平時服務︰福利品部、影印機中心〔學生會專題現況現場篇〕

文︰奇翼鳥、阿邊個
資料提供︰施城威、李彩娣小姐

相信絕大部分既同學都知佢響邊架喇，不過就未必知佢大名叫「福利品部」。福利品部同影印機中心就位於Snack Bar隔離。福利品部賣既野有包括各式文具、賀卡，服務仲有二手書籍售賣、舊書寄賣、Fax 服務、新思維書店寄賣、各式雜誌借閱。

不過，文具既話，大學書店有得賣，影印既話，拉靶都有得影啦，點解學生會仲要再設同類服務呢？其實福利品部都有係佢先有既獨家貨既，就係平過原廠價好多既代用炭粉啦同埋USB，另外，因為學生會本身的理念，所以仲有一 d 學運紀念品賣既，例如六四 tee，又或者一 d 關於社會運動的書。

上屆會長施城威（示威）話，學生會設置呢個地方除左想提高內部運作效率之外（學生會有大量文件要影印，由會室行去影印好方便），最主要既原因係希望中心可以「逼使」同學入一入呢個空間，因為呢度已經係學生會與同學最主要既接觸平台。另外，中心提供留影釘裝服務仲可以同女工合作社維持返一合作關係。

影印機中心新知

影印機中心早於87年成立，生意好左兩年，但89年因為職員工資大升，生意開始衰退。於是學生會就響90年改用儲值機以減少人手開資。

到舊年，學生會為左長遠地解決中心蝕錢問題，同埋改善影印機的質素，做左一些決定，包括cut掉4部黑白影印機，慳番每年萬幾蚊保養。又購入一部有「Booklet finisher」功能的黑白機，可供同學自釘小書。另外仲換了左部有雙面影印功能、快速且質素較佳的彩色影印機。學生會買返黎既5部八達通機岩岩降落左影印機中心，以後同學想影印就更加方便喇！

版權法定係知識流通？

之前響每一部影印機上面都貼有一張好嚴格的版權法律守則，不過自裝修 mit 左之後就再無則返上去。點解？示威話學生會既立場係唔贊同呢D阻止知識流通既條例，所以就唔再貼lu。

資料中心

唔講唔知呀，原來學生會有個叫資料中心既物體架喎，裡面包括圖書、中國民運資料、報刊儲存、近年中國民運書籍、剪報、圖片、學生刊物、最近一個月的報刊……聽落好似好多咁喎，不過聽聞使用率係近乎零囉，徙鬼晒。

場地借用

學生會負責管理文廣、天井位、富爾敦樓206室，同學如想借用，只須要去到會室登記。

職員講兩句

李小姐（阿Ann）1990年已經開始嚮學生會工作，可謂見證左福利品部既「成長」。阿Ann既日常工作包括場地管理、訂貨同埋一 d 行政既工作。佢話呢，福利品部裝修之後，成個 setting 好左好多，光線充足左，成個地方都好有朝氣，加上入多左唔同種類既貨，同學都多左黎。至於幹事會，佢話每一屆都會有d好有熱誠既幹事，好似示威咁，阿Ann話佢好幫得手架，會諗下點樣先可以搞好D福利品部，會諗入新貨同換影印機呀咁，真係方便到同學架。至於問佢對工作有咩睇法，佢就話工作量比之前雖然係大左，但因為成個工作氣氛都好左，有朝氣左，所以都做得好開心。