原文:Jaco
改寫:雷恩
原刊於中大學生報2014年《迎新特刊》

在一頭裁進去之前,或許你要先止住對上莊的美好憧憬,看看現實的裂痕。

 

作為大學五件事之一嘅上莊,每年都會吸引一大班Freshmen通街搵自己想上嘅莊。其實唔出奇嘅,入到大學,唔似中學見嚟見去都係嗰班人,為咗識下朋友、搵嘢做下寄託時間,最實際係有得加宿分,下年住宿要緊嘛!之但係,根據好多人嘅上莊經驗,上莊嘅伏咪話唔少,務必小心小心。

中伏 1:頹

所謂頹上莊,即是會唔開、嘢唔做、心知刻意潛水唔聽莊員電話等等。就係因為好多人上莊只為呃宿分,對支莊無熱誠,自然就頹喇!其實頹並非理所當然,你唔做,即係推咗啲嘢比其他人做,但做莊務係每位莊員本身嘅責任。我地眼中嘅「自由騎士」或許都有自己嘅苦衷,畢竟大家作為大學生,有太多嘢要兼顧:學業、家庭、愛情、兼職,我哋要學會尊重各人的取捨。不過,大家作為莊嘅一份子都有責任克己之力透過溝通協商,例如瞭解每位莊員的困難與需要,為他們訂下最底工作量底線,帶動莊員一洗頹風。

中伏2:chur

所謂 c h u r上莊,即是不停開會,活動多,工作量大。同一大班人一齊 c h u r,齊心向同一目標奔跑係一件好熱血嘅事,但 c h u r亦不一定乎合各人對上莊嘅期望。面對長期唔過三嘅 G . P . A .,因為長期熬夜而逐漸加深嘅黑眼圈,接踵而來嘅係莊員freeride/quit莊甚至冧莊。但亦不乏上chur莊做P仍然可以顧學業嘅例子,所以上唔上chur莊其實好睇自己時間分配同chur-able與否。不過,正因為chur,同每位莊員見面、合作嘅機會多咗,向佢哋學習同交流亦相對較多,可以識到一班亦師亦有嘅莊員盡全力去做好一件事,係一份極致嘅幸福。

中伏3:傾莊時間短

成莊前要傾莊,目的在於比大家互相認識同瞭解莊務,好好考慮上唔上,上嘅有咩做,但唔知幾時三次傾莊變成大部份莊嘅上莊要求:三次傾莊必須出席至少兩次(包括成莊日)。老老實實,三次傾莊玩下破冰遊戲、簡介下莊務加埋投票已經冇剩啦,真係可以傾到以後落黎果十幾個活動嘅內容?咁短嘅傾莊時間令你無咩時間搞清楚呢班即將同你共事一年嘅莊員諗緊咩,亦都未係好知自己想點,但都無計,惟有戴眼識人同喺藝墟、Fb page、上莊口中、傾莊環節做多啲資料蒐集。

中伏4:因循

咁又唔洗咁灰嘅,其實仲有好多有心人為實踐理想先上莊嘅,亦有好多人會抱著想學下嘢嘅諗法。但要小心,就係因為傾莊時間少,大家一開頭都會無咩諗法,加上開會前通常大家都無咩準備甚至無睇過agenda,開會通常都無咩突破。最差嘅情況係照抄上年份year plan,改個人名就照抄內容同rundown,令成支莊變到好機械化,人做我做,特別係抄埋上年d On9工作落黎,就慘㗎喇。如果開會前冇準備、開會先黎度橋,只會落得因循嘅下場。

中伏5:老鬼影響

老鬼嘅影響有好有壞,好就在於有經驗傳承、多啲勞動力幫手,同老鬼有好關係,可以令工作效率增加好多。但壞嘅就在於有啲老鬼有啲莫名其妙嘅權力慾,成日抬高自己前輩嘅身份指指點點或者諮詢,更甚者反枱辱罵候選內閣無熱誠,根本唔係想溝通。舉例,有人會喺諮詢嗰時問埋啲無聊問題,例如你記唔記得唒莊員啲電話同生日呀,知唔知中大邊度有廁所呀、捉你錯字呀,無嘢搵嘢嚟搞。平時又有好多無理嘅牢騷。

唔想煩,又覺得老鬼說話多少要聽下,就比人焗住做啲唔想做嘅嘢,例如明明成班莊員都覺得dem beat宣傳唔多有效率嘅,但因為驚比老鬼鬧頹,結果就被迫改變計畫……呢啲時候,就睇你肯唔肯企硬say no堅持己見喇!放心,只要道理喺你度,就會有人撐㗎啦,唔好淆佢。

 


上莊小字典

【Dem Beat】
喊口號配合手腳打拍子的一種宣傳莊手法,十一月以及一月為dem beat旺季,常見地點為火車站及YIA。

【諮詢】
上下莊聚首一堂,商討下莊來年活動計畫書,並讓上莊瞭解下莊的工作情況及進度。

【PIC】
Person In Charge,活動負責人。

【上莊 現莊 下莊】
前一莊、現在一莊、後一莊。

【傾莊】
有興趣做下一屆幹事的同學,聚首商討學會的未來目標方向的活動。

【Pro P】
Promotional period,宣傳期,是候選內閣以dem beat,派發政綱及福利品以爭取選民支持的時期,旺季為十一月以及一月。

【老鬼】
歷屆莊員,通常指已經畢業離校的。

【撼莊】
兩個或以上內閣競選,由於中大相比其他大學擁有更多上莊機會,所以較少發生,例子有上屆競逐幹事會的煥然與星火。

【Freerider】
又名自由騎士,泛指平日不出現但又坐享其成的人,亦指不做莊務的莊員。

【P】
President,莊的主席。

分享至:

Leave a Reply

Your email address will not be published.