【投稿】點解崇基週會？

今日，上上下週會，見到兩位同學因搭膊頭而被崇基職員「勸止」；上上下週會，見到有同學因用手機上網而被職員「勸停」。心裡真的覺得好可怕：為什麼在我的大學生活裡，還會見到這種家長式的管治呢？我不明白，搭膊頭有什麼問題？又唔會影響到其他人既。曾經有朋友在週會中繞手並坐，又被週會職員「勸止」，話：「同學，呢到週會黎架」；我心諗：「吓？繞下手都唔得？莫非繞手係咩野錯事？」其實，睇番週會規則，第五條話：「如有破壞週會秩序之行為（包括不尊重他人及自己之行為如使用手提電話、電子視聽產品、閱讀報刊、睡覺、聽耳筒收音機、飲食、親暱行為等，及聲音滋擾如談話、小組討論、傳呼或電話響鬧等），負責維持秩序之工作人員將對犯規之同學執行紀律處分」莫非繞手就係會破壞週會秩序之親暱行為？點破壞先？我記得有一次唔知咩事，崇基週會請哂ｄ校友番黎排排坐、睇祈禱定唔知咩；有幾個校友帶埋ｄ仔女番黎，仲拖哂手添呀！死啦，咪要趕哂佢地出去！？又講番用手機，我當然唔同意同學係週會時講電話啦，話哂都會嘈到人，但係用黎上網又有乜問題？你唔俾我係上統計署個網，搵番今年度失業率既數據，據理力爭，用黎問個講者問題架？話哂崇基請番黎既講者「粒粒大野」，我唔想錯失任何一個交流機會囉。仲有，又話唔比「訓覺」，唔尊重講者丫嘛！喂，有時你又請埋ｄ咩野劉江Ｘ、曾繁Ｘ、孫柏Ｘ番黎，係到胡言亂語──無錯，講者有發表佢自己意見既自由；我作為台下觀眾我都有咪埋眼表達我對佢地既不滿既自由姐。

講開又講，唔知同學有冇發現崇基ｄ週會職員成日係到行黎行去，係到「目及」住哂。第一，我真係覺得呢種監視行為好唔信任學生；第二，你真係騷擾到我上週會囉。上網睇番以前既學生報，原來一九九七年既崇基週會委員會係一次會議中曾經有過咁既結論架：要「減低監察氣氛，條例執行人員盡量站在隱蔽的位置」。

講到尾，其實都係學院唔信任學生。學院要做「家長」，管哂你地班「唔聽話」既小孩子。我唔係要求一個冇規舉既週會，我只係想指出學院係某ｄ規舉背後既管治心態。

———–

編者回應

從一個更廣闊的歷史向度理解，崇基週會變成今天這樣子是近30年的事。其實早在中文大學未建成之先，崇基書院早就有星期五週會這個傳統了。

81年週會納入正式必修課程之內。91年彈性學分制實施，同時書院通識與大學通識課程接軌。結果原來具備著崇基風格的通識課程都被刪除了，譬如說英國文學背景、基督教歷史、聖經導讀等等。取而代之，週會、FYP及大學修學指導成為了三門書通課程。週會的地位一下子由妹仔變成了主人婆。

另一方面，在崇基眼中週會有著神聖地位，甚至是作為某種崇基精神而存在。在此不妨節錄校牧伍謂文形容週會的一些片段，它們均可在崇基週會的小冊子裡找到：

「其實每個週會是崇基大家庭的顯現(Epiphany)，週會是家庭的集合與離散，離散後期待再相會。是生活的節奏，也是生命的沉澱、過濾和結晶。我想，崇基人就是這樣打造出來吧。」

「在教堂舉行兼有一段守護心靈時刻：優美的聖詩、睿智的經文，民胞物與的禱告，讓心靈在急促和忙亂中，安靜下來，聆聽精彩的演講。」

所謂大家庭顯現、守護心靈之說固然是語意不清，但從以上文字亦足以窺見崇基看待週會，以至那些基督教儀式的態度。總之崇基院方覺得週會能夠團結「崇基人」，能夠滋一滋潤大家弱小的心靈。

最後我想說的是，如果大家在崇基住過一段日子，都會發覺大家其實都很討厭上週會，討厭的不單止是那些陳腐的規矩，而是整個週會本身。原因很簡單：一，大家對週會題目不感興趣；二，不上週會竟然會在transcript上寫上FF，簡直是嚴刑峻法；三，星期五十一點半對太多人來說都太早了。

可以探討下去的問題是，為甚麼大家那麼討厭，但又會堅持上週會？（經校牧親口證實，不上週會是沒有後果的，除了那個不好看的FF以外）