〔英超月結〕A for Ashley!

{mosimage} 

文︰F.A

進入討論英超的維度，本來就是一件弔詭的事。

一方面它是世上其中一堆最令人納悶的事情︰四大豪門，打打殺殺。五年前，雲加 vs 雲佬；五年後，C朗單挑施治。弱肉強食、成王敗寇是其次，一輸就炒魷，一傷就買人先悶到變態。

艾巴莫域治以兩千隊大埔的軍費組織了ahistorical 的車仔，健康性感，個個都野獸版古天樂咁，成為一時潮流。雲加麾下的阿仙奴永遠係「禁室培慾」加「地波原教旨主義」，好睇唔好食，卻穩佔道德高地。利物浦繼續生產 false dawn，賓帥一年換一個，但其實托利斯謝四已幾乎缺一不可，遑論阿根廷二十年來最好的防守中場馬斯查蘭奴；後者如果受傷超過一個月，聯賽便可玩完。曼聯則是 King of Team B，後備軍容之完整令人咋舌，你以為C朗做手術朗尼中毒唔得咩，費查即刻入兩粒，奧沙又打高幾班，問你死未。

不過，一銀兩面，正因為咁，講英超又有番個重要性係度。個重要性就係︰人定勝天，以上四隊始終會有 tricky patch，終有一年壟斷可以被打破。而我地，每年，都覺得一定係今年。所以今年一定要睇英超！睇下班沙塵球星輸波個折墮樣，抵番咁多年的鬱悶。
 
今年有咩咁巴屎閉呢？今年形勢再平均左 d。紐卡企穩陣腳，新特蘭大幅增兵，熱刺死唔斷氣，米堡更上層樓……以上都係吹水唔抹咀。但真正吹猛水的係維拉︰輸俾史督城係核突少少，亦讓馬田拿神再次露底。但如果巴里唔離隊，而卡維唔受傷，維拉已一再證明，佢地係最有能力係禁區內製造混亂——所謂 goalmouth scramble——的球隊。

現代足球防守系統的 tactical maturity，其實已去到歷史新高。如果睇完幾年前米蘭對祖記的歐聯決賽都仲未服的話，可以翻帶重睇近五年的車仔對利記。馬基尼尼、米基爾、艾辛、夏文、謝四、馬斯查蘭奴︰呢類戰意百分百，位置感好，且永不吝嗇氣力的球員，如果配合得宜，陣地進攻的確幾乎針插不入。而死球同高空波正正就係呢班截擊中場的罩門︰個波下下係你頭頂飛過，睇你點鏟。

在這個背景下，我推薦維拉。馬田奧尼爾聰明又易於激動，艾邦拉賀有勇無謀，卡維慢得黎大份，阻頭阻定，巴里助攻之餘又懂得果斷犯規，你個曲街永遠心雄、係又上唔係又上，都是製造混亂的奇兵。但絕殺都係 Ashley Young！半翼半鋒，仲會做埋右閘，如果唔係黑人，你簡直以為佢係古治；而且出身屈福特，一睇就知佢 down to earth，唔會好似謝四或者碧咸咁以為自己真係與別不同，不可一世。

講左咁耐，終於到主題喇。主題就係︰做人就好似捧維拉咁，年年都望佢有料到，點知年年都係冇獎?，仲要唔駛護級，連驚?的機會都冇。但今年係唔同的︰每一年，每一年我們都要深深記得，今年，係唔同的。