【影札】不必是夢遊／《夢遊3D》

文：奕

夢遊3D（都唔知佢3D黎做乜）
導演：彭順
監制：彭氏兄弟

話說，齣片一上，我就衝左去睇。

無他，只因我也曾經夢遊，我想知道別人如何去講一個夢遊者的故事。

我沒有帶厚望入戲院，甚至預備好隨時中伏。Why？彭氏的片子常有美得讓人大叫的畫面，但由於兄擅色彩弟擅剪接時有諗頭但冇人擅寫劇本，所以有時也會拍出如《童眼3D》的「災難性」爛片，或擺到明冇貨的B貨續集《B+偵探》。

好，回到正題。

彭氏不少電影的命題都是：1.發生過的事你越是要忘記或逃避，它就會以難頂十倍的形式逼你面對；2.犯過錯你要逃都不會逃得掉，真相不能被隱藏—就算發生時沒有「目擊者」。總之就係你唔會走得甩，亦唔應該著草，否則會比見到鬼更慘—而其實通常都同鬼冇大關係。

《夢遊》也不例外。李心潔飾演的紫怡為抑壓過去的傷痛，迴避的對象變成每夜的夢魘，甚至令她「患上」夢遊症，且懷疑自己在夢遊中殺掉前夫。

結果？結果當然是很複雜啦驚慄片不能劇透的（哈哈，慳返二百字）。

總之故事尚算中規中舉，基本上可以由頭緊張到落尾，雖然觀眾很快就知道角色X一定有「警轟」呀，紫怡肯定冇「隊lum」前夫呀咁，但底牌都係要到咁上下先會被揭開。可惜的是片中的夢遊元素好快就冇左，只變成一個個要解的夢。而夢遊由因壓抑情緒而來慢慢變成「超自然現象」類的東東就令我最不爽—彭順根本沒有打算好好地要觀眾投入夢遊者的世界，片子中的夢遊只是gimmick，主菜只是夢（而其實現實上夢跟夢遊完全冇關係）。

好彩李心潔向來都是信心的保證，演起這個超複雜的角色時做足有突，至少她在發現自己夢遊時表現出的惶恐讓我很滿意。之前會覺得彭順偏心老婆於是總是畀好劇本佢演，諗諗下就覺得互為因果—唔通畀楊丞琳（《童眼》）之流一人撐起齣戲咩……

純粹自娛之其實號稱「鬼王」的彭氏認真搞「鬼片」係等於自殺的：

　　　　　　　　　鬼程度　　　　　　爛片度
夢遊　　　　　　　不適用　　　　　　不適用
童眼　　　　　　　******　　　　　　**********
鬼域　　　　　　　**　　　　　　　　不適用
森冤　　　　　　　***　　　　　　　 ***
死亡寫真　　　　　不適用　　　　　　*
見鬼　　　　　　　****　　　　　　　***