近排又聽到有同學講書院共膳,除咗一直講開嘅菜式「新奇」,唔夠熱,仲有煮唔夠嘢食。雖然我住咗中大幾年,但因為住舊書院,所以對共膳仍然相當好奇。上網睇返同學對共膳嘅意見,似係好壞參半,有啲話方便唔洗諗食乜,有啲話咁早食飯有時堂都未落。多得有同學設立「真.敬文共膳關注組」[1],喺網上分享共膳菜式,我先第一次見真身,其實睇落雖然比唔起高級餐廳,但都唔算太差。

近排又撞到新書院嘅同學,講起食飯,佢都認為雖然有時有「驚喜」,但整體食物質素都唔算太差。「咁係唔係好似哈利波特咁呢?」——出於我嘅幻想,佢就話都係好似平時落餐廳食飯咁,七時入席食飽就走,有時唔啱胃口,食唔飽都走。除咗本身已經識嗰幾個,同檯都無乜溝通。我僅餘嘅幻想都隨即幻滅,共膳原本都係為咗促進師生交流,究竟係乜嘢原因導致今日嘅處境呢?

對於共膳,相信同學曾幾何時都有過某種幻想同憧憬。今日嘅共膳,雖然偶有食物質素問題,但又未至於不可接受。問題何在?或者,氣氛只係被單調嘅重覆沖淡,一年百幾次共膳,重重覆覆,同學未入埸都已經有畫面,難免生厭。煮得好食啲固然係當務之急,但如何重拾溝通同熱情,似乎唯有靠同學同書院嘅想像力啦。

詳見:中大學生報二月號

[1] https://www.facebook.com/cwccommunaldinnerconcerngp/

分享至: