電台？收音機？

訪、文：TF

講起電台，大家嘅印象可能係收音機，但中大校園電台會同呢種印象完全唔同。電台除咗聲音、都會有影像，滿足視聽感受之餘，向同學帶出唔同資訊，再進入各種討論。筆者邀請到第 22 屆中大電台台長陳衍諾進行訪問，講下電台嘅各種事。

電台係一個點嘅組織？

陳：記得喺傾莊嘅時候，上莊同我哋講，電台係一個好自由嘅地方，你想拍啲咩、做啲咩，都冇乜人去規管你，加上資金來源係學生會會費，唔會有任何商業考量，所以可以做到好大程度嘅編採自主。我都同意嘅，無論係拍片、開 Live、做新聞、甚至可以寫下少少文，我覺得電台同時係一個 News media 同 Content creator 嘅學生組織。

電台嘅工作就會分成兩方面，校園同社會。校園方面主要監察返校方同學生組織做嘢有冇問題，或者報導書院入面有冇發生特別嘅事。社會方面，我哋同其他校媒、學媒做緊嘅嘢都一樣，就係運用第四權，監察當權者、執法者。我哋會堅守報導事實，有一個持平嘅報導。

你哋有咩節目？嚟緊又想拍啲咩？

陳：我哋一年入面通常都會計劃大約十個節目系列，當中有幾個可以同大家推介下。首先係《由稜試下吖！》，呢個節目會係一個實測類型嘅節目，無論係日常生活定係中大入面嘅迷思，都會去做唔同嘅實測，喺宣傳期期間亦有《尋找口罩的故事》。第二個係《#Hashtag》，會係針對一組字眼，揾專家訪問，亦會揾同學做街訪，例如較早前嘅《#黑記》。仲有就係《稜聽》，呢個係一個直播節目，開個台同大家去傾下一啲校園生活，會事先喺社交平台上面收集大家想傾嘅野，亦會有 Phone-in 環節，同大家傾下偈咁。呢啲未來都會繼續拍，亦會有其他唔同嘅節目，大家可以期待下。

係電台，定電視台？

陳：咁電台呢個命名其實都喺頗耐之前出現嘅，我諗嗰時都冇預計過依家新媒體嘅發展係咁快，但我哋莊除咗拍片，亦都有保持電台嘅元素，例如 Phone-in、直播等等。雖然我哋拍攝節目會比較多，可能覺得其實就係電視台，但我認為唔需要拘泥於個名上面，因為作為校園電台嘅責任，最主要係可以做到提供唔同資訊、拍唔同節目畀大家，無論係資訊性嘅、娛樂性嘅，又或者係政治、時事議題。另外亦都會想大家多多斟酌個製作成品，喺睇完節目之後，可以明白到我哋想帶出嘅信息。

電台與學生報都係校園媒體，兩者有咩分別？

陳：學生報好多時都會有佢哋專注嘅議題，例如國際、勞工等等，而呢啲會係電台比較少接觸到嘅，因為電台會偏向資訊性多少少。另外，兩者嘅發放方法亦都會有唔同，學生報有佢哋要出版嘅刊物，而唔同議題嘅文章亦會喺刊物入面見到，但電台製作嘅節目就會直接發佈係社交媒體上面。同時，學生報可能會以筆者嘅角度去出發，而電台就會訪問到唔同嘅同學。但其實亦冇需要特登去區分兩者，兩邊都做得好就兩邊都睇哂，見到啱睇嘅內容就去睇咁。

國安法對電台有咩影響？

陳：會分開節目同採訪方針兩方面。首先係節目方針，其實好老實咁講，我哋喺 6 月尾嘅時候，即係講咗會有國安法但未有條文嘅時候，我哋拍緊一啲講敏感議題嘅節目，用一種隱喻嘅方式去暗示香港現況，甚至之後嘅影響。但尷尬就因為國安法好快出咗，我哋依家都仲溝通緊，應唔應該繼續拍、繼續出呢？因為唔知政府仲有冇踏紅線嘅呢支歌仔，你見到條文都寫如果用媒體去散播煽動國家或者政權嘅內容，就可能會構成罪行，佢個界線會去到邊到呢？我哋係咪要嘗試做呢樣嘢，去試下佢條紅線去到邊？所以我哋仲傾緊，究竟條片出唔出，出嘅話點剪，點樣去處理，其實都幾大影響。作為一個 Content creator 嘅角色，會比較尷尬，不過我哋會盡量出。

但你問我哋驚唔驚，咁就一定會囉，因為始終係一支莊，唔係自己一個。雖然唔會話佢殺到嚟，我哋乜都唔做，但空間已經冇咗，要自己去摸個位置，所以我哋處理嘅手法會變得困難。新聞方面，最近有人因為手機有革命句子，或者有一支港獨旗而畀人拉咗，如果我哋去報導，又有冇問題？但我哋覺得冇可能唔報，但在於要點樣報，甚至可能我哋認為係如實報導嘅，但當權者可能會覺得我哋咁樣都算係協助煽動顛覆國家，所以我諗呢一個位會係最困難，但就算驚都好，都要盡量去報。

對新聞有咩看法？點解會堅持做？

陳：試諗下如果依家社會冇咗記錄者、觀察者嘅角色，冇人係現場入面記錄，冇鏡頭拍攝，唔好話真相先，就連我哋想以事實作根據去報導出嚟嘅都會難咗，咁再去接近真相嘅呢一步就會更加遠。所以我哋覺得出去做採訪，去進行一個新聞工作者嘅工作，發放資訊畀大家係令大家喺呢個資訊爆炸嘅年代，更加明白到社會發生乜嘢事，做一個事實嘅報導。

點解堅持去做，我諗大家都會有掙扎，我哋莊就秉承一個「多個鏡頭多個真相」嘅概念。但係採訪之後點樣用啲素材，先係會區分大家做緊嘅野係唔係一樣。而我哋依家會選擇比較多以 Soft News 形式報導，我哋覺得主流媒體裡面，少啲講到抗爭者嘅故事或者感受，多數只係現場發生咗乜嘢事，一啲好基本嘅資訊，所以我哋會 盡量去做一個彌補嘅角色，嘗試去補返傳媒生態入面缺乏嘅位，令大家收返嚟嘅資訊唔會太單一。我哋其實點都唔會夠傳統媒體爭，係咁嘅情況下唯有去搵啲突破位，但我都唔知得唔得㗎，大家試下咁啦。

電台同聽眾關係？

陳：聽眾 Build up 返嚟嘅，雖然唔知睇我哋節目定係新聞先算聽眾，但暫時嚟講都比較單向。我哋上莊時候嘅願景就係可以定時問到同學嘅 Feedback、做更多訪問，就算同學唔係參與製作，只要節目有同學嘅元素，會覺得成件事會好過得我哋去做。但奈何疫情關係我哋做唔到，返到嚟中大都唔會見到咩人可以做街訪。我哋參選嘅時候好強調「中大人嘅電台」，但去到依家上咗莊 3 個月左右，你話做到嘅互動、溝通都比較局限喺其中一個節目入面，好似我哋喺 4 月 1 號嘅《稜聽》係關於 Pass／Fail，但吸引嚟嘅就只係學生代表或者關注 Pass／Fail 嘅同學，未真正做到屬於中大人嘅電台，但我哋會嘗試去做得更多，例如會招收唔同類型嘅 Helper，亦會同佢哋開會，盡量聽到更加多人嘅意見。而依家嘅關係，我可能會比喻成我哋單戀緊同學，但同學就唔係幾 Show 我哋。

如何令同學關心校園事務？

陳：呢個係一直以嚟中央組織都面對緊嘅。一嚟係，實際上有唔同學生代表做緊嘢；二嚟，就係同學期望校園媒體提供到乜野畀佢哋。有時好尷尬就係我哋發放左一啲相關嘅資訊，但係又好似冇乜人理，有時候純粹用文字，同學就未必得閒睇，或者係 Too long don’t read，所以要令同學更加關注校園嘅事，可能就係集中報導件事嘅重點，用最少時間令同學吸收到最基本嘅資訊，咁大家只係睇一陣都可以知道，如果時間許可咪可能用節目去包裝佢，吸引多啲同學。

對下莊有咩期望？

陳：我唔想規管佢哋，但都分幾方面嘅。首先係令到同學知道電台唔係一個好單向嘅組織，可以同同學雙向嘅，我哋成日會話電台係一個幫大家發聲嘅平台，所以唔係只有我哋畀嘢同學，而係同學都可以畀啲嘢我哋，然後講出嚟，會係校園方面嘅一個大考驗啦。另外我哋堅守以事實為本，唔可以為炒作而出，發佈嘅都要係事實，唔可以違背呢個公權、第四權，一定要監察到相關嘅人，呢個係責任方面要追求嘅。第三，要承諾除咗新聞製作都要有節目製作，雖然好難，尤其真係做落就會發覺難度係咁高，但真係要有，如果唔係就好單純成為一個學生新聞媒體，而唔係一個大家選嘅時候，期望會拍節目嘅一個組織。最後就係電台始終係一支莊去做嘢，都希望可以主動啲做嘢，同講下自己嘅諗法。

有咩想同 Freshman 講？

陳：入到嚟都會成為中大一份子，大家要記住當初點解要揀入嚟，同時喺中大發掘唔同靚嘅地方。如果以電台身份去講，大家關注電台可以有更多資訊之外，如果真係有興趣，無論係節目製作又好，新聞製作又好，可以睇下電台會唔會係一個發揮到自己嘅地方，因為你出到去都冇乜其他咁自由嘅地方，所以有興趣嘅都可以去試下。