安居樂業 或 保家衛國 之 謊話連篇 07年4月號 文︰扮好奇 讀到內地的博客,對重慶「史上最牛釘子戶」的報導,總讓我一邊快慰,一邊不齒。「釘子戶」的講法,來自官方,人民日報都有講。同香港叫人做「釘戶」差唔多,即有人住在重建的地皮上,點賠都唔肯走。 之所以話,咁多廣告商撐住d傳媒vs世界的博客文化,又或者應叫做「民間報導」的文化下才有齣齣新鮮的發展。對於一個發生在重慶的收樓故事,仲搏得香港報章都要隔空伸佢一腳,就知傳媒可以有幾無恥…… 眾所周知的報章說法裡,香港人對一般重建issue都同情極有限,好似政府要重建一個地方d人就有錯咁,因為「重建戶不過恨錢,嫌賠唔足」,甚至十年前就「買落」等炒樓、等重建,總之就落釘等升值。 唔通政府同發展商,就係覺得個城市俾d窮人住到污糟邋遢?有人俾晒錢想發展?有錢收都唔肯走,要人出動「土地收回條例」大告特告先趕得走係正瘟神?唔通個世界真係有錢大晒,有人出得起幾十億起新樓所有野就要讓路?香港地少人多所以起幾多樓都住唔晒?地皮係社會資本所以要發展窮人就要彈開等發展商將公共資本私有?咁真係多謝報紙話俾我知。 但究竟增值幾多先叫高?用咩基數先計到?我唔知,我諗釘戶都唔知,因為佢日日做生意,對住街坊街里,算係服務社區,你要食,我要食,大家幫大家搵餐晏,互惠互利。如果每個人都係大財團,咁梗係個個幾十萬上落先叫好景啦,但係點解個標準會將每個人當成「藍籌」咁估值,一個人食幾多搵幾多,就好似每年冇一成增長,就係冇貢獻?咁我地由細到大讀咁多書又要我地愛國愛港又話安定先可以安居樂業,唔通想保住自己捱左幾十年先得到的住所,想先安內後攘外就係犯法?咁複雜的邏輯都可以自圓其說,難怪報紙要日講夜講,等我地adopt。 香港官塘深水埔灣仔重建戶出晒名;台灣有樂生院寶藏巖國際知名,但係香港最勁一招就係有土地收回條例,即係,政府要你搬,點都係政府岩,逾時都未走,就搵法庭告、搵警察抬。一輪威迫之後,就連應該在遷出時俾的「賠償」都拖你幾年,以唔俾錢你買到樓為懲罰。中大而家有Law School,同學不妨睇睇呢種法令實際上益緊咩人;而咁情況下的「客觀中立」應如何自處。睇報紙,你會睇到一如任何傳媒都對世事先設了一個等睇戲的態度,話係客觀中立,好似唔係佢地講,咁讀者自己就唔識客觀咁。 所以今次講釘子戶就明顯有心針對香港、台灣都不斷發生的重建問題,國內拆遷為奧運亦在這五年間火速推倒,務求把所有地方都可變成Manhattan或者New York。唔通外商去到中國香港見到d野個樣似外國會找到「家鄉」風情?會令外商放膽投資? 咁史上最牛釘子戶又點? 個體戶在大陸,這不打算理會私有權的地方,即使有了物權法,都唔望佢會正確執行,可想而知故仔個主角有幾堅。重慶釘戶是食店個體戶,正當生意,安居養家,兩公婆一住幾十年,生意都做左好多年。一個唔該發展商睇準地皮處「輕軌站」附近的,即如香港的地鐵站,地價貴左,「就應該做高增值產業」所以窮人就唔該行開,唔好阻住人地拎幾十億搞「高增值」。 政治我唔分析,淨講主角現時處境都威到震,屋企出面日日有工人開工,日日挖地基,而家佢地已經被挖成重慶的一個孤島。發展商為迫遷,由呃呃騙騙收樓,到咁上下就開始挖土動工前後只係幾個月,市政府當然坐視等睇戲。但係恐怖就恐怖在個釘戶唔驚,照住,死都唔出來。兩公婆守在屋裡,就係睇佢夠唔夠膽拆過去,仲日日掛出大banner,向來自各地聲援的其他重建朋友結連,也向著輕軌站上的人講發生緊咩事,有策略有溝通有支援,點睇都係太浪漫。 其實大家如果有睇港產片《怪物》,睇過林嘉欣就知,其實寮屋都可以幾好住,自己打造的私家house仲有露台食飯。睇落去就知,香港當年都發生過居民未走就拆屋有幾恐怖,因為有意無意都隨時爆石油氣,隨時搞出人命。而家重慶仲將釘戶屋外的土地挖成四層樓深的坑,實行迫佢冇水冇電自行投降之後賠都慳返…… 呢類報導在香港或許只為助慶,不是幫這邊罵那邊就是兩邊都鬧,把世界描述到得返a或b:好讓我們認定事情只有a,人民對政府錯;又或者b,政府對人民錯。最後我們依然由細睇到大依然感謝報紙替我們把與世界變簡單。 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 × 七 = 7 Δ