文藝︳【影碟札記】落日孤兒／《三不管》

《三不管》
邱禮濤，2008年8月
淨係出影碟架乍！

文︰F.A

邱禮濤雖然留有老土一點的長髮，一個李健和式的背影。但作為一個電影工作者，佢真係其中一個最有「港味」的author。零七年的《降頭》、《性工作者十日談》，幾年前的其中五齣《陰陽路》、《四人幫之錢唔夠駛》、《等候董建華發落》，九十年代中cult到傻的《伊波拉病毒》——無論budget大小，有工就開，一樣可以言志。

《三不管》於八月十幾號推出影碟，林家棟、連凱、杜太田蕊妮擔正，仲有《愛情萬歲》的新女方皓玟。

故事以未來「某城」為背景。某城有一「三不管」地段，是政府由得所有犯人、毒犯、妓女自生自滅的野地。差佬連凱有日捉住重犯林家棟撞車，撞左落呢個「三不管」區度。劇力就係咁爆發喇。首先，三不管寨主烏鴉最憎差佬，於是連凱就即刻話佢自己係犯，林家棟至係差佬。其次，居民田蕊妮原來係林家棟被拋棄以致流落野地的少婦。於是佢又屈林家棟係差佬。但與此同時，田蕊妮的女兒方皓玟由於成日覺得田蕊妮卑躬屈膝，冇d志氣，而且亦唔知道林家棟係老豆，所以反而希望偷偷釋放林家棟，並叫林家棟帶叫出去「外面世界」。如此這般，連凱同田蕊妮心心相印，林家棟同方皓玟兩父女則幾乎搞埋。

最後，由於黑市血液傳播的病毒散布「三不管」全區，於是政府下令屠城。田蕊妮為左救人身染病毒，瓜左；連凱天真到以為政府會唔殺差佬，瓜左；林家棟覺得自己終於要做番次好人好老豆，瓜左；烏鴉等所有「下等人」，俾政府開槍怒射，瓜晒。死淨一個方皓玟，背負所有人的記憶，一個比雲吞更大的太陽，出番去。

講到咁清楚，其實都係一句。齣戲雖然冇正場，但製作一點都不馬虎，值得支持。

至於個主題，如常，就係從林家棟與連凱的「身分戰」裡面向自己——香港人——發問「我係人定係鬼？」。裡面的伏筆當然係，有d人為左著數，或苟且保命，做人有著數就做人，做鬼有著數就做鬼。進一步再去的就係︰人同鬼生而平等，你係人定係鬼不過陰差陽錯。點解人要歧視d鬼？至於個結局則係︰你想做人定係鬼，係有得揀的。

落日孤兒，廿五歲的方皓玟點睇都成熟過梁洛施，在《投名狀》《赤壁》君臨天下的時代，港產電影背靠夕陽，但死唔斷氣，仲有死淨種喎。你仲唔買番隻碟支持下？