文藝︳【電影札記】二零零九,全線大飲茶! /《大搜查之女》 文藝, 09年1月號 麥兆輝、莊文強︰《大搜查之女》主演︰陳奕迅、鄭秀文、駱應鈞、劉浩龍91分鐘/廣東話 文︰F.A 新年︰一路砌一路抖 零九年番鬼佬新正頭,飲茶清熱氣用的港產片不作他選,一定係Sammi井闊別銀幕三年的《大搜查之女》。 麥兆輝自《無間道》系列之後,一直予人進退失據甚至食老本之感。《情義兩心知》扮唔老土,《傷城》冇貨,內涵完全襯托不起影像的富豪格;反而那堂眉亂棍撞中,成為了朝偉在《色,戒》中扮演漢奸的預敘。至於幕前,陳奕迅快將半紅不黑,最緊要有新聞;劉浩龍人到中年,越黎越顯得going nowhere;鄭秀文久休復出,慶祝擔當打工皇后二十年。悶悶不樂的格局,一月一號打正旗號,前追《神探伽俐略》,後抗月中吳宇森《赤壁》續集。正正是香港氣氛,劣勢過後,不必蓄銳一擊,反而且戰且走,抖順條氣,又係一條好漢。 男女︰陳奕迅忠告港女 唔好墮胎 故事看似曲折其實十分簡單。千迴百轉與其話為了好睇,不如話係為左在有限的劇本中安裝無限的明星,全線一齊飲茶! 黑道中年富豪陳奕迅經營紅油走私,有日突然俾公安收檔,黃德斌大爆炸。陳號令停工數月,以靜制動。他的兄弟終於頂唔順,上門講數。同時間佢個寶貝仔被綁架,案件由突然懷孕的Sammi井接手。峰迴路轉,最後陳奕迅為左救仔,唔理Sammi井勸告,自投公安羅網,Sammi井則接受陳奕迅勸戒,放棄墮胎,士weat士weat等做媽咪。如果咁都激你唔死,大陸公安捉到E神,志得意滿,令人突然明白高潮位早就過去,一定激得死你。 一句到尾,陳生身為男人,為左頭家,幾唔好受,都要頂硬上。Sammi井職場上遇神殺神,不過是打份工,早一刻收工,就可以早一刻番屋企,攬住「彫刻家」男朋友陳子聰過世。中年導演中年男女,戀家尚可照單全收。但高潮係陳鄭二人one on one秉燭夜談︰陳奕迅叫人唔好墮胎,高叫「呢個世界就係咁老土」,問你死未! 我本人完全談不上贊成墮胎,但個肚係Sammi井個喎,關你陳生叉事咩。做係佢做,血係佢流,養係佢養,你除左咁岩係男人又咁岩有財有勢之外,有咩資格評頭品足話人唔負責任呢。至於鄭秀文,「雖然情場失意但一樣咁能幹」,如果反過來讀,就係「雖然何其咁能幹但一樣要有男人」。繼《森冤》的舒淇之後,Sammi井再次接棒延續強悍港女假自主的老笠神話……算啦,新年流流講過第樣。 警賊︰破綻大飲茶 好,換個角度︰如果當是黑白兩道角力的嚴肅推理片,可以點睇?真係冇眼睇。鄭秀文出差三十小時,陳子聰就搞掂座彫塑、賣埋俾地產佬、安放係天水圍一塊草地、俾人打埋劫、執乾淨屋企等女朋友放工。一隻船都只能裝到幾萬升紅油,幾萬升紅油亦只值十幾二十萬,陳奕迅得果十幾架貨車,點可以養起一個千幾人的字頭?綁匪點解好意思問佢拎八千萬?退伍軍人張國立一條寡佬唔駛做,專心捉陳奕迅,兩下散手就搜集到陳的犯罪證據,既然係咁,仲駛乜勞斯動眾至可以拉人?徐子珊既然係黃德斌女友,點有可能陳寶轅會唔知?冇所謂啦,賀歲片嘛,咪咁挑剔…… 南北︰中港冇合作 中港一家親,走私故事點可以冇大陸情節大陸演員呢。講開又講,所有大陸戲都唔得,麥莊二人對國同胞的想像真係勁乏味,勁冇心機。 張國立咩軍人咁巴閉間屋大到咁?每場戲中港演員都冇化學作用,全部大陸角色都勁單線條,著曬老西,反而成個白痴咁,以為自己破到個走私案就真係除暴安良,慳D啦。如果話這個眼光是故意的,也就無異是歧視了。不過換個講法,大陸幹探霎下霎下,就捉到賊王;一路控制大局的鄭秀文卻不邀功,只求早日收工,能力不以紙上功勳計量,志氣隱而未發——這也未嘗不與香港的自況暗暗切合。 飲茶︰中生有保證 講下講下已經唔知講緊乜。總之,我意思係,其實《大》是喜劇,人才濟濟,值得捧場。陳奕迅終於做小生唔做小子,快慢得宜,長中短距離咩都得,連與菲傭的小型拉鋸都一樣交戲,如果一定要話佢似邊個,我會話佢令人諗起張兆輝。智叔、張同祖、劉浩龍、駱應鈞四男對奕,以諧劇方法塑造歹角形象,搶晒。葉璇扮陳奕迅個仔的老母,但更似陳奕迅老母;所謂try too hard,大概就是這樣的意思。徐子珊再露兩手,幾場戲都有壓場魅力,杜汶澤完全冇定企。陳子聰只需要做自己,但在提款機前疑似叫雞的春情令人一鏡難忘。Sammi 井熱身半場,漸見功架,未必是名副其實的喜劇女王,咬字長lur長有,手軟腳軟,而且角色能夠表達的空間也是有限,但至少比楊千嬅之輩更有活力,感情操控純熟正派,It's a real good day in the office。 年頭年尾,人生七上八落,大家萍水相逢,港產片吹雞,冇話唔飲茶。 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 × 二 = 十六 Δ