中大仁.愛社會 迎新特刊2011 ﹙輯自學生報一一年二月號﹚ 文:向晴軒 要數中大最活躍嘅學生組織,點可以唔提最鍾意做社會服務嘅扶青呀、義工隊呀、團契果啲呢。所以邊個話大學生唔關心社會、「閂埋門做皇帝」呢,我就第一個出黎鬧佢超錯!你試下響藝墟兜一轉呀,係咪發現好多soc都有做社會服務呢?小弟都唔係做過好多資料搜集,叫做係咁意check返對上幾個月嘅mass mail,發現中大學生組織大概以下列幾種方式去「回饋社會」: 0. 義賣。例子有逸夫奧比斯賣慈善餅乾、或者逸夫扶青賣雲南民族特色紀念品、又或者黎緊崇基扶青情人節賣金莎花——話籌錢比斯里蘭卡啲小朋友喎。其實我都可以板起面孔咁話:佢地令同學捐咗錢就覺得自己好有愛心,唔洗再諗或者做其他野。不過我諗大家買果塊曲奇果陣,心裡面都未必係諗住啲小朋友;你買係因為係你個fd整嘅,佢氹你買係話個曲奇「好好食」,而唔係講下啲錢可以點幫到啲小朋友。咁睇落「義賣」都唔算社會服務姐,大家大可skip左呢段啦。 1. 探訪。主要都係去探訪下啲「弱勢群體」咁啦,譬如崇德青年社歲晚就去左同啲獨居老人傾計、聯合扶青又陪啲肌肉萎縮症患者去海濱公園呀、小扁擔又派下圖書俾啲山區小朋友,都幾好呀。不過我都幾懷疑呢啲做一次半次算數嘅探訪係咪真係幫到人囉。啲服務團體成日話,老人家同年青人傾下計就已經好開心,但開心得果個幾鐘有鬼用咩;又成日話探訪活動「好有意義」,但又講唔到有乜意義喎,可能係培養下自己悲天憫人嘅情操掛? 2. 服務。叫做真係做啲野,唔剩止去老人中心、特殊學校做下show、搞下氣氛就算。譬如逸夫扶青去幫老人家做家務呀、崇基扶青教南亞小朋友整問卷呀、或者三心社返貴州義教啦。佢地好認真架喎,例如小扁擔為咗善用黎自校友嘅捐款,同學係要經過嚴格嘅訓練先俾去架。但諗真啲, 呢啲所謂「做實事」其實都唔係好過探訪好多——你幫得幾多姐,最多咪救下火,又唔係去防火喎。上網睇返參加者啲感想,咪又係好感動呀、個天藍過香港好多呀、同啲組員嘅合作好難忘呀之類,咁囉。小扁擔響mass mail話想「感動老師,促進當地政府,做好本分,改善學校」喎,我只可以說,你加油喇。 3. 探究。大部份soc都唔會做呢啲,但有少數組織如基關組,會搞貧窮工作坊,講下貧窮嘅成因呀、合作社係咩經濟模式呀,研究下點解會有社會問題;之後再結合行動如落區同工友訪談,從基層嘅狀況反思社會制度。中大社會服務隊個網頁,話佢地早期都會「研究社會現象」,而家就唔知啦。我諗要幫人,最起碼都要知道啲社會問題嘅成因啦,如果唔係點知會唔會愈幫愈忙呢? 唔係話0-2無用,但唔好剩係做完呢啲就覺得自己好幫到人囉。睇返好多中大活躍嘅社會服務團體如AIESEC、扶青、Golden Z(崇德)、YMCA,其實都係啲超巨型跨國組織嘅分部,唔係由啲所謂嘅社會賢達開創,就係有大企業積極捐助;佢地嘅宗旨始終都係培養明日領袖,所以會搞大量就業講座、聯誼活動之類,比如聯合扶青仲搞埋情人節舞會添。不過咁你做高官做CEO,好似點都要睇下第三世界啲人有幾慘,先可以曬下自己有見識嘛。 唔知你覺唔覺,如果唔理啲社會問題喺邊度黎,就愛心爆膨咁去「服務社群」,咁啲服務嘅對象,都只不過係工具,幫唔幫到佢地根本唔使理。做義工唔需要你知道啲窮人點解窮、弱勢點解會弱勢,只要你出賣自己嘅勞力時間金錢,就可以換取CV靚啲、自我感覺良好、提升宗教情懷、溝下仔溝下女、或者表現下自己幾有愛心咁。問心果句,除左令佢地開心一陣,你可以對佢地嘅生活狀況有咩影響?強調佢地「一開始幾慘」同埋「之後幾開心」,都只不過係想講到自己好似好有用咁。 如果你真係想幫人嘅話,最好都係諗清楚點樣做先幫到人先啦。 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 9 × 八 = Δ