文:石七刀

講起點解我而家好少搭港鐵,真係要由中六講起。當時轉咗校,番學校只係需要搭一程小巴。慢慢,我就開始覺得搭港鐵真係好悶同唔舒服。大家諗吓,港鐵又迫,又冇位坐,人就好似變咗一條條沙甸魚咁,迫住喺一個識郁嘅罐頭裡面。相反,巴士就坐得舒服,一覺瞓到落車,雖然其實繁忙時間都好迫好焗又有Roadshow煩住,但我個人經驗,地鐵遇到呢個情況似乎多啲;小巴仲爽,那夜凌晨,搭旺角紅VAN直踩番中大,聽住小巴超速嘅咇咇聲,配合耳筒播住鄭伊健嘅《極速》,簡直係天籟梵音。港鐵就只係得啲唸經式嘅嘟嘟聲同「請勿靠近車門」,一啲都唔狂野時速。

有咗呢種感覺之後,再諗深一層,其實港鐵真係好仆街。香港淨係得一間鐵路公司壟斷,真係乜都淨係可以聽佢支笛。近排港鐵又加價5.4%,明明上年就賺咗超過一百五十億。呢個所謂嘅「可加可減機制」,最後就變咗「可加不可減機制」。地鐵咁方便,鐵路公司就得一間,搭開地鐵嘅轉搭小巴同巴士成本咁大,最後,咪就係俾港鐵搶!仲有呀,身為八達通大股東嘅港鐵,仲試過夾埋領匯,利用每日巡場、約滿唔續約等方法,威迫街市小商戶裝八達通機添!結果,舖面部機一個月都冇俾人「嘟」過一次,但每個月就要交一百九十八蚊月費,仲要按營業額俾番1.5%交易費[1]!我就真係「嘟」佢喇!八達通、鐵路呢啲咁重要、咁常用嘅嘢,我哋完全冇得say,真係好似上面咁講,好似啲沙甸魚咁,任人魚肉。

之但係,講方便,港鐵又真係方便嘅。港九新界,除咗比較山卡啦嘅地方,港鐵都去到。而且,講時間預算嘅穩定,地鐵其實真係唔錯,至少唔洗塞車嘛!不過咁喎大佬,呢種何嘗唔係一種「地理知識壟斷」?由於地鐵覆蓋範圍廣,平時大家對於地理嘅知識就只係局限於地鐵沿線。小弟家住將軍澳,如果從港鐵站嘅角度去睇,係「坑口」。我試過唔少次同朋友講「我住將軍澳」嘅時候,佢哋都會問我:「你唔係住坑口架咩?」然後我就要花好一段時間解釋坑口其實係喺將軍澳入面……呢種壟斷,最後就會令大家嘅腦海中只會出現地鐵沿線先出現嘅商場、住宅,生活就只係困喺呢啲圈圈裡面,其他唔喺地鐵沿線生活嘅人,似乎就喺地球上消失咁。

自從搭多小巴同巴士,對於香港地理嘅知識真係多咗唔少。小弟本身係一個路癡,對香港啲地方亦唔多熟悉。但而家,我起碼知道慈雲山、大角咀、新蒲崗、秀茂坪等等地方喺邊,因為有時候小巴巴士會經過;亦都終於知道香港其實除咗紅隧、東西隧、獅隧同大老山隧道之外,仲有其他隧道;同埋知道西貢其實有條叫「西沙路」嘅物體可以直踩馬鞍山。呢條路,番中大真係「頭搖又尾擺,飛翔境界」……

如果巴士同小巴,可以多啲班次、去多啲地方,同埋平啲,咁樣,唔係會多元化啲咩?當然,呢個就涉及到過海隧道收費導致嘅路面塞車情況、城市規劃、各種交通資源分配等等問題,要進一步討論喇。

[1] 太陽報:焗住安裝八達通 領匯玩殘小商戶

分享至:

Leave a Reply

Your email address will not be published.