【校園】曾蔭權同UGC你地做緊乜＿野？！

文：飛

榮譽博士學位頒發典禮當日，一班中大熱血青年向特首遞交請願信，提出佢地關於高等教育嘅訴求。然而，特首頭也不回不帶走一片雲彩地走過，令人質疑，一個唔敢直接面對學生，漠視學生訴求既嘅人，有咩資格做大學嘅校監？好啦唔講呢單啦，佢作為八間大學嘅校監，對高等教育又有咩貢獻？我認為，佢非但無貢獻，而且係過失連連，以下就拎佢管轄下既UGC黎講下。

香港依家八間政府資助大學嘅開支撥款，係由香港大學教育資助委員會，簡稱UGC（University Grants Committee）控制。教資會呢，話就話係由學者同「有代表性人士」出任委員，可以避免由政府直接撥款俾大學，從而干預大學嘅運作喎。但係，所有委員都係由特首委任，而且究竟何謂「有代表性人士」呢？定義咁含糊，解釋權始終都掌握喺政府手上，即係話，大學點都脫離唔到政府嘅控制啦，咁特首對於UGC推出嘅措施應該都要負上唔少嘅責任。同時，有樣好奇怪嘅野，UGC嘅組成係以商界人士居多，比例遠超過學者數量，我點都理解唔到，商家對教育嘅理解會比學者多囉，除非大學嘅最大意義係在於商學院咖啫。最重要果樣係，UGC掌握左大學嘅財政命脈，咁UGC對大學行政嘅形響有幾大，大家可想而知啦。

咁老老實實，UGC有啲咩做得唔好呢？話說佢最近推出嘅學額回撥機制，就受到各方嘅斥責，呢個機制要求各大學先上繳左一定數量嘅學額，回撥中央學額庫，然後再由各學院提交計劃書重新競逐，令到大學為左提高競爭力，爭取學額，就放棄左啲「經濟效益低」嘅人文學科既學額。呢個行為本身已經干預左大學嘅學術自由；同時我亦認為，大學並唔係職業訓練所，而係一個追求知識同提高個人修養嘅地方，為左爭取學額而厚商薄文，大學精神何在？導致大學商業化，UGC又係咪可以厚面皮到繼續拒絕自我檢討？特首你又係咪可以繼續漠視呢一切嘅缺失，問心無愧咁做你嘅校監？

然而，即使UGC既政策有再大嘅問題，典禮當日，示威學生高呼「學生不是商品」、「教育不是商品」果時，仍有人投以好奇嘅眼神，有人頭也不回的忽視之。究竟大學教育何去何從，究竟我地係咪要繼續不聞不問咁任由佢送往高官商人的手裡決定呢？