反加宿費 刻不容緩——訪各學生會

日前，中大學生會聯同九間書院學生會發出聲明，抗議加宿費方案。以下是不同學生會幹事對加宿費的看法。

「簡直係撳住黎搶」

「7.1％真係接受唔到，」中大學生會會長張秀賢道：「前年同上年都已經加緊架啦，而家仲要決定年年加，佢地都冇理過我地同學。依幾年人工冇點升過，同學點比呀，依家啫係迫人唔好住。」面對宿費上升，一般同學尚且可以選擇不住宿，但對於全宿共膳的新書院，又是另外一個境況。敬文書院學生會會長陳柏熹說：「我地要住足四年，而宿費就要年年加，我地根本無得避。有宿生直頭形容係比人撳住黎搶。」

唔肯比資料，諮詢又求其

影響如此之大，書院對方案的解釋和提供的資料卻十分不足。新亞學生會幹事勞東來表示：「新亞出名窮，大家都信既，但係一個書院窮極都有個譜掛？問佢攞書院財政報告睇，睇下可以點樣拆掂佢，不過書院又唔肯比。」中大學生會副會長黃嘉輝補充：「就算書院真係冇錢喇，要同學一齊共渡時艱，咁大學呢？明明有咁多錢，點解要我地比先，啲錢唔用得？有幾多錢唔用得？大學完全冇提供過資料。再者，大學輔導長都話，大學唔會無錢，不過唔會用係宿舍度。」

除了資料本身的缺乏外，發放的途徑亦十分少。勞東來續道：「諮詢搞得一兩次，兼且冇乜人去，可想而知多數同學都唔太清楚成件事，但係書院就當係完成左任務。而諮詢會上，書院拋盤密密麻麻嘅數出黎，資料又唔畀帶走，同學好難消化得晒。」除了諮詢少外，宿委會投票的過程，更顯同學的無力，張秀賢道：「即使我地（宿委會內的學生代表）全部都投反對票啦，都冇用架，因為（會內）大學啲人實比我地多架，我地實輸架。」又道：「所以我地先要聯署。」

已超過2000個簽名反對

聯署短短數日已得二千多個簽名，「反映左同學都好不滿學校、書院既做法。」中大學生會幹事石姵妍說：「我地擺街站，唔洗點嗌咪，同學就已經自動走來過黎簽名。」中大學生會憑得來的二千多個簽名，向大學輔導長抗議，惟校方態度曖昧，黃嘉輝說「大學輔導長收到啲簽名後，都只係講話會幫手反映意見，至於個方案會唔會停，就唔知道。」

那現在形勢如何？「好急，依家大學個說法好模糊，佢大可以唔理我地照推不誤，抑或趁暑假人少，就嗱嗱臨過左個方案。所以依家一定要做多啲嘢，盡快截停方案。」張秀賢解釋：「我地已經去信校長，要求係四月初或之前開一次公開論壇，作出交待，希望同學多多支持。」