人神共憤的CHLT

文：專業中文唔知點解C+嘅憤怒青年

CHLT？講起我就扯火喇……
話說小弟高考中化有B，中文唔算差，仲識得背兩句孔孟添。咁中文大學話要讀中文，仲跟高考成績分班次，我當然諗住佢教我真係唔識嘅野啦。唔好話咩教你文本分析精神分析，打側個頭讀李白杜甫睇下有咩感受之類啦，就算講下新文化運動，教下明治維新對現代中文有咩影響其實都好有趣嫁。

殊不知，一個學期落黎，我坐左係課室四十幾個小時，居然只係教我讀下錯別字咁，七成時間重覆中學生都聽到厭嘅野。如果唔係老師尚算開明，肯按同學意願改動課程，原本仲有三四堂要教實用文添……

老老實實，學下歐化病句、語法結構都好嘅，中國人嘛。但大佬，既然分Faculty黎教，係咪應該有所調整？所謂唔用「XX性」一類歐化字眼，得個知字咪算囉，唔洗當永恆律令嫁。我就文學院嘅，你試下問文化研究、哲學系之類嘅同學，佢地對住傅柯、鮑德里亞之類我連個名都唔太識讀嘅西洋學者，到底用「XX性」有冇問題？海德格話乜鬼「此在的實況性與超越性」，莫講話唔係中文，連德文都唔係啦……

唔教人野，但又計出席率又計Grade，結果教嘅有點無奈，學嘅又悶到發瘟，何苦呢？上完最後一堂，我沖出課室呼吸新鮮自由空氣果刻，我到而家都仲記得，你就知大學中文對我傷害幾深。自此，每次我聽到三三四同學要讀兩三年中文，個心都會絞絞痛，好有衝動幫佢地誦下經添。

講開又講，早幾年劉遵義等人就改語文政策，叫你平時上堂咪鬼講中文，話國際化喎……好啦，明明就輕視中文，但大學中文課程就係都要教實用文，你話唔係為左教寫求職信先逼人讀我都唔信啦。拿，其實如果中文只係淨番搵工先有價值，或者校方都可以考慮，未來豁免修讀中文唔再係睇公開試成績，而係睇求職結果。搵到工，即係中文掂啦！如此一來，我相信又可以cut好大一筆教學資源啦。