校園散打：大學新書店成7000 呎咁大做咩？？？

文：假期劉劉翔

校方打算係崇基一座起緊嘅新教學樓入面開間新書店，書店面積重會有成七千呎咁大，而原有果兩間就會收返用黎擴建做餐廳。其實七千呎即係有幾大？總之就好大喇！但老老實實，咁大間書店要黎做咩？入面有咩書賣同啲書賣幾錢先緊要嘛，旺角樂文、序言果啲樓上書店夠細喇，人地書店細細地但啲書反而又平又啱睇，點解？因為人地搞書店唔係淨係諗賺錢，啲書會諗過揀過先賣嘛，唔係駛鬼越搬越高都要搞落去咩。相反三聯、商務賣嘅書又貴又大路，似賣文具精品多過賣書。但諗諗下將來咁大間書店有咩承辦商食得起呀，我估咪又係啲連鎖書店。所以有人就話不如拆開佢分比兩三間搞，一黎可以多啲競爭者，二黎如果多啲書店，賣嘅書種類都唔同啲喇！即使連鎖書店都唔緊要，如果校方肯聽師生意見，同硬淨啲要求承辦商提供多啲唔同書嘅種類同服務，啲承辦商都冇得唔做嘅。

幹事會早前其實開始就新書店招標向同學收集意見。同學點睇將來嘅新書店，想佢地有咩服務同優惠，又或者覺得而家嘅書店服務有咩不足，就應該反映下喇。