「西宮夫人:

我係一個year 5學生,由六月開始一直都有支持呢場運動,雖然唔係最前線,但「和理非」嚟講都好勇武,會喺屋企附近擺街站(利申:住大西北,冒生命危險)。但關於罷課⋯⋯我Year 5喇,我想畢業,亦都唔想爛Grade⋯⋯

——生不逢時的97寶寶上」

生不逢時的97寶寶:

首先,我覺得你太驚。罷課,唔等於畢唔到業或者爛Grade。相信大家都試過走堂,甚至有人會走一星期去旅行都好平常,你會唔會真係因為走咗一兩堂而爛Grade、畢唔到業?照現時講法,罷課遠遠未去到會令你Defer嘅程度。所以你唔駛咁驚住。

的確,未來真係有機會變成無限期罷課,代價遠比罷兩星期高,但係可以到時再算啦。諗返呢個夏天,成個香港都付出咗好多,有咁多手足為今場運動而犧牲、被捕、頭破血流,而罷工嘅就可能已經冇咗份工。要改變個社會,總係需要好多人付出同犧牲,你覺得你自己做到幾多,都係要你自己判斷下?

西宮夫人上

「西宮夫人:

依家學界叫緊人去罷課,我唔知罷唔罷課好。

呢三個月好累,每個星期六日都留咗去發夢,我唔知罷課之後有咩用。

罷課之後係咪又只係延續之前三個月嘅堵路、和理非集會、撚狗呢?好似已經塞住咗喺呢個位好耐,同埋呢啲嘢喺星期六日都做到,唔駛罷課都得啦。夫人,你點睇?

——戴著3200食催淚彈放題的街坊上」

戴著3200食催淚彈放題的街坊:

我會話,罷課本身就係攬炒,即係如果佢唔讓步搞到好多人啲科F晒,校方行政上都會好煩。而且學生長期罷課本身就好大件事,所以遠遠唔係無用。

而且我估好多人都無諗過嘅係,罷課可以比我地抖下。所謂「大家都累了」(Lam, 2019)都錯唔哂,講真由六月Chur到依家,都真係唔嘢少。如果想九月十月繼續作戰,就必須要有抖下嘅時間。罷課的話,一方面可以持續出去抗爭之餘又有得抖下,另一方面真係多咗成堆大學生,要聚埋一齊用大學生名義搞啲嘢,例如迫校方高層表態都易好多。

西宮夫人上

「西宮夫人:

我200萬+1嗰陣有出過一次,平時喺Facebook、IG都會望下朋友Share嘅新聞,大概都知發生緊咩事。本來我冇諗過咩罷課,但有好熱血嘅朋友問我罷唔罷課,我為免尷尬,就講咗會考慮下⋯⋯但其實我就冇認真諗過,但唔太想諗同唔太想罷。

——冷氣妹上」

冷氣妹:

其實你咁樣問得,你個心都有少少想罷啦。只係你一直都唔係咁主動參與,估唔到自己會願意做到罷課呢一步,所以先喺度同我講,可能你都想睇下自己會唔會被說服,又或者你想Justify自己唔罷。

我自己都有朋友以前唔關心政治,從來都冇去過遊行。但自從6月出過一次之後都有Keep住出去,仲會主動約我去遊行。我都好詫異,點解個變化咁大。但佢哋嘅講法都係話,喺參與運動嘅過程當中,遇見觸動到自己嘅事,令佢哋想繼續參與喺運動裡面。

我會話,試下,睇下你會從中感受到啲咩?

西宮夫人上

分享至:

Leave a Reply

Your email address will not be published.