你不可不知的 女工合作社二三事

「唉，肚餓添，去女工食隻滷水雞脾先！」

一般同學口中的「女工」，就是女工同心合作社的簡稱。「女工」位於中大本部游泳池旁、范克廉樓地庫，附近環境優美，是不少同學食下立雜野、hea下嘅好去處。而且，營業時間由早上七點半開到凌晨一點半（有特更時段，詳見下文「特更」），足以照顧開會開到夜一夜嘅同學仔。

誕生

女工合作社嘅誕生唔係自有永有的，背後有段故。話說2001年范克廉樓裝修，大學師生中心管理委員會有意引入便利店。但委員會中的學生會代表認為唔一定要揀些粉之類嘅便利店，可以嘗試成立合作社。原因係，一來，當時校園氣氛偏重於討論六四等政治上的大議題，缺乏關注弱勢社群的討論，因此希望可以同弱勢社群合作，引起討論；二來，亦希望嘗試放棄資本主義或由上而下嘅管理模式。

學生會代表隨即聯絡香港婦女勞工協會，組織一群失業婦女草擬招標計劃書。經過學生會、委員會主席陳健民教授同校方斡旋一番後，委員會終於喺標書中加入履行大學社會責任及扶助弱勢群體成為招標條件。此舖位本來由「工業傷亡權益會」中標，但因他們怕蝕本，最終放棄承辦。並由香港婦女勞工協會補上，女工同心合作社才得以誕生。

合作社

咁資本主義式嘅由上而下嘅管理模式有咩唔好？如果你咁都要問，或者你真係覺得依家.僱傭關係太過理所當然，又或者對於依家大多數人返工.狀態太過麻木：老闆對你呼呼喝喝，叫你做乜就做乜，就算幾唔合理幾唔人道都好，為左搵食，你都只好將啲苦尷硬吞落肚，敢怒不敢言。呢個狀況唔係一時三刻，而係做到退休六十幾歲都仲要過住呢啲受氣冇乜尊嚴嘅生活。尊嚴？老闆唔炒人都算好喇，仲講咩要老闆尊重啲員工、大家一齊有商有量共同決定公司事務？仲有呀，成日聽到人地講民主民主，你番到屋企都攰到死，邊度仲有心機理政治野？講咩民主？

但如果我話俾你知員工先係公司真正最重要.人，冇左員工成間公司都要執笠，而其實冇左老闆又冇乜所謂，反而仲好添，你又會點睇？你又有冇諗過點解女工合作社要叫合作社，而唔係叫小賣店？其原因就是，呢間小店係冇老闆的，每位合作社社員之間.關係平等，冇老闆同員工之分，有同等.權利同義務。社員會共同參與決策：大至決定人工、分工、工作時間等，小至處理店內瑣碎雜務，樣樣野都有商有量，例如有女工姐姐（音：遮遮）一開始就已經表明因為屋企問題，所以唔番夜更，而大家都會尊重佢意願；雖然唔番夜更，但佢應承朝早七點準時番工。而呢種有商有量、共同決策、每個人.意見都得到尊重，正正就係實踐民主的一步。而且，由於點樣分配所得利潤都係大家共同商議出黎，自己可以掌控番自己嘅經濟命脈，而唔係由老闆話曬事，將一大部份工友應得嘅利潤自己袋落袋，呢種民主亦都同我地平時聽到嘅「民主」（指政治上民主，包括全民公投等）有.分別，叫經濟民主。要每個人都可以過上自主、更好嘅生活，經濟民主同政治民主都同樣重要。

合作社賣的食物、飲品，有時候會貴過隔離百ｘ一.，一來合作社勢孤力弱唔似得大財團咁有牙力向供應商壓低個價；二來因為食物漲價。百ｘ的做法就係炒人、減人工，維持食物價格保持客源。但基於對工人勞動的尊重，社員唔想將成本轉嫁到工人身上、剝削員工，所以加少少價。之不過咁，雖然加價，但賺左嘅錢都係落番工人手上，唔似得李＋Ｘ咁侵吞工人大部份嘅血汗錢。

女工

除左合作社之外，小店最大嘅特色係一班可愛嘅女工。冇錯，全部都係婦女，就係佢地撐起成間舖.運作。唔好以為佢地係啲咩讀過BBA嘅婦女，其實佢地同你同我呀媽都係一般.師奶。話雖如此，佢地又有非一般嘅一面。例如店內大小事務都由呢啲「師奶」共同決策話事。除左打理自己間舖，佢地都會好熱衷於社會議題、對社會上不公平嘅事都會好憤慨。例如佢地會上街遊行示威爭取勞工權益、會同大學生一齊看報紙傾時事、會與其他團體合作舉辦公平貿易週推廣公平貿易概念、會參與國際合作社日。佢地更曾經試過為因工死亡的中大工友義賣，將一日所得利潤扣除租金全數捐出，幫助遺孀。而喺上年，佢地更飛到韓國，與當地合作社交流。

對於女工姐姐黎講，女工同心合作社並非單純是一種商業模式，更是一種抗衡現時不合理的僱傭關係的運動，目的是為了改善基層弱勢處境，因此必須集結各方力量。例如，姐姐們已商討每月抽起部份利潤作為基金，支持其他合作社。又例如，店內會免費擺放各種弱勢團體的產品（例如環保再造肥皂）寄賣，支持基層運動。店內更可訂購有機蔬菜，支持本地有機農夫。佢地比起你同我，或者更加有政治意識！

如此種種，女工姐姐打破了我們對「師奶」只會留在家中、對世事不聞不問的刻板印象。佢地原本是一班工廠女工，可惜隨著九十年代工廠北移減低生產成本而失業。經濟好時加入就業大軍，成就高就業率；經濟唔好時就返屋企當家庭主婦，又從失業大軍名單中除名。呢班婦女可謂進可攻、退可守，經濟發展實在有賴呢班撐起家庭撐起社會經濟.婦女。基層婦女是弱勢中的弱勢，社會地位似乎不如男性──因為財政唔獨立，要依靠男人。而合作社正正就俾呢班失業婦女一個就業充權嘅機會：邊個話婦女唔可以一手一腳搞起間舖出黎？邊個話婦女唔識管理間舖？邊個話婦女唔關心社會事務？

如想更加清楚女工姐姐，請參閱過往訪問。

續約招標

女工姐姐最最最擔心嘅野莫過於能唔能夠繼續響中大經營女工合作社。呢個就關乎續約同招標制度，而依家個制度流程大概係：公開招標→簽約兩年→續約→簽約一年→公開招標→……即是女工姐姐三年入面總要擔心兩次。呢個續約、中標過程唔係咁理所當然的，而係要靠咁多位同學支持先可以成為可能的任務。

事關早喺2004、2005年，.劉遵儀.候任校長諮詢會上早已露出校方對女工合作社態度的端倪。劉被問及對女工合作社態度時指出，大學要講求效益、追求純市場競爭云云。其後校方高層一律反對女工合作社留任，差啲就要干擾大學師生中心管理委員會招標過程。幸好當時獲多位同學及陳健民教授力撐，學生會又為女工合作社想出一套計分方法為女工合作社計分，令其以一分之微中標。而之後，校方俾出嘅續約條件愈黎愈多，例如減少資助，水電煤雜費要合作社自己負擔、要交「地租」、要為特更同學購買保險，更被要求「創新目標」，尋求發展，令續約之路愈黎愈困難。

而喺今年，女工合作社獲校方續約，黎緊一年又可以喺中大服務咁多位師生工友。

而之所以能夠順利續約，多得中大基層關注組同學為女工做左約三百份問卷，俾校方睇到師生點睇女工合作社嘅食物價錢、營業時間、味道、服務態度等。所謂真金不怕洪爐火，而同學對合作社嘅認識同行動嘅努力（例如做特更、加入基關組幫手推廣女工合作社）就係比校方睇到女工合作社呢舊金。

飲飲食食

女工合作社歷年來大受同學歡迎都不無原因：好食又健康。有乜好食？

1. 滷水雞脾／雞翼：以陳年滷水汁煲成，好入味架！

2. 糖水：以新鮮生果製成，腐竹薏米糖水、南瓜西米露都是精選！

3. 雞蛋仔／格仔餅：堅持唔用現成蛋粉，用新鮮雞蛋，好味又有益

4. 茶葉蛋：特別加入藥材煲，健康又入味

5. 燒賣、牛肉球、「混醬」炒麵、中式包點、鴨腎、腸粉、粢飯、燸米雞、最近新增了蛋黃鹹肉粽，餘不一一

6. 其餘日常用品、零食軟糖、公平貿易產品都有

7. 想食有機蔬菜？呢度都有得幫你訂，唔少同學同教授都會訂架！

8. 搞活動想訂好多食物、飲品？呢度都有得訂！仲可以安排送貨上門添！

9. 除左飲飲食食，呢度仲有影印速印服務，想印好多野又唔想自己郁手就來吧！

特更

合作社.數年前續約時，被校方要求延長營業到一點半。或者我地都太習慣出面.便利店開到夜一夜，好似都幾合理咁──咪住！但諗真.其實根本唔合理，你諗下你呀媽晚晚一點半先放工、兩點幾先搭車（而且已經冇曬火車，中大冇火車都幾難搵到車番屋企）番到屋企，老公仔女都訓曬，沖埋個涼就成三點幾先有得訓；枉大學仲自認係「社會良心」。

不過幸好，我地仲有一班好有心.同學仔。基層關注組同學認為女工姐姐要搭尾班車返屋企照顧家庭，故此為合作社開設特更時段，即星期一至五晚上十一點至一點半時段，招募同學義務幫女工姐姐營運女工合作社，實踐社區內互助合作精神，減輕女工姐姐負擔。咁當然，你想做幾多日都係大家有商有量傾出黎。女工姐姐會認得特更同學，幫襯時候會同同學傾下近況，有時仲會多送兩粒燒賣添！呢份人情味，會.些粉見到嗎？

歡迎想實踐社區互助合作精神的同學電郵至基層關注組

grassrootconcern@gmail.com或聯絡kenneth（6422 5151）