文藝:聽《jarvis》--四張野青春無敵 文藝, 07年2月號 聽《jarvis》--四張野青春無敵文:仁 Jarvis cocker,英國人,四十四歲,結左婚,有個法國老婆,今年個仔albert四歲。十五歲時組左隊Arabacus Pulp ,做主音,收尾改名單字一個pulp,等左十幾年,響九十年代終於大紅大紫,有名有利有愛有性有醒目有痴線有政冶,有佢既八掛新聞,響佢歌詞入面。零三年唔聲唔聲樂隊玩完,唔係乜大件事,話哂大家都幾廿歲,悶掛。周圍打碟,幫下Charlotte Gainsbourg 同Nancy Sinatra 寫歌,做下住家男人,咁過左幾年,都係時候出番隻solo啦掛? 關於呢隻新碟,第一次聽聞係朋友報料話jarvis有新歌放上myspace,歌名叫running the world,run係run間企業果個run,副歌話run緊果班人係cunt。Jarvis 既歌詞一向冷嘲熱諷就係人都知,今劑呢首野就更直接了當,兜口兜面數俾你聽個世界有幾臭:Now the working classes are obsolete, They are surplus to societies needs-; So let ‘em all kill each other-; And get it made overseas. 仲有﹕Your free market is perfectly natural-; Or do you think that I’m some kind of dummy-; It’s the ideal way to order the world, Fuck the morals-; does it make any money? 唔識jarvis既朋友爭 d 就會以為佢係玩hardcore結他「重重重」憤怒中年,誰不知大妖特妖既歌詞後面係朝氣勃勃既pop song,陰陰笑地對憤世歌曲典型格式反叛。除左呢首遊行都唱得既running the world,其他繼續時而寸嘴時而感性,原本寫俾nancy sinatra既dont let him waste your time似係中年女人閨中密友之間男人經i will kill again係一個悶世界一個個悶男,from A to I係唔知你定我錯,世界遲早玩完大家未死似乎可以諗下計,disney time入面有奇妙世界有愛冇性 disney式甜絲絲騙局。“And you cannot set the world to rights but you could stop being wrong tonight.”人到中年jarvis似乎唔再計較可唔可以寫多幾首年度金曲,整隻碟都唔係一聽搶耳,對比pulp,一樣咁pop,不過巳經subtle左少許,但呢位紅過又老左既POP STAR,絕對冇扮YOUNG或懶深奧,唔信睇下dont let him waste your time個MV,佢扮長氣的士佬,自知之明先真正令佢青春無敵。 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 × 二 = 二 Δ