終於熄燈了嗎?——地球一小時 社會, 11年4月號 文:小野草 世界自然基金會(WWF)又發起了「地球一小時」(Earth Hour)活動,呼籲大眾熄燈一粒鐘,支持環保。 「地球一小時」行動由澳洲悉尼於2007年首先發起,當年共有220萬人響應齊齊熄燈。2008年,行動擴展至全球,128個國家、4000個城市的市民,包括北京、柏林等地參與熄燈行動。香港於2009年開始參與「地球一小時」,至今已是第三次舉行。 參與「地球一小時」,即係做D咩? 所謂參與「地球一小時」,其實唔係自己匿埋熄燈就得,而是要以個人、企業/機構或學校的名義上網登記,選擇承諾在3月26日晚8時半把所有不必要的燈熄掉一小時、「把霓虹燈,大型廣告板燈和店鋪外招牌燈箱熄掉一小時,位置自訂」、「成為地球一小時的贊助機構」、「捐錢支持世界自然基金會香港分會」或「向員工、老師、校友及學生推廣地球一小時」等。 真係做到環保? 據WWF所定,熄燈一個鐘的意義唔只在乎慳左幾多度電咁簡單,仲希望大眾可「利用地球一小時的時間,與家人和朋友討論,日常生活中,如何減少對環境的影響」。不過,登記左的人,有幾多人會咁神心反思自己的生活模式,思考自己平日是否耗能太多呢?定係熄燈一陣就已覺得自己好環保,盡晒人事,之後仍舊開大冷氣、開燈開到夜一夜都唔訓呢?另外,香港在短短數年間已有六次關燈活動[i];貪新鮮的香港人,頭一兩年見到關燈黑晒的維港可能覺得好新奇,但到今年已是第六次辦呢類活動,D人睇都睇到厭啦,所引起的關注又有幾大呢? 其實象徵式地關燈的作用又有幾大呢?要救地球,倒不如實行簡約生活:減少消費、用多點耐用物品而唔係不停換挨瘋、少點五光十色的夜生活,返樸歸真,節省資源。不過,在掙錢高速發展的硬道理下,人類要不斷生產、消費才可不停賺錢,政府叫人消費都黎唔切啦,仲邊敢叫人節約生活、簡單經濟呢?咁樣發展法,搞幾多個「地球一小時」都慳唔到幾多電。支持急促發展,就要用好多電,所以,政府在上年就提議增加核電比例至50%,實行起多幾個核電廠,仲方便過我叫人慳電。 既然如此,點解年仲有超過2500座大廈及公司響應呢個環保活動呢?其實,公司參加下咪當提升環保形象,熄一陣燈咪當marketing,之後咪固態復萌開燈照耀維港!如果佢地的機構名係無得登出來的話[ii],唔知佢地又會幾想參與呢?再者,上文也提及過,機構承諾的是關掉所有「不必要的」燈、霓虹燈,大型廣告板燈和店鋪外招牌燈箱,還可以自行決定關掉哪個位置的燈。其實「不必要的燈」早就應該熄啦,洗咩等Earth Hour先來關?中大出晒mass mail話參與是次活動,但關掉的係新亞聯合水塔、湯宿外草地的裝飾照明以示響應[iii],呢D無咩人的裝飾照明唔係該一早熄左去咩?!不過,對WWF而言,公司有無真的熄燈都是其次,因為無人可以check到;最為緊要的是公司的donation同sponsor,辦大型活動的其中一個好處就是有名目去籌募捐款,作為該單位的運作資金。無論如何,這個活動始終可令一些不關心環保的公司,都可以認識、參與下環境工作,如果唔係,平時唔關心環保的人,好難會take action接觸環保。熄過下燈,起碼都省到少少電啦! 熄燈一粒鐘,過後可能仍舊是高速發展,直至整個地球熄燈自我滅亡,跟住,88~ ________________________________________ [i] 包括2006年南丫島居民發起的關燈三分鐘活動,地球之友於2008年及2009年舉行「夠照」熄燈運動,和WWF於2009至2011年舉行的「地球一小時」活動。 [ii]參與公司/機構/大廈/屋苑名單 http://apps.wwf.org.hk/earthhour/ch/list_company.php [iii]中大參與地球一小時2011 http://www.cpr.cuhk.edu.hk/tc/events_detail.php?id=368 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 − 一 = 七 Δ