜，抱著人有我有的心情，暢快地排泄著廢物，當後面有人故意探頭凝視著我的下體，瞬間分不清是否精神上「被博懵」（瞄到對方嘴角上揚的角度和那玩味的眼光；還是那友人間的玩鬧──看清那熟悉的面孔說出「WoW」的笑語。)

當下電光火石的反應只得一驚一遮再一擋，心情無奈都不知道可以怪責誰，明明不想被別人看到那與尿兜的私人對話，但不論那時再如何守護並加固著屬於它與我之間的「私人空間」，只得倉卒叫出連自己都不明白的︰「哇！你做乜！」剎那間接通第三者的世界，瞬間成為注目的焦點。而被打破隔膜的瞬間，不管凝視的目光怎樣強烈，但在我決定並親手解放褲頭的之際，被看到甚麼已經不再重要，反正就是用那貌似不能公開出現的「小弟弟」，主動及逆向地「博懵」著公共空間了。

___________________________________________________________________________________________

喂，幾大喎你

文：六十蚊

自小已經對身體感到好奇，特別係女性嘅身體，即使我係女性。點解每日見慣見熟女性（自己）嘅身體都仲要咁好奇？無他，我鹹濕囉，鹹濕有罪咩。

初中時期，個個女仔大熱天時死都唔肯除冷衫，除左因為套藍白格仔連身校裙著左成個監躉咁太過核突，其實都係想遮番住自己起步發育嘅咪咪。遮得咁實，（我）梗係想睇下入面係點啦。上體育堂前晌更衣室換衫就正係我落手嘅時候。係架，我早有預謀架喇。女仔鹹濕（女仔）好奇怪咩？我又唔覺喎。

每次上體育堂都係兩班一齊上，而且每班女仔嘅數量其實都幾多（男女比例大約1:2），自自然然啲女仔就迫爆個更衣室，果啲for更衣嘅格數實在係太唔足夠，有啲女仔就會出去果啲冇得遮掩嘅地方換衫。唉我生為一個女仔真係太幸福喇，每次都見到一大班女仔露晒bra底褲咁換衫，個場面震撼到你唔信。卒之有一／好多次忍唔住手，衝左過去從後突襲熊抱再揸佢地個咪咪。嘩！又大又軟，爽到成個人都震晒，果一下真係要多謝上帝，造亞當果陣造埋夏娃，一啲都冇誇張。換嚟對方嬉笑怒罵一句：「喂～抽水呀！」都好，對方都只係覺得我玩，完全唔會覺得我揸完之後性慾高漲，充滿能量。

皆因我係女仔，啲人覺得只有男仔先會博女仔懵，如果唔係咁，我諗我咁放任嘅幸福都未必有咁長遠兼夾光明正大。

直到中五，大家先開始知道同性戀係咩，咁我都係時候要收山喇，唔係分分鐘抽水博懵變成校園風化案咁就大劑喇。