由稜再試下 ——訪電台臨政

訪、文：木水

作為一個唔再新鮮嘅新鮮人，好記得喺舊年迷惘嘅時刻，接觸到中大嘅第一樣嘢就係 infopage，再之後就係校園電台製作俾新生嘅節目【1】。今年，逗笑嘅節目【2】同埋大量嘅即時新聞已不復見。喺冇下莊同埋現時嘅社會氛圍底下，電台選擇點樣面對？我哋有幸邀請到現屆中大校園電台臨時行政委員會主席、第二十二屆校園電台編輯委員會「稜聲 RingTone」嘅財政張卓琳同我哋分享佢嘅睇法。

學生報同電台有咩分別？

張：如果你問我兩支校媒最大嘅分別，一定係講緊個形式，學生報會定期出紙本刊物，每個月會出一次，特別日子都會出，例如民運特刊、迎新特刊等。電台主要活躍於社交媒體，唔會有實體嘅嘢出嚟，亦冇强制要幾時出嘢，幾時想出、出啲咩都冇咩所謂嘅。

可能好多人話我哋路線唔同、關注點唔同、電台又好似中立啲，但我自己就唔會噉睇嘅，因為電台喺哩方面好自由，冇規定邊啲類型嘅製作係一定要做，好多時可能係莊員諗到想做啲咩就會去做。例如有莊員好鍾意足球，就拍咗中大男足，或者有啲 Beat 係跟開嘅，例如社運之後先會有法庭新聞哩條 Beat，就冇話做死邊一樣嘢。噉當然都有啲係一定要做嘅，例如代表會直播、一啲校園新聞，我自己唔覺得兩支校媒有好大分別。

見到你哋今年嘅節目少咗，除咗係因為係臨政之外，仲有冇其他因素影響？

張：如果今年同上年對比返，今年少咗節目同埋好多即時新聞。先講即時新聞，主要係因為社會氣候唔同咗，我做正莊嘅時候有好多唔同嘅社運 event，會派人出去做即時，但依家少咗好多相關嘅嘢，所以我哋都唔會派人去做，亦都唔會好似傳統傳媒噉跟足所有新聞，因為我哋根本就冇噉嘅能力，所以社會嘅即時新聞少咗，社會新聞都少咗。

節目方面，臨政哩個因素影響好大，因為我哋臨政得5個人，以前電台係成 12、13 個人，拍節目金錢上嘅成本可能唔高，但人力成本大。如果想個節目好睇嘅話，需要做好多事前準備：諗idea、度橋、諗喺邊個位拍、節目想做啲乜，拍嘅時候要有幾個人揸機，喺唔同角度影過去、收音、後期剪片、加 effect 、加 animation。其實所有嘢都好耗費時間，同埋需要唔同嘅人負責唔同嘅嘢先做到，所以依家真係好難做到好多製作，加上我哋宜家需要兼顧校政（學生會風波），我哋都要返嚟開吓會，出返啲相關嘅新聞。其實我有少少抱歉，我哋臨政期間真係冇出過啲咩製作或者片比大家睇。

啱啱你都有提到學生會風波，你同你嘅莊員點樣睇註冊或者學生會風波？你哋會唔會遇到啲咩分歧？如果有，你哋會點解決或者點作出共識同埋決定？

張：好多其他同學，或者喺學生會架構內嘅同學（例如屬會）對哩樣嘢（學生會架構）嘅概念都好模糊。藉住哩個機會，我都希望釐清返啲概念。我覺得最需要釐清嘅就係，註冊哩件事唔淨只係幹事會，即係朔夜（臨政）班人去註冊，而係加埋其他組織，例如我哋、你哋學生報、代表會等中央組織。受影響嘅唔單止係學生會，而係全部人。

至於點睇註冊，我哋電台一定有立場，每個莊員有自己嘅立場，成支莊都有自己嘅立場，但我哋唔係好想同大家講我哋點樣睇哩樣嘢。企喺校媒哩個身位，我唔想好直接同同學講我哋支唔支持註冊，因為我唔想好似帶風向噉引導大家投票。無論係一個校內嘅投票又好，係一個社會嘅投票又好，都一定要選民自己吸收唔同方面嘅資訊，再去獨立思考，而唔係聽完人講就做決定。我會話我哋點都有立場，但就唔會公開講。我哋應該遲少少就會出返個懶人包去講返註冊係咩、對中央組織同基本會員嘅影響係咩，希望同學會了解一下，先做一個謹慎嘅決定。

喺註冊哩件事上同學參與嘅機會都比較少，一開始係代表會通過咗決議，然後孫同學去覆核，先叫有同學參與哩一環。同學喺哩個時間可以做啲咩支持返學生會，或者喺哩個社會氣候下可以盡力做啲咩？

張：學生會或者各個學生組織，最迫切嘅問題一定係註冊。好快就會搞公投（全民投票），同學可以盡返選民、盡返學生嘅責任，了解件事係點，個爭議點喺邊度，影響喺邊，最基本嘅就係中大中央學生架構究竟係點，佢係點樣運作。我明白哩樣嘢係有啲複雜、有啲難明，我自己都用咗好耐去消化哩樣嘢，但我覺得作為一個學生，哩樣嘢係必須要知道。

再長遠少少嚟講，就可能係一啲校園事務，除咗我哋學生會之外，其實仲有好多事務，例如自己書院同埋 faculty 嘅嘢，又或者再宏觀啲睇，校園保安嘅嘢，全部都好切身噉影響到大家。我哋校媒嘅職能就係將哩啲資訊帶俾大家，但睇唔睇哩啲資訊、關唔關心哩啲議題我哋控制唔到。希望我哋可以幫到大家更加容易去理解件事，更加願意去 involve 。

其實一路以嚟嘅選舉，例如幹事會、電台、學生報嘅選舉投票率都唔算好高，但今次公投真係所有同學、所有基本會員都會牽涉到，真係希望大家利用自己手上嘅選票，提高返個投票率。社會氣候嘅話，我覺得我自己冇咩資格叫大家要點做，我又唔係邊個。關返少少 CU 事嘅，就係當中大同學要上庭嘅時候，去旁聽支持下佢哋，係我哋最基本會做到嘅嘢。

國安法有冇實際影響你哋嘅運作？

張：實際運作嘅話，臨政階段係冇嘅，因為我哋真係做少咗好多製作，噉新聞都係寫返事實啫，最多咪斟酌下啲字眼（有冇落錯，夠唔夠持平客觀），我相信就應該唔會干犯國安法。但上年正莊嘅時候，可能舊年迎新都有講過，我哋節目本身關社會事件事，但因為國安法都有少少猶豫應唔應該繼續拍落去，所以個節目最後都係冇出到街。其實我哋內部點都會擔心，近期嘅蘋果日報事件、港大學生會事件、各大專院校同學生會嘅關係變差，令我哋唔知究竟會點行落去。條紅線咁飄忽，我哋又唔知條界喺邊，點都會擔心。但實際上有冇令我哋嘅 production 改變，又好似冇。

嚟緊迎新你哋會唔會好似舊年噉樣出一啲俾新生嘅節目？就算唔出都好，會唔會想同新生講啲咩？

張：如果做到新節目當然想做，但因為人手問題睇下可唔可以盡量去做啲咩出嚟，啲懶人包又好、報道又好。同新生講嘅嘢…..歡迎佢哋入中大啦！如果你係一個新生，最緊要唔怕嘗試，咩都試下，參加有興趣嘅 soc 同埋活動， reg 下啲覺得會爛 grade 但學到嘢嘅 course，唔好怕嘥時間，噉先知自己想要啲咩。如果對 video production、做新聞、玩器材有興趣，噉咪嚟 join 下電台囉，遲啲我哋搞 o-night、傾莊，都可以過嚟試下，噉我就會有下莊喇！

哩個時勢下你仍然會期望有下莊，或者下莊會上得到莊？

張：有冇下莊哩個我覺得真係未知之數，一嚟唔知公投註冊哩樣嘢會點樣影響成個學生會嘅地位同埋前路，二嚟各大專院校唔同嘅學生組織，唔單止校媒，幹事會其他組織都好，都面對緊斷莊潮。上年因為我哋揾唔到下莊，又唔想電台無啦啦斷莊，抱住監察校方同社會嘅理念，所以先上臨政。有冇下莊哩個我真係唔知，但宜家都二十幾屆，希望可以傳承落去。

對下莊有咩期望？

張：又冇嘅。始終電台係一個好自由嘅哋方，想做咩都可以去試，所以就冇話咩一定要做，要框死佢哋，但一定要好好守住我哋嘅操守。有好多學生記者都被人狙擊話唔專業，所以喺哩個情況下更需要堅守我哋

嘅操守，我哋出嘅每一樣嘢都係要基於事實，唔好捏造啲嘢出嚟。寫報道嘅時候、做節目嘅時候……淨係寫報道嘅時候啦，盡量唔好加咁多個人情感，我哋最主要嘅目的都係傳遞一啲資訊出嚟。最重要嘅係保住自己嘅熱誠，自己當初想做電台、想做新聞嘅原因，同埋堅持，唔好因為環境或者其他人嘅睇法而放棄或者迷失。

註：
【1】製作俾新生嘅（搞笑）節目
【零點稜EP1.1】中大新生幫緊你問題比賽
https://www.youtube.com/watch?v=K71dLUtAXMA
【零點稜EP1.2】中大新生幫緊你問答比賽
https://www.instagram.com/tv/CEowDPwHIr9/?utm_source=ig_web_copy_link
【零點稜EP2】新學期檔案：雙失背後 • 隱蔽新生
https://www.instagram.com/tv/CEPDsyihNBC/?utm_source=ig_web_copy_link
【2】試食中大月餅
【由稜試下吖EP1】中大愛心月餅
https://www.instagram.com/tv/CFwtT6KBgXZ/?utm_source=ig_web_copy_link