中大之夜——夜晚中大有咩做

原刊於《中大學生報》迎新特刊 2011

文：林啟舜

一提起中大，相信各位都會覺得中大係一個坐落喺南太平洋吐露港嘅世外桃源，遠離繁囂嘅竹林深處人家。同廿四小時都光殘殘嘅銅鑼灣或者旺角唔同，中大好似喺九點大部份設施都打烊之後就人影都無隻，完全係一個黑孖孖嘅山頭。當然，可能各位會話九點之後唔係番咗宿就係番咗屋企，所以中大陸沉都唔關你事。不過升到大學之後，好多時好多活動，如傾莊傾 project 屬會活動等等，通常都會喺夜晚進行，而呢啲活動早則九點，晚則直達子時先完。即係話你好多時候都會有夜留中大嘅可能。

如果你有宿住嘅話，都重可以番宿同班宿友同房玩通宵，如果唔係嘅話中大山頭就好似完全無地方去咁。不過其實喺九點之後，中大都唔係得宿舍可以去，以下呢啲地方都係可以喺日出之前去歇歇腳抖吓，或者去頹 hea 都得。

女工同心合作社：有得食有得觀星

喺范克廉樓地下低層（泳池旁）嘅一間小賣店，除咗汽水零食啤酒之外亦都有賣魚蛋燒賣等熟食。日間由一班婦女勞工營運，而十一點之後則由中大同學接手負責做特更，開到凌晨一點半。不過，中大同學唔係石頭爆出黎，亦都唔係自有永有，所以各位同學如果想繼續凌晨十二點幾都重有好味嘅女工食物食，最好就一齊去做特更喇。

女工全名係女工同心合作社，所謂嘅合作社就係大家一齊合作一齊勞動一齊決定要點 run 間鋪。因此，一般經濟體系常見嘅剝削等亦唔會喺女工出現，女工甚至一早已經開始實施最低工資每個鐘 35 蚊添。所以女工除咗賣野食之外，重嘗試實踐另外嘅自主經濟模式。

泳池旁係女工對開一塊泳池旁嘅空地，而且有檯有凳重有石級看台。除咗可以即時補給食物同野飲之外，重可以坐北向南對住個黑孖孖嘅泳池同埋夜空對酒當歌，涼爽得黎又可以欣賞星空。如果覺得太熱嘅話，甚至可以落去游水添。不過泳池夜晚雖然無保安睇住，連燈掣都無鎖，但係各位同學都係最好唔好爬落去游夜水喇。

方便：★★★★☆

補給：★★★★★

景色：★★★☆☆

報社會室：冒險歷奇

喺本部范克廉樓三樓 307 室，聽講話會室全年無休廿四小時開放。名為會室，實際上係一個超多用途嘅空間。無論係商議國家大事或是辯論時事議題，或者玩 Settler of Catan 等桌上遊戲，又或者上黎借書借碟，甚至上黎借公仔麵或者宿一宵都可以，簡直出奇過出奇蛋。有興趣.同學甚至重可以黎上莊添。

警告：報社由於長期處於無序度極高嘅狀態，所以未經訓練就入黎可能會病幾日，所以各位入黎就要小心啲喇。

方便：★★★☆☆

補給：★★★★☆

景色： ……

碧秋樓：光速上網 / 趕 paper

位於本部百萬大道旁嘅碧秋樓一樓，個電腦中心應該係中大少數官方認定係廿四小時開放嘅地方。呢度燈火通明又有冷氣，而且有廿部座枱電腦同埋 wi-fi，通宵趕 paper 必到地方之一。另外，據說中大上網出海係全港最快，重勁過 bb1000（中大坐住香港第一條出海光纖，火燒碧秋嘅話香港網絡就會大塞車），所以係碧秋上網睇片等都係一個好選擇。雖然以前真係廿四小時全面開放，不過最近夜晚十點過後要有學生證先入得，所以各位想去就要注意喇。

方便：★★★★☆

補給：★★★☆☆

景色：★☆☆☆☆

蒙民偉樓 (MMW) 天台：夜觀中大

喺新亞同本部之間蒙民偉樓嘅……天台。可以話係中大數一數二高又風景好嘅地方。夜晚坐係度望吓本部同崇基，或者隔住個海囓馬鞍山新市鎮都幾好 feel。不過自從上年相繼有人喺天台跳樓之後，校方就喺呢度裝咗唔少鐵欄，應該係用黎防止有人再跳，不過睇落就相當礙眼。雖然係咁講，不過唔知點解其他可以企跳嘅地方又無裝喎。

順帶一提，當年 MMW 重未起好時（幾時起？去 MMW 七樓睇.就知架喇）果時，新亞出口旁邊嘅一個觀景台又叫做天涯海角，係當時中大風景同氣氛都一絕.地方，聞說係當年情侶卿卿我我嘅聖地。不過自從 MMW 起好之後，呢個地方就不再清幽，並且成為咗集體回憶。

方便：★★★☆☆

補給：★★☆☆☆

景色：★★★★☆

UC/NA 波：遙感觀星

喺山頂兩座水塔中間好似足球果舊野，正名好似係咩衛星遙感接收站，重掛住霍英東個名。雖然話唔開放，不過其實又唔係大峽谷咁爬唔到上去。由於係接近中大最高點，所以風景一流，夜孖孖上去吹水煲煙感覺相當良好。不過校方話唔對外開放，所以各位同學最好就唔好夜孖孖行新亞條小道攀石上去喇。就算真係爬咗上去，各位同學都千祈千祈唔好爬梯上去個波個平台度呀，雖然風景真係一絕。

方便：★☆☆☆☆

補給：☆☆☆☆☆

景色：★★★★★

李慧珍樓：多用途建築

原為崇基教學樓之一，宜家俾信和樓等三座野（三兄弟）遮住嘅隱蔽建築。除咗部份屬會（包括據說中大最大屬會之一嘅動漫 soc）會室之外，果度亦都有好多平時乏人問津嘅設施，例如一間幾大嘅休息室同埋鏡房，開 P 又得，兩三個人hea 吓又得，得咗。另外重有間琴房，部琴相對比范克廉果部完整，得閒去練吓琴都幾寫意。順帶一提，校園電台嘅廣播室亦都喺李慧珍樓一樓一個牆上面有血手印嘅角落，夜晚敲吓門話唔定可以同各位 DJ 吹.水。

方便：★★☆☆☆

補給：★★☆☆☆

景色：★★☆☆☆

吾系電腦室：私人工作 / 玩樂間

中大某啲學系有屬於自己嘅電腦室或者同樣功用嘅設施。譬如話 CSer嘅924，或者 MBT人嘅G50。呢.地點通常都要口令密碼 / 學生證 / 某.其他卡先入得，不過亦因為呢個原因，所以通常都會少人，係夜晚黎上網或者開 party 都得嘅半私人空間。

方便：?

補給：?

景色：?

全中大

其實好廢話咁講，只要無人趕嘅話，其實成個中大幾乎所有戶外地方都可以佔為己用。例如話百萬大道呢條睇落連飛機升降都無問題嘅大空地，其實平時坐埋一堆玩又得開 talk又得，甚至可以搞個千人淥麵宴。所以話，其實好多地方都可以俾各位同學盡用，唔一定只可以去宿舍或者碧秋嘅。

另外中大話晒都係香港最大（地理上）嘅校園，而且又倚山而建，景色又靚，其實行山係好好嘅選擇。不過各位應該都感覺到平日由火車站行上本部就已經熱到想死咁，比較難會有興致同山城天人合一。夜晚中大起碼涼十度，而且又唔會好似西貢咁行行吓失蹤，帶水同埋手提電話就可以同朋友行勻成個山頭。路線選擇多之餘又多地方可以避雨同休息，真係身心康泰過康泰。雖然聽講話成個中大都鬧鬼，不過筆者就未試過撞鬼，只試過撞保安員同埋野狗，所以只要注意吓應該就唔會有咩意外。