原文:露宿生
改寫:我諗唔到
原刊於中大學生報 2011年《迎新特刊》

 

唉,宿舍又冇我份住,番屋企又山長水遠,啲車錢仲好肉赤添。咁咪唯有瞓中大囉,善用公共空間嘛,橫掂中大山明水秀,周圍都係瞓覺好地方。

瞓覺嘅地方大致上可以分兩種,一種係疑似宿舍配套嘅地方,另一種就係紮營嘅好地方。

宿舍替代品

1. 碧秋樓

話說碧秋1樓電腦房24小時全天候開放,好多人都會將啲電腦櫈拍埋一齊就晌呢度長眠㗎喇,冷氣又開足,電腦又快又任用唔嬲,仲唔係瞓覺同做嘢嘅好地方?仲有呀,你咪以為只有宿舍先可以建立到個人際關係網絡出嚟,呢度啲人見慣見熟,已經稱兄道弟,感情深厚到爆㗎喇。

2. 大學圖書館進學園

24小時開放嘅進學園,係同學完sem趕paper同溫書嘅熱門地方。進學園入面有好多可以瞓嘅地方,首選係入面一大排嘅大樓梯,用幾個cushions墊住自己,就好似有張床褥咁。進學園空氣流通比較差,夜晚會焗少少,不過咁就唔駛驚瞓覺凍親啦。唯一要注意嘅係最好帶返個眼罩,因為進學園夜晚嘅燈光都算幾刺眼。

3. 范克廉樓地庫學生活動中心,又稱玻璃房(范克廉樓LG)

LG玻璃房,入面有幾張梳化,冷氣又長開。聽聞附近學會啲人開會開到夜一夜都會走入去瞓個靚覺。筆者都試過晌度瞓晏覺,綠色嗰張梳化超舒服,你都咪話唔爽。想沖涼嘅話,上3樓就有間浴室㗎喇,想飲水3樓仲有個pantry添。

4. 范克廉樓三樓學生活動中心,又稱范記306(范克廉樓3/F)

以前有幾張雙/三人梳化,都會見到有啲同學無宿住就會入去瞓。但係可能OSA覺得不雅啦,裝修完之後換晒做啲單人梳化,仲要開宗明義話就係因為唔想比你瞓。之後有同學自己搬咗張二手梳化入去,OSA又有好多阻攔,幾經波折張梳化先可以留低。有同學會將兩張單人梳化拍埋就瞓,亦有同學直接瞓枱面。講真,呢度叫得學生活動中心,你理得我瞓唔瞓覺啫,你又係咪比個宿位我先?呢度最好嘅地方係有浴室同pantry,真係長期住晌度都得呀。你可能會話冇位擺嘢好似有啲麻煩,可以考慮LADY SHAW樓梯嗰邊冇人用嘅locker,善用資源嘛。

紮營好去處

1. 百萬大道

唉,百萬大道整到咁grand,除咗畢業禮間唔中會晌呢度搞吓之外,都好似冇乜用咁。咁就不如紮營啦!一嚟善用個空間,二嚟嗰度都幾好瞓,夜晚涼爽,又冇乜蚊。仲有呀,冇乜雲嗰陣抬頭望到一堆星星,好開心㗎!想像到如果有十幾個營排排紮晒晌百萬大道嗰種感覺都幾爽,各大學會搞O’camp不妨考慮吓咁做,搞起個紮營文化都好。最衰中大唔俾紮營(就係咁先刺激?),之不過咁,啲保安通常過左1點之後就唔會再巡,見到都只係勸喻吓,咁囉。

2. 獅子亭

清涼,舒服,唔會有保安巡,有瓦遮頭,唔嫌啲石櫈硬的話唔駛紮營都得。風景極優美,一眼望過去就係大大個未圓湖,而且嗰度相對嚟講都幾隱蔽,半夜三更通常都唔會有人經過嗰度,而且又好難會俾人望到,做乜都得啦。

3. 天台of MMW、U lib

MMW天台一定冇人巡喇,講舒服都幾舒服同涼爽。仲有啲長櫈晌度比人瞓,基本上冇乜事都唔會有人經過,只不過咁,嗰度好似有啲荒涼,咁囉。有人試過匿埋晌U lib某啲陰暗嘅角落,等到保安一走就上天台瞓,冇宿住,邊度都要瞓啦!

結語
中大是我們的,也是你們的,但歸根究柢也是我們的。學校有責任提供宿位畀有需要嘅學生瞓覺,但係現行制度上根本做唔到。所以喺呢個唔夠宿位嘅情況下,老友,將就住先啦!!!!

分享至: