校外交通

文：Jaco

喺中大入邊我哋就可以搭校巴啫，咁如果我要離開／返中大又點算呢？

1）火車

其實唔洗我講大家都知道可以坐火車（港鐵），大家由細坐到大，唔識就你抵死啦。不過坐火車／地鐵好易就會俾佢操控住，行黎行去都係嗰幾個商場，見嚟見去都係嗰啲舖頭。如果我又唔係小明，火車又未必係最快最舒服同最好的選擇，仲有咩其他好揀呢？

2）巴士／小巴

中大搭巴士／小巴.地方來來去去都係得兩個，一係火車站隔離，一係大埔公路。

火車站隔離去馬鞍山嘅，巴士有 87K 同 289K，同埋 807A 小巴；亦有去西貢嘅小巴 807B同 807K；仲有架去科學園嘅巴士 272K。

大埔公路嘅車去邊度都有，巴士有 72（太和－長沙灣）、72A（大埔工業邨－大圍）、73A（上水彩園－沙田愉翠苑）同埋 74A（太和－九龍灣啟業），雖然班次會比較疏，但係都幾準時，較啱鐘數上去就實無死啦；小巴就有 28K（大埔－沙田）。

3）紅 van

我諗喺中大，最出名往返中大的方法應該就係「旺角開往大埔的紅 van」[1]，除左俾Pizza 哥搞到好 hit 之外，仲係因為夜媽媽凌晨三四點都可以搭到佢。旺角返中大大概十五至二十分鐘，仲快過搭飛機呀。但要留意喎，由旺角去大埔係 2:30p.m. 至 5:00a.m.，大埔去旺角就 3:20p.m. 先有。

其實仲有唔少通宵紅 van 經中大，除左「旺角－大埔」之外，仲有「灣仔－上水」、「深水埗－上水」同埋「觀塘－落馬洲」，想去邊就去邊。除咗觀塘去落馬洲係廿四小時之外，大部分路線下晝就開始有車，到凌晨五六點左右；價錢方面就由十蚊到廿幾蚊不等，只收現金，大家仲可以試下同司機講吓價添！

4）單車

中大正正就係面對住吐露港，每逢假日都會有好多人踩單車，.中大生活嘅你，不妨試吓喺中大出車，踩一轉去船灣淡水湖主壩睇吓書，又或者踩入上水食吓豆腐花，都咪話唔寫意。雖然踩中大嘅路，甘就甘咗啲，不過都可以當係練吓體能，一個唔小心 reg 唔到自己想 reg嘅 PE course，迫住要上體能鍛鍊科嘅話都唔會爛 grade 呀！（溫馨提示：請遵守交通規則）

5）行

其實生活咗中大好一段日子之後，你就會開始慣左行路架啦（尤其係山路）。筆者有次試過凌晨兩點幾喺沙田醫院果邊行咗返中大，沿住條單車徑行一個鐘唔洗，都唔係好遠.；又或者同三五知己喺火炭食完宵，其實都可以行返中大，都係行一個鐘左右，吹下水就好快行到架啦，每日步行八千步呀嘛！

6）的士

當然，有一種廿四小時邊度都去到嘅方法，就係打的啦。不過的士呢樣野就未必個個負擔得起，話晒中大都唔係咩巿中心地區，加上有好多司機都唔識行中大.路，一陣跳多左十幾下錶都唔知發生咩事。不過都有個好消息，就係中大學生會成功爭取到科學園入口開放至凌晨一點半，係馬鞍山果邊返黎嘅同學就唔洗兜大圈啦。

其實仲有無限多方法進出中大嘅，例如可以截下順風車啦、去馬料水公眾碼頭坐下船啦、租架小型飛機喺百萬大道升降啦咁，都要等大家親身探索吓先知咩方法最適合你嘅。不過計我話，中大咁四通八達，你應該都知道唔洗吓吓都搭港鐵，次次食宵都係火炭，可以去多啲其他地方玩啦！

[1] 《那夜凌晨，我坐上了旺角開往大埔的紅 van》香港高登討論區的一篇長篇科幻小說，作者為Mr. Pizza